Oinsá mak Ita bele hetan relijiaun loos?

1. Jesus harii relijiaun kristaun loos ida de’it. Tan ne’e mak ohin loron iha grupu ida de’it ne’ebé fó adorasaun loos ba Jeová. (Joao 4:23, 24; Efeso 4:4, 5) Bíblia hanorin katak ema uitoan de’it maka la’o iha dalan kloot ba moris. — Mateus 7:13, 14.

2. Bíblia hateten nanis katak depois apóstolu hotu mate tiha, hanorin laloos no hahalok ne’ebé la’ós kristaun, neineik-neineik sei tama iha kongregasaun kristaun nia laran. Ema balu sei dada sai ema ne’ebé fiar atu tuir sira duké Kristu. (Mateus 7:15, 21-23; Apostolu [Kisah] 20:29, 30) Tanba ida-ne’e mak iha relijiaun barak ne’ebé dehan katak sira kristaun. Oinsá mak ita bele hatene kristaun loos?

3. Sinál boot liu ne’ebé hatudu nu’udar kristaun loos maka hadomi malu. (Joao 13:34, 35) Kristaun sira la aprende katak ema ruma di’ak liu fali ema husi rasa ou kór seluk. Sira mós la aprende atu odi ema husi nasaun, ou rai seluk. (Apostolu [Kisah] 10:34, 35) Tan ne’e maka sira la hola parte iha funu sira. Kristaun loos sira trata malu hanesan maun-alin. — 1 Joao 4:20, 21.

Kristaun loos sira hadomi malu, respeita Bíblia, no haklaken kona-ba Maromak nia Reinu

4. Sinál seluk ne’ebé hatudu katak relijiaun loos maka bainhira ema iha respeitu kle’an ba Bíblia. Sira simu Bíblia nu’udar Maromak nia Liafuan, no sira fiar hotu buat ne’ebé Bíblia hateten. (Joao 17:17; 2 Timoteo 3:16, 17) Sira hanoin katak Maromak nia Liafuan mak importante liu duké ema-nia ideia ou lisan sira. (Mateus 15:1-3, 7-9) Sira buka atu moris tuir Bíblia iha sira-nia moris loroloron nian. Tan ne’e, sira la hanorin buat ida, depois halo buat seluk. — Tito 1:15, 16.

5. Relijiaun loos tenke hahi’i Maromak nia naran. (Mateus 6:9) Jesus fó-hatene Maromak nia naran, Jeová, ba ema seluk. Kristaun loos sira tenkesér halo hanesan Jesus halo. (Joao 17:6, 26; Roma 10:13, 14) Iha Ita-nia komunidade, sé maka fó-hatene ba ema seluk Maromak nia naran?

6. Kristaun loos sira tenke haklaken kona-ba Maromak nia Reinu. Jesus halo ida-ne’e. Nia sempre ko’alia kona-ba Reinu ne’e. (Lucas 8:1) Jesus haruka ninia dixípulu sira atu haklaken mensajen ida-ne’e iha mundu tomak. (Mateus 24:14; 28:19, 20) Kristaun loos sira fiar katak Maromak nia Reinu de’it maka bele lori dame loos no seguransa ba Rai ne’e. — Salmo [Mazmur] 146:3-5.

7. Jesus nia dixípulu sira tenkesér la’ós mundu aat ne’e nian. (Joao 17:16) Sira la hola parte iha mundu nia polítika, no iha buat ne’ebé halo ema istori malu iha komunidade nia laran. Sira hadook an husi hahalok, kostume no ideia aat ne’ebé mosu beibeik iha mundu ne’e. (Tiago [Yakobus] 1:27; 4:4) Iha Ita-nia komunidade, Ita hatene relijiaun saida mak iha sinál sira-ne’e, ne’ebé hatudu kristianizmu loos?

Copyright © 2008 Watch Tower Bible and Tract Society of Pennsylvania. All rights reserved.