Hatudu respeitu ba moris no raan

1. Jeová maka moris nia Hun. Buat hotu ne’ebé moris bele iha tanba Maromak. (Salmo [Mazmur] 36:9) Moris maka buat ida ne’ebé sagradu ba Maromak. Labarik ne’ebé seidauk moris, iha nia inan-nia kabun, mós folin-boot ba Maromak. Bainhira ema oho moris ne’e, ne’ebé sei iha kabun laran, ida-ne’e sala iha Maromak nia oin. — Êxodo [Keluaran] 21: 22, 23; Salmo [Mazmur] 127:3.

Atu halo kontente Maromak, ita tenke hadook an husi transfuzaun raan nian, kostume lamoos, no perigu ruma

2. Kristaun loos sira hanoin atu la tau sira-nia moris iha perigu. Sira kuidadu atu sira-nia karreta no uma la iha perigu. (Deuteronômio [Ulangan] 22:8) Maromak nia atan sira la tau sira-nia moris iha perigu ruma atu buka haksolok de’it. Tan ne’e, sira la hola parte iha jogu ruma ne’ebé iha violénsia, ne’ebé bele hakanek ema seluk. Sira sees an husi filme, livru no halimar sira seluk ne’ebé dada ita atu halo violénsia. — Salmo [Mazmur] 11:5; Joao 13:35.

3. Animál sira-nia moris mós sagradu ba Maromak. Kristaun bele oho animál sira atu hetan hahán no roupa, ou atu proteje an husi moras no perigu. (Gênesis [Kejadian] 3:21; 9:3; Êxodo [Keluaran] 21:28) Maibé, sala atu trata aat animál sira ou oho sira tanba taru-osan ou atu buka haksolok de’it. — Provérbios [Amsal] 12:10.

4. Fuma sigaru, mama malus, no uza droga la’ós ba kristaun sira. Hahalok sira-ne’e sala tanba (1) halo ita sai sira-nia atan, (2) estraga ita-nia isin, no (3) buat sira-ne’e lamoos. (Roma 6:19; 12:1; 2 Korinto 7:1) Karik susar tebes atu husik kostume sira-ne’e. Maibé ita tenke husik atu halo kontente Jeová.

5. Raan mós sagradu iha Maromak nia oin. Maromak hateten katak klamar, ou moris, mak iha raan laran. Tan ne’e, sala atu han raan. Mós sala atu han na’an husi animál ne’ebé raan seidauk hasai. Se animál ida buti mate ka mate iha lasu ida, ita labele han. Se mate ho diman ka tiru, tenke hasai nia raan lalais se ida-ne’e atu han. — Gênesis [Kejadian] 9:3, 4; Levítico [Imamat] 17:13, 14; Apostolu [Kisah] 15:28, 29.

6. Sala atu simu transfuzaun raan nian ka lae? Hanoin-hetan katak Jeová hakarak ita atu hadook an husi raan. Ida-ne’e signifika katak ita labele hatama ema seluk nia raan iha ita-nia isin, no mós ita-nia raan rasik ne’ebé rai hela iha fatin ida. (Apostolu [Kisah] 21:25) Tan ne’e, kristaun loos sira la simu transfuzaun raan nian. Sira simu tratamentu médiku oin-seluk, hanesan transfuzaun husi buat ne’ebé la’ós raan. Sira hakarak moris, maibé sira la koko atu salva sira-nia moris hodi la halo tuir Maromak nia lei sira. — Mateus 16:25.

Copyright © 2008 Watch Tower Bible and Tract Society of Pennsylvania. All rights reserved.