Hahalok sira ne’ebé Maromak odi - Testemuña ba Jeová nia sítiu ofisiál.

Testemuña ba Jeová nia sítiu ofisiál.

Beliefs

Future

Saida maka Maromak Hakarak ita atu Halo?

Lisaun 10

Hahalok sira ne’ebé Maromak odi
	Oinsá mak ita tenke sente kona-ba buat ne’ebé Maromak dehan katak aat? (1)
	Hahalok seksuál sira oin saida maka sala? (2)
	Oinsá mak ema kristaun tenke hanoin kona-ba bosok (3), taru-osan (3), na’ok (3), violénsia (4), espiritizmu (5), no hemu-lanu? (6)
	Oinsá mak ema ida bele husik hahalok sira ne’ebé aat? (7)

1. Maromak nia atan sira hadomi buat ne’ebé maka di’ak. Maibé sira mós tenke aprende atu odi buat ne’ebé mak aat. (Salmo [Mazmur] 97:10) Ida-ne’e signifika katak ita tenke sees an husi hahalok sira ne’ebé Maromak odi. Saida maka hahalok aat balu ne’ebé Maromak odi?

2. Sala-fo’er: Seksu antes kazamentu, adultériu, relasaun seksuál ho animál, relasaun seksuál ho ema ruma iha família, no omoseksualidade maka sala boot hotu ne’ebé kontra Maromak. (Levítico [Imamat] 18:6; Roma 1:26, 27; 1 Korinto 6:9, 10) Se mane ho feto seidauk kaben maibé hela hamutuk, sira tenke haketak malu, selae tenke kaben loloos tuir lei. — Ebreu [Ibrani] 13:4.

Maromak odi hemu-lanu, na’ok, taru-osan, no hahalok ho violénsia

3. Bosok, taru-osan, na’ok: Maromak Jeová la bosok. (Tito 1:2) Ema ne’ebé hakarak atu Maromak simu sira tenkesér labele bosok. (Provérbios [Amsal] 6:16-19; Koloso 3:9, 10) Taru-osan iha buat ruma hatudu hahalok kaan-teen, ou karak-teen. Tan ne’e, kristaun sira la hola parte iha taru-osan ba buat ruma, hanesan dada rifa, kuda halai-taru, bingo, no futu-manu. (Efeso 5:3-5) Mós, kristaun sira la na’ok. Sira la sosa sasán ne’ebé ema na’ok, no mós, sira la foti sasán ruma lahó lisensa. — Êxodu [Keluaran] 20:15; Efeso 4:28.

4. Hirus demais, violénsia: La kontrola hirus bele kria violénsia. (Gênesis [Kejadian] 4:5-8) Ema ne’ebé uza violénsia la bele sai Maromak nia belun. (Salmo [Mazmur] 11:5; Provérbios [Amsal] 22:24, 25) Sala atu vinga ou selu fali aat ho aat ne’ebé ema seluk karik halo mai ita. — Provérbios [Amsal] 24:29; Roma 12:17-21.

5. Maninga no espiritizmu: Ema balu hamulak atu hetan espíritu aat sira-nia forsa atu kura moras. Ema seluk uza maninga ou fekit ai-moruk ba sira-nia inimigu atu halo moras no mós atu oho sira. Satanás maka forsa iha hahalok sira-ne’e nia kotuk. Tan ne’e, kristaun sira labele hola parte iha buat sira-ne’e. (Deuteronômio [Ulangan] 18:9-13) Besik ba Jeová maka proteje ita didi’ak husi maninga ne’ebé ema seluk halo mai ita. — Provérbios [Amsal] 18:10.

6. Hemu-lanu: La sala atu hemu tua, serveja, ou hemu alkol seluk. (Salmo [Mazmur] 104:15; 1 Timoteo 5:23) Maibé hemu demais no hemu-lanu maka sala iha Maromak nia oin. (1 Korinto 5:11-13; 1 Timoteo 3:8) Hemu barak bele estraga Ita-nia saúde no kria problema ba Ita-nia família. Ida-ne’e mós bele halo Ita monu lalais ba tentasaun seluk. — Provérbios [Amsal] 23:20, 21, 29-35.

7. Ema sira ne’ebé halo buat ne’ebé Maromak dehan katak aat “sei la simu Maromak nia reinu nudar liman rohan”. (Galasia 5:19-21) Se Ita hadomi tebes Maromak no hakarak halo nia kontente, Ita bele husik hahalok sira-ne’e. (1 Joao 5:3) Aprende atu odi buat ne’ebé maka Maromak dehan katak aat. (Roma 12:9) Halibur hamutuk ho ema ne’ebé iha hahalok tuir Maromak nia hakarak. (Provérbios [Amsal] 13:20) Maluk kristaun sira, ne’ebé iha esperiénsia, bele ajuda. (Tiago [Yakobus] 5:14, 15) Liuliu, konfia ba Maromak nia ajuda liuhusi orasaun. — Filipe 4:6, 7, 13.

Halo iha 2005
Copyright © 2008 Watch Tower Bible and Tract Society of Pennsylvania. All rights reserved.