Maromak nia atan sira tenkesér moos

1. Maromak Jeová maka moos no santu. Nia hakarak ema ne’ebé adora nia atu sai moos nafatin iha buat ne’ebé espirituál, morál, mentál no isin. (1 Pedro 1:16) Ita tenke haka’as an tebes atu moos nafatin iha Maromak nia oin. Ita moris iha mundu ida ne’ebé la moos. Ita mós iha luta ida atu hasoru ita-nia hakarak ne’ebé dudu ita atu halo sala. Maibé ita tenkesér labele rende an.

2. Moos iha buat espirituál nian: Se ita hakarak serbí Jeová, ita labele kaer nafatin ba hanorin no kostume husi relijiaun falsu. Ita tenkesér sai husi relijiaun falsu no la fó apoiu ida. (2 Korinto 6:14-18; Apokalipse [Wahyu] 18:4) Bainhira ita aprende tiha lia-loos kona-ba Maromak, ita tenke kuidadu atu labele husik ema ne’ebé hanorin lia-falsu lohi ita. — 2 Joao 10, 11.

3. Moos iha buat morál nian: Jeová hakarak ema ne’ebé adora nia atu halo tuir hahalok kristaun loos nian loron-loron. (1 Pedro 2:12) Nia haree buat hotu ita halo, maski subasubar. (Ebreu [Ibrani] 4:13) Ita tenke sees husi imoralidade seksuál no prátika fo’er sira seluk husi mundu ne’e nian. — 1 Korinto 6:9-11.

4. Moos iha buat mentál nian: Se ita halo nakonu ita-nia neon ho hanoin ne’ebé moos, ita-nia hahalok mós sei sai moos. (Filipe 4:8) Maibé, se ita hanoin nafatin kona-ba buat fo’er ita-nia hahalok mós sei sai aat. (Mateus 15:18-20) Ita tenke sees an husi filme, livru no halimar sira seluk ne’ebé bele hafo’er ita-nia neon. Ita bele halo nakonu ita-nia neon ho hanoin ne’ebé moos hodi estuda Maromak nia Liafuan.

5. Moos iha buat isin nian: Tanba kristaun sira reprezenta Maromak, sira tenke mantein sira-nia isin no roupa moos. Ita tenke fase liman bainhira ita ba sentina, no ita tenke fase liman antes han ou antes ka’er hahán. Se Ita-nia uma la iha sentina fatin, entaun bainhira Ita ba sentina tenke hakoi tiha. (Deuteronômio [Ulangan] 23:12, 13) Mantein isin ne’ebé moos sei ajuda ita hetan saúde di’ak. Kristaun ida tenke haloot no hamoos nia uma iha laran no iha li’ur. Ita-nia uma tenke sai ezemplu di’ak ba komunidade.

6. Liafuan ne’ebé moos: Maromak nia atan sira tenkesér sempre ko’alia lia-loos. Bosok-teen sira sei la tama iha Maromak nia Reinu. (Efeso 4:25; Apokalipse [Wahyu] 21:8) Kristaun sira la uza liafuan aat. Sira la rona no la konta istória fo’er atu halo ema hamnasa. Tanba sira ko’alia liafuan ne’ebé moos, sira la hanesan ema seluk iha serbisu-fatin, iha eskola, no mós iha viziñu sira-nia leet. — Efeso 4:29, 31; 5:3.

Maromak nia atan sira tenkesér moos iha buat hotu

Copyright © 2008 Watch Tower Bible and Tract Society of Pennsylvania. All rights reserved.