Saida maka Maromak nia Reinu? - Testemuña ba Jeová nia sítiu ofisiál.

Testemuña ba Jeová nia sítiu ofisiál.

Beliefs

Future

Saida maka Maromak Hakarak ita atu Halo?

Lisaun 6

Saida maka Maromak nia Reinu?
	Maromak nia Reinu iha ne’ebé? (1)
	Sé maka nia Liurai? (2)
	Iha ema seluk ne’ebé ukun hamutuk ho Liurai ne’e ka lae? Se nune’e, na’in-hira? (3)
	Saida maka hatudu katak ita moris iha loron ikus sira? (4)
	Iha futuru, saida maka Maromak nia Reinu sei halo ba ema iha Rai? (5-7)

1. Kuandu Jesus hela iha Rai, nia hanorin ema ne’ebé tuir nia atu harohan ba Maromak nia Reinu atu mai. Reinu ida maka governu ida ne’ebé liurai mak ulun-boot. Maromak nia Reinu maka governu espesiál ida. Reinu ne’e harii iha lalehan no sei ukun Rai ne’e. Nia sei halo santu, ou hahi’i Maromak nia naran. Reinu ne’e sei halo Maromak nia hakarak iha Rai nu’udar iha lalehan. — Mateus 6:9, 10.

2. Maromak promete katak Jesus maka sei sai Liurai ba Ninia Reinu. (Lucas 1:30-33) Kuandu Jesus hela iha Rai, nia hatudu katak nia sei sai Ukun-na’in ida ne’ebé laran-di’ak, loos, no perfeitu. Kuandu nia fila fali ba lalehan, nia la simu kedas ninia ukun nu’udar Liurai ba Maromak nia Reinu. (Ebreu [Ibrani] 10:12, 13) Iha tinan 1914 maka Jeová fó Jesus kbiit ne’ebé Nia promete tiha ona. Husi tempu ne’ebá maka Jesus ukun iha lalehan nu’udar Liurai ne’ebé Jeová hili. — Daniel 7:13, 14.

3. Jeová fihir mós ema balu husi Rai, mane no feto ne’ebé fiar-metin, atu bá lalehan. Sira sei hamutuk ho Jesus nu’udar liurai, juís, no amlulik hodi ukun ema iha Rai. (Lucas 22:28-30; Apokalipse [Wahyu] 5:9, 10) Jesus hanaran sira ne’ebé sei ukun ho nia iha nia Reinu bibi-malae lubun ki’ik. Sira hamutuk 144.000. — Lucas 12:32; Apokalipse [Wahyu] 14:1-3.

4. Momentu Jesus sai Liurai, nia soe tun Satanás no nia anju aat sira husi lalehan ba Rai. Tanba ida-ne’e maka buat sira ne’ebé mosu daudaun iha Rai ne’e sai aat liu husi tinan 1914. (Apokalipse [Wahyu] 12:9, 12) Funu sira, hamlaha boot, moras-peste, kontra lei aumenta ba beibeik, buat hirak-ne’e hotu maka halo parte “sinal” ida ne’ebé hatudu katak Jesus ukun hela no katak mundu tuan ne’e iha loron ikus sira-nia laran. — Mateus 24:3, 7, 8, 12; Lucas 21:10, 11; 2 Timoteo 3:1-5.

5. Lakleur Jesus sei tesi-lia ba ema. Nia sei haketak sira hanesan bibi-atan ida haketak ninia bibi-malae husi bibi-timur sira. “Bibi-malae” maka ema ne’ebé hatudu tiha ona katak sira maka povu ne’ebé fiar-metin ba Jesus. Sira sei simu moris rohan-laek iha Rai. “Bibi-timur” maka ema ne’ebé la simu Maromak nia Reinu. (Mateus 25:31-34, 46) Iha futuru besik atu mai, Jesus sei sobu sira hotu ne’ebé hanesan bibi-timur. (2 Tesalonia 1:6-9) Se Ita hakarak sai Jesus nia “bibi-malae” ida, Ita tenke rona ba mensajen Reinu nian no halo tuir buat saida Ita aprende. — Mateus 24:14.

Iha Jesus nia ukun okos, ema sei la odi malu ou haketak malu tan

6. Agora Rai fahe ba nasaun barak. Ida-idak iha ninia governu rasik. Nasaun sira-ne’e kontra malu beibeik. Maibé, Maromak nia Reinu sei troka governu sira hotu iha Rai, no sei ukun Rai tomak nu’udar governu mesak ida de’it. (Daniel 2:44) Iha tempu ne’ebá sei la iha tan funu, krime no violénsia. Ema hotu sei moris hamutuk ho dame no unidade. — Miquéias 4:3, 4.

7. Durante Jesus nia Ukun Tinan Rihun Ida nian, ema fiar-metin sira sei sai perfeitu, no Rai tomak sei sai paraízu ida. Iha tinan rihun ida nia rohan, Jesus sei halo tiha buat hotu ne’ebé Maromak husu nia atu halo. Iha tempu ne’ebá nia sei entrega fali Reinu ba nia Aman. (1 Korinto 15:24) Tansá Ita la dehan ba Ita-nia kolega sira no sira ne’ebé Ita hadomi kona-ba saida maka Maromak nia Reinu sei halo?

Halo iha 2005
Copyright © 2008 Watch Tower Bible and Tract Society of Pennsylvania. All rights reserved.