Buat saida maka Maromak hakarak halo ba Rai? - Testemuña ba Jeová nia sítiu ofisiál.

Testemuña ba Jeová nia sítiu ofisiál.

Beliefs

Future

Saida maka Maromak Hakarak ita atu Halo?

Lisaun 5

Buat saida maka Maromak hakarak halo ba Rai?
	Tansá maka Jeová kria Rai? (1, 2)
	Tansá maka Rai agora la’ós paraízu ida? (3)
	Saida maka sei akontese ba ema aat sira? (4)
	Iha futuru, saida maka Jesus sei halo ba ema moras, ferik-katuas, no ema mate? (5, 6)
	Saida mak Ita presiza halo atu bele hetan bensaun sira iha futuru? (7)

1. Jeová kria Rai ne’e atu ema bele goza sira-nia moris iha Rai ba nafatin. Nia hakarak atu ema ne’ebé loos no kontente maka moris iha Rai ne’e. (Salmo [Mazmur] 115:16; Isaías 45:18) Rai sei la naksobu; sei hela ba nafatin. — Salmo [Mazmur] 104:5; Eclesiastes [Pengkhotbah] 1:4.

2. Antes Maromak halo ema, Nia hili fatin ki’ik ida husi Rai hodi halo ne’e sai paraízu furak ida. Nia hanaran fatin ne’e jardín Éden. Iha fatin ne’e duni maka nia tau ema-mane primeiru no feto primeiru, Adão no Eva. Maromak hakarak sira iha oan hodi hakonu Rai tomak. Neineik-neineik sira bele halo Rai tomak sai paraízu ida. — Gênesis [Kejadian] 1:28; 2:8, 15.

Paraízu lakon

3. Adão no Eva halo sala hodi la halo tuir Maromak nia ukun-fuan maski sira hatene ona ne’e la loos. Tan ne’e, Jeová duni sai sira husi jardín Éden. Paraízu lakon tiha. (Gênesis [Kejadian] 3:1-6, 23) Maibé Jeová la haluha buat nia hakarak halo ba Rai ne’e. Nia promete atu halo Rai sai paraízu ida, iha ne’ebé ema sei moris ba nafatin. Oinsá maka nia sei halo ida-ne’e? — Salmo [Mazmur] 37:29.

4. Antes Rai ne’e atu sai paraízu ida, tenke hasai ulukliu ema aat sira. (Salmo [Mazmur] 37:38) Ida-ne’e sei akontese iha Armajedón, ne’e maka Maromak nia funu atu ramata buat aat hotu. Tuirmai, Maromak sei fó orden atu hatama Satanás iha kadeia durante tinan 1.000 nia laran. Ida-ne’e signifika katak sei la iha tan ema aat atu estraga Rai. Maromak nia povu de’it maka sei hetan salvasaun. — Apokalipse [Wahyu] 16:14, 16; 20:1-3.

5. Iha tempu ne’ebá Kristu Jesus sei ukun Rai nu’udar Liurai durante tinan 1.000. (Apokalipse [Wahyu] 20:6) Neineik-neineik nia sei halakon sala husi ita-nia hanoin no isin. Ita sei sai ema perfeitu hanesan loos ho Adão no Eva antes sira halo sala. Depois sei la iha tan moras, ferik-katuas no mate. Ema moras sei sai di’ak fali, no ema ferik-katuas sei sai joven fali. — Jó [Ayub] 33:25; Isaías 33:24; Apokalipse [Wahyu] 21:3, 4.

6. Durante Jesus nia Ukun Tinan Rihun Ida nian, ema fiar-metin sira sei serbisu atu halo Rai tomak sai paraízu ida. (Apokalipse [Wahyu] 21:3, 4) Mós, ema rihun ba rihun ne’ebé mate sei moris-hi’as fali iha Rai. (Apostolu [Kisah] 24:15) Se sira depois halo buat ne’ebé Maromak hakarak, sira sei kontinua atu moris iha Rai ba nafatin. Selae, Maromak sei sobu sira ba nafatin. — Joao 5:28, 29.

7. Hanesan ne’e maka buat Maromak uluk hakarak halo sei sai loos. Ita hakarak atu hetan bensaun hirak-ne’e iha futuru ka lae? Se hakarak, Ita tenke kontinua atu aprende kona-ba Jeová no halo tuir ninia hakarak. Atu ajuda Ita halo ida-ne’e, tuir beibeik reuniaun sira iha Testemuña ba Jeová sira-nia reuniaun-fatin. — Isaías 11:9; Ebreu [Ibrani] 10:24, 25.

Depois Armajedón, ema sei halo Rai sai paraízu ida

Halo iha 2005
Copyright © 2008 Watch Tower Bible and Tract Society of Pennsylvania. All rights reserved.