Sé maka Diabu?

1. Liafuan “diabu” signifika ema ruma ne’ebé ko’alia bosok kona-ba ema ida seluk. “Satanás” signifika inimigu ida ou hasoru-na’in. Liafuan sira-ne’e mak aplika ba Maromak nia inimigu boot liu. Uluk, nia anju perfeitu ida iha lalehan hamutuk ho Maromak. Maibé depois, nia hanoin demais kona-ba nia an no hakarak ba nia an adorasaun ne’ebé loloos Maromak nian. — Mateus 4:8-10.

2. Anju ida-ne’e, Satanás, ko’alia ba Eva liu husi samea ida. Hodi ko’alia bosok, Satanás lohi Eva atu la halo tuir Maromak. Hanesan ne’e maka Satanás ataka Maromak nia direitu atu ukun, ou Jeová nia pozisaun nu’udar Maromak Aas Liu. Satanás hasa’e dúvida kona-ba Maromak nia ukun, se Nia merese atu ukun iha dalan ida ne’ebé fó buat di’ak ba Nia povu. Satanás mós hasa’e dúvida se ema ruma iha Rai bele fó-laran nafatin ba Maromak. Hodi halo ida-ne’e, Satanás halo nia an sai Maromak nia inimigu. Tanba ida-ne’e maka nia hetan naran Satanás, Diabu. — Gênesis [Kejadian] 3:1-5; Jó [Ayub] 1:8-11; Apokalipse [Wahyu] 12:9.

3. Satanás koko atu habosok ema hodi adora nia. (2 Korinto 11:3, 14) Dalan ida ne’ebé nia lohi ema maka liuhusi relijiaun falsu. Se relijiaun ida hanorin lia-bosok kona-ba Maromak, entaun loloos ida-ne’e serve ba buat Satanás hakarak halo. (Joao 8:44) Ema husi relijiaun falsu karik fiar ho laran-metin katak sira adora Maromak loos. Maibé tuir loloos sira serbí Satanás. Nia maka “maromak mundu ne’e nian”. — 2 Korintu 4:4.

Relijiaun falsu, espiritizmu, no nasionalizmu lohi ema

4. Espiritizmu maka dalan ida seluk ne’ebé Satanás uza atu domina ema. Sira karik hamulak ba espíritu balu atu proteje sira, atu halo aat ba ema seluk, atu si’ik kona-ba futuru, atu halo milagre. Satanás maka forsa aat iha hahalok sira-ne’e hotu nia kotuk. Atu halo kontente Maromak, ita tenkesér la mete ho buat espiritizmu nian. — Deuteronômio [Ulangan] 18:10-12; Apostolu [Kisah] 19:13, 18, 19.

5. Satanás mós lohi ema liuhusi foti-an demais liu tanba rasa no adora organizasaun polítika sira. Ema balu sente katak sira-nia nasaun ou rasa maka di’ak liu fali ema seluk nian. Maibé ida-ne’e la loos. (Apostolu [Kisah] 10:34, 35). Ema seluk fiar katak organizasaun polítika sira bele rezolve ema-nia problema. Hodi halo ida-ne’e, sira la simu Maromak nia Reinu. Reinu ida-ne’e maka solusaun mesak de’it ba ita-nia problema sira. — Daniel 2:44.

Tahan hasoru Satanás hodi kontinua aprende kona-ba Jeová

6. Dalan ida seluk ne’ebé Satanás lohi ema maka hodi tenta sira ho hakarak ne’ebé sala. Jeová hateten mai ita atu sees an husi hahalok sala sira tanba nia hatene katak buat sira-ne’e sei halo aat mai ita. (Galasia 6:7, 8) Ema balu karik hakarak Ita atu hamutuk ho sira iha hahalok sira hanesan ne’e. Maibé, hanoin-hetan katak Satanás maka hakarak Ita atu halo buat hirak-ne’e. — 1 Korinto 6:9, 10; 15:33.

7. Satanás bele uza ema atu fó terus ba Ita ou kontra hasoru Ita hodi halo Ita husik Jeová. Karik ema balu, ne’ebé Ita hadomi, hirus tebetebes tanba Ita estuda Bíblia. Ema seluk bele goza Ita. Maibé, sé maka fó Ita moris? Satanás hakarak hata’uk Ita atu la aprende tan kona-ba Jeová. Keta husik Satanás manán! (Mateus 10:34-39; 1 Pedro 5:8, 9) Hodi tahan hasoru Diabu, Ita bele halo kontente Jeová no hatudu katak Ita defende Ninia direitu atu ukun. — Provérbios [Amsal] 27:11.

Copyright © 2008 Watch Tower Bible and Tract Society of Pennsylvania. All rights reserved.