 |
Beliefs | Future | Medical | Topics | Contact Us | Publications | Languages |
Haree mós
LIA-LOOS kona-ba saida? Lia-loos kona-ba pergunta sira-ne’ebé importante tebes iha ita-nia moris. Karik Ita mós husu ona pergunta tuirmai nee:
Iha ne’ebé mak Ita bele hetan resposta ba pergunta sira-nee? Se Ita bá biblioteka ka loja ne’ebé fa’an livru, Ita sei hetan livru barak tebes ne’ebé fó resposta oioin de’it. Problema mak livru ida fó resposta ne’ebé lahanesan ho livru sira seluk. No mós, ema barak hanoin katak informasaun husi livru uluk nian la iha folin tan.
Maibé, ita iha livru ida-ne’ebé fó resposta ne’ebé loos. Livru ida-nee sempre fó sai lia-loos. Jesus Kristu hatete iha ninia orasaun ba Maromak: “Ita-nia liafuan mak lia-loos.” (Joao 17:17) Ohin loron, ita bolu Liafuan nee nu’udar Bíblia. Iha pájina tuirmai nee, Ita sei haree oinsá mak Bíblia fó resposta ne’ebé klaru ba pergunta sira iha leten.
TANSÁ MAK EMA HUSU PERGUNTA IDA-NEE: Ita moris iha mundu ne’ebé nakonu ho susar no la iha justisa. Relijiaun barak hanorin katak susar ne’ebé ita hasoru mak Maromak nia hakarak.
SAIDA MAK BÍBLIA HANORIN: Maromak nunka hamosu buat ne’ebé aat. Jó 34:10 hatete: “Maromak nunka halo hahalok aat, no Maromak Forsa Boot Liu Hotu nunka halo hahalok laloos!” Tuir loloos, Maromak nia hakarak mak ita ema atu moris kontente. Tan nee mak Jesus hanorin ita atu halo orasaun hanesan nee: “Ami Aman iha lalehan, . . . halo Ita-nia reinu too mai ami; halo tuir Ita-nia hakarak ba iha rai nu’udar iha lalehan.” (Mateus 6:9, 10) Maromak hanoin tebes ita too saran ninia Oan-Mane atu kumpre ninia hakarak ba mundu no ema.—Joao 3:16.
Haree mós Gênesis 1:26-28; Tiago 1:13; no 1 Pedro 5:6, 7.
TANSÁ MAK EMA HUSU PERGUNTA IDA-NEE: Tinan-tinan ema rihun ba rihun mate tanba funu. Iha mundu nee, ita hotu hasoru terus iha ita-nia moris.
SAIDA MAK BÍBLIA HANORIN: Maromak fó-hatene katak aban-bainrua nia sei lori dame ba ema hotu iha mundu tomak. Kuandu Maromak nia Reinu, katak Maromak nia governu iha lalehan, mak ukun mundu, ema sei la “aprende tan funu”. Ema sei “tuku sira-nia surik sai ai-suak”. (Isaías 2:4) Maromak sei halakon ema nia susar no terus hotu. Bíblia promete: “[Maromak] sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian [hanesan susar no injustisa ne’ebé ema hasoru ohin loron] liu tiha ona.”—Apokalipse 21:3, 4.
Haree mós Salmo 37:10, 11; 46:9; Miquéias 4:1-4; no Mateus 5:5.
TANSÁ MAK EMA HUSU PERGUNTA IDA-NEE: Relijiaun barak hanorin katak ema ne’ebé mate ona sei iha klamar ne’ebé moris hela. Relijiaun balu hatete katak ema ne’ebé mate ona bele halo aat ba ema ne’ebé moris hela, no balu tan hatete katak Maromak sei fó kastigu ba ema ne’ebé aat iha infernu.
SAIDA MAK BÍBLIA HANORIN: Kuandu ema ida mate, ema nee la iha ona. Eclesiastes 9:5 hatete: “Ema ne’ebé mate ona, sira la hatene buat ida.” Se sira la hatene buat ida no la sente buat ida, sira la bele halo aat ka halo buat ne’ebé diak ba ema ne’ebé moris.—Salmo 146:3, 4.
Haree mós Gênesis 3:19; Eclesiastes 9:6, 10; no Joao 11:11-14.
TANSÁ MAK EMA HUSU PERGUNTA IDA-NEE: Ita hotu lakohi mate, maibé hakarak moris kontente hamutuk ho ema ne’ebé ita hadomi. Ita hotu hanoin ita-nia família ka kolega ne’ebé mate ona, no hakarak hasoru fali sira.
SAIDA MAK BÍBLIA HANORIN: Ema barak ne’ebé mate ona sei moris hi’as. Jesus promete katak “sira hotu ne’ebé iha rate laran sei . . . sa’e ba moris-hi’as”. (Joao 5:28, 29) Ema ne’ebé moris hi’as sei iha oportunidade atu moris haksolok iha mundu ne’ebé moos no furak, tanba moris hanesan nee mak Maromak nia hakarak husi tempu uluk kedas. Maromak promete katak ema ne’ebé halo tuir nia sei moris ba nafatin ho isin ne’ebé perfeitu. Porezemplu, Bíblia hatete: “Ema loos rasik sei simu rai, no sira sei moris ba nafatin iha ne’ebá.”—Salmo 37:29.
Haree mós Jó 14:14, 15; Lucas 7:11-17; no Apostolu 24:15.
TANSÁ MAK EMA HUSU PERGUNTA IDA-NEE: Relijiaun barak hanorin ema atu halo orasaun. Maski nune’e, ema barak sente katak Maromak la hatán ba sira-nia orasaun.
SAIDA MAK BÍBLIA HANORIN: Kuandu Jesus hanorin ita kona-ba orasaun, nia haruka ita atu labele “ko’alia barak” hanesan ema seluk ne’ebé uza “liafuan barabarak”. (Mateus 6:7) Ida-nee katak ita labele dekor ka repete beibeik liafuan sira iha ita-nia orasaun. Se ita hakarak Maromak see tilun ba ita-nia orasaun, ita tenke halo orasaun iha dalan ne’ebé tuir Maromak nia hakarak. Atu halo nune’e, ita presiza aprende kona-ba Maromak nia hakarak, no depois halo orasaun hodi tuir buat ne’ebé ita aprende ona. Iha 1 Joao 5:14, Bíblia hatete: “Wainhira ita husu buat ruma tuir [Maromak] nia hakarak, Nia rona ita.”
Haree mós Salmo 65:2; Joao 14:6; 16:23, 24; 1 Joao 3:22.
TANSÁ MAK EMA HUSU PERGUNTA IDA-NEE: Ema barak hanoin katak osan barak, naran-boot, ka sai bonitu ka bonita, sei halo sira-nia moris kontente. Tan nee, sira haka’as an atu buka buat sira-nee. Maibé bainhira hetan tiha, sira nafatin la kontente.
SAIDA MAK BÍBLIA HANORIN: Jesus ko’alia kona-ba buat ne’ebé importante atu moris kontente, hodi hatete: “Ksolok ba ema sira ne’ebé kiak iha laran.” (Mateus 5:3) Ema ne’ebé “kiak iha laran” sente katak nia kuran buat ida iha laran. Entaun, se ita sente katak ita presiza rona lia-loos kona-ba Maromak no ninia hakarak, no haka’as an atu buka lia-loos nee, ita bele sai kontente. Lia-loos nee bele hetan iha Bíblia laran de’it. Hodi hatene lia-loos nee, ita bele hatene buat ne’ebé importante duni no mós buat ne’ebé ladún importante. Se ita husik lia-loos iha Bíblia laran mak hatudu dalan mai ita, ita bele halo desizaun ne’ebé diak no halo ita-nia moris sai kontente.—Lucas 11:28.
Haree mós Provérbios 3:5, 6, 13-18 no 1 Timoteo 6:9, 10.
Too iha nee, Ita hetan ona resposta simples husi Bíblia ba pergunta neen. Ita hakarak aprende liután ka lae? Se Ita hanesan ema ne’ebé “kiak iha laran”, Ita sei hakarak duni. Karik Ita iha pergunta seluk tan, hanesan: ‘Se Maromak hanoin ita, tansá mak nia husik ema hetan susar no terus? Oinsá mak ha’u bele halo ha’u-nia moris família nian sai kontente?’ Bíblia fó resposta kapás ba pergunta sira-nee no mós ba pergunta seluk tan.
Maibé, ema barak sente laran-rua kona-ba estuda Bíblia. Sira hanoin katak Bíblia mak livru ne’ebé mahar no susar atu komprende. Ita hakarak ka lae, atu simu ajuda hodi hetan resposta husi Bíblia ba Ita-nia pergunta sira? Testemuña ba Jeová hakarak ajuda Ita atu hatene liután kona-ba Bíblia liuhusi buat rua tuirmai nee.
Primeiru, livru Tuir Loloos, Saida mak Bíblia Hanorin? bele ajuda ema ne’ebé ladún iha tempu atu hetan resposta ne’ebé klaru ba pergunta sira ne’ebé importante tebes. Segundu mak programa estudu Bíblia ne’ebé gratis. Ema Testemuña ba Jeová, ne’ebé hela besik Ita, bele ko’alia ho Ita kona-ba Bíblia semana ida dala ida iha Ita-nia uma ka iha fatin seluk ne’ebé diak, no hanorin Bíblia ba Ita. Ita lalika selu ba estudu Bíblia ida-nee. Programa ida-nee hala’o daudauk iha mundu tomak no ajuda ona ema barak tebetebes. Sira barak hatete: “Ha’u hetan ona lia-loos !”
Lia-loos hanesan rikusoin ne’ebé folin-boot tebes. Lia-loos husi Bíblia sei halo ita livre husi ema nia hanorin ne’ebé sala, no ajuda ita atu sente katak ita sai husi nakukun laran. Lia-loos nee fó esperansa no halo ita kontente. Jesus hatete: “Imi sei hatene lia-loos, no lia-loos sei halo imi la atan ona.”—Joao 8:32.
Halo iha 2008 |
 |