RELIJIAUN
FALSU NIA ROHAN
BESIK ONA!

Saida mak relijiaun falsu? Ita sente laran-susar ka lae, kona-ba krime ne’ebé ema halo hodi relijiaun nia naran? Ita sente hirus ka lae, tanba ema dehan sai katak sira serbí Maromak maibé halo funu, terrorizmu, no korrupsaun? Tanbasá relijiaun mak hanesan hun ba problema barak?

Relijiaun hotu la sala, maibé relijiaun falsu mak sala. Ema fiar-na’in ida ne’ebé ema barak respeita, Jesus Kristu, hatudu katak relijiaun falsu hamosu hahalok aat, hanesan de’it ho ‘ai ne’ebé aat fó fuan aat’. (Mateus 7:15-17) Relijiaun falsu hamosu ai-fuan saida?

Relijiaun falsu

RELIJIAUN FALSU HOLA PARTE IHA FUNU NO POLÍTIKA: Revista Asiaweek hateten: “Iha Ázia no iha fatin seluseluk, na’i-ulun sira ne’ebé hakarak kbiit boot koko maka’as atu aproveita ema sira-nia sentimentu kona-ba relijiaun atu kumpre na’i-ulun sira-nia hakarak.” Revista ne’e fó avizu kona-ba rezultadu husi ida-ne’e, hodi dehan: “Mundu sei sai runguranga.” Ulun-na’in relijiaun ida ne’ebé iha naran-boot iha Estadus Unidus dehan: “Atu hapara mate husi terrorista, ita tenke oho terrorista sira.” Ninia solusaun? “Hodi Maromak nia naran oho terrorista hotu.” Ida-ne’e la hanesan ho Bíblia ne’ebé hateten: ‘Ema ruma karik dehan katak nia hadomi Maromak, maibé hirus nia maluk, ema ne’e bosok-teen.’ (1 Joao 4:20) Jesus mós hateten: ‘Hadomi imi-nia funu-balun sira.’ (Mateus 5:44) Tuir Ita-nia hanoin, membru husi relijiaun hira mak hola parte iha funu?

RELIJIAUN FALSU HABELAR HANORIN NE’EBÉ FALSU: Relijiaun barak hanorin katak klamar, ka espíritu, mak buat ida ne’ebé moris hela depois isin-lolon mate. Liuhusi hanorin ne’e, relijiaun barak aproveita sira-nia membru atu fó osan hodi halo orasaun kona-ba ema mate sira-nia klamar. Maibé Bíblia hanorin la hanesan ho ida-ne’e. “Klamar ne’ebé halo sala — klamar ne’e sei mate.” (Ezequiel 18:4) “Ema ne’ebé moris hatene katak sira sei mate; maibé ema mate, sira la hatene buat ida.” (Eclesiastes 9:5) Jesus hanorin katak ema mate sei hetan moris-hi’as — moris-hi’as sei la bele akontense se ema mate iha klamar ne’ebé moris hela. (Joao 11:11-25) Ita-nia relijiaun hanorin katak klamar mate ka lae?

RELIJIAUN FALSU HUSIK DE’IT RELASAUN SEKSUÁL NE’EBÉ IMORÁL: Iha rai barak, grupu igreja ordena membru omoseksuál no lézbika atu sai amlulik no haka’as governu atu rekoñese kazamentu entre ema ho seksu hanesan. Igreja seluk, ne’ebé dehan sai katak hahalok imoralidade sala, mós husik de’it ulun-na’in relijiaun sira ne’ebé abuza seksu ba labarik. Maibé, saida mak Bíblia hanorin? Ho klaru Bíblia hateten: ‘Keta husik ema bosok imi: sira ne’ebé halo sala-fo’er ho feto-raan, ka adora lulik, ka halo sala-fo’er ho kaben-na’in, ka halo sala-fo’er ho maluk mane ka maluk feto . . . sei la simu Maromak nia reinu nu’udar liman-rohan.’ (1 Korinto 6:9, 10) Ita hatene relijiaun ruma ne’ebé husik de’it imoralidade seksuál ka lae?

Saida mak futuru ba relijiaun sira ne’ebé hamosu ai-fuan aat? Jesus fó avizu: ‘Ai sira ne’ebé la fó fuan di’ak sei tesi tiha hodi soe ba ahi.’ (Mateus 7:19) Loos duni, relijiaun falsu sei tesi tiha no lakon! Maibé oinsá no bainhira ida-ne’e sei akontese? Vizaun profétiku ida ne’ebé hakerek iha Bíblia iha Apokalipse, kapítulu 17 no 18, fó resposta.

Oinsá mak relijiaun falsu sei ramata?

Hanoin to’ok kona-ba ida-ne’e. Feto-aat ida tuur iha animál fuik ne’ebé si’ak nia leten. Animál fuik ne’e iha ulun hitu no dikur sanulu. (Apokalipse 17:1-4) Feto-aat ne’e reprezenta sé? Nia iha forsa kuandu envolve ho “liurai sira hotu raiklaran nian.” Nia hatais roupa mean, uza insensu, no iha rikusoin barak tebetebes. No mós, liuhusi espiritizmu, nia “lohi nasaun sira hotu”. (Apokalipse 17:18; 18:12, 13, 23) Bíblia ajuda ita atu haree katak feto-aat ne’e mak organizasaun relijiaun nian iha mundu tomak. Nia reprezenta, la’ós relijiaun ida de’it, maibé relijiaun hotu ne’ebé hamosu ai-fuan aat.

Animál fuik ne’ebé feto-aat sa’e mak reprezenta mundu nia governu sira.* (Apokalipse 17:10-13) Relijiaun falsu tuur iha animál fuik polítiku nia leten, hodi koko hola parte iha governu nia desizaun no kontrola ninia diresaun.

Maibé, lakleur tan, akontesimentu ida ne’ebé halo ema hakfodak sei mosu. ‘No dikur sanulu ne’ebé ó haree: sira no animál fuik sei foti liman hasoru feto-aat ne’e, hodi kolu nia hatais no husik nia isin-tanan; sira sei han nia isin lolon hodi sunu nia iha ahi laran.’ (Apokalipse 17:16) Derrepente de’it, mundu nia governu sira sei halo ema hakfodak hodi ataka relijiaun falsu no halakon nia tomak! Sé mak halo ida-ne’e akontese? Livru Apokalipse iha Bíblia fó-hatene: ‘Maromak tau ona iha sira-nia laran atu hala’o Ninia hakarak.’ (Apokalipse 17:17) Loos, Maromak sei halo relijiaun falsu lori todan ba buat aat hotu ne’ebé nia halo hodi Maromak nia naran. Iha dalan ne’ebé hatudu justisa, Maromak sei uza sistema polítika nian ne’ebé mak nu’udar relijiaun falsu nia doben, atu halakon relijiaun falsu.

Saida mak Ita tenke halo se Ita lakohi hola parte ba buat ne’ebé sei akontese ba relijiaun falsu? Maromak nia manu-ain anima ita: ‘Ha’u-nia povu, hadook husi nia.’ (Apokalipse 18:4) Entaun, agora mak tempu atu halai husi relijiaun falsu! Maibé Ita halai ba ne’ebé? Labele hamutuk ho ema ne’ebé la fiar Maromak, tanba sira mós la iha futuru. (2 Tesalonika 1:6-9) Ita bele hetan mahon iha relijiaun ne’ebé loos de’it. Oinsá Ita bele hatene relijiaun ida-ne’ebé mak loos?

Oinsá atu hatene relijiaun ida-ne’ebé mak loos

Relijiaun loos hamosu ai-fuan di’ak saida? — Mateus 7:17.

Relijiaun loos

RELIJIAUN LOOS HATUDU DOMIN: Adora-na’in ne’ebé loos ‘la’ós mundu ne’e nian’, no la haketak malu maski husi rasa ka kultura ne’ebé la hanesan, no mós “hadomi malu”. (Joao 13:35; 17:16; Apostolu10:34, 35) Sira la oho malu, maibé sira hadomi malu to’o sira fó sira-nia moris tanba sira-nia maluk. — 1 Joao 3:16.

RELIJIAUN LOOS FIAR BA MAROMAK NIA LIAFUAN: Sira la hanorin “lisan” no ‘ema sira-nia doutrina no ukun-fuan sira’, maibé buat hotu ne’ebé sira hanorin mai husi Maromak nia Liafuan, Bíblia. (Mateus 15:6-9) Tanbasá? Tanba ‘Maromak leno Eskritura hotu; nia di’ak atu hanorin, atu halakon hanorin ne’ebé la loos, atu sai matadalan ba ema nia moris’. — 2 Timoteo 3:16.

RELIJIAUN LOOS HAMETIN FAMÍLIA NO APOIA MORÁL NE’EBÉ LOOS: Relijiaun loos hanorin la’en atu ‘hadomi sira-nia kaben hanesan sira hadomi sira rasik nia isin-lolon’, ajuda feen atu hatudu respeitu ba sira-nia la’en, no hanorin oan atu ‘halo tuir sira-nia aman inan nia hakarak’. (Efeso 5:28, 33; 6:1) No mós, ba sira ne’ebé kaer responsabilidade boot tenkesér hatudu ezemplu morál ne’ebé loos. — 1 Timoteo 3:1-10.

Iha relijiaun ruma ne’ebé halo tuir buat hotu ne’e ka lae? Livru Holocaust Politics (Polítika Olokausta), ne’ebé hasai iha tinan 2001, hateten: “Se ema barak liu moris tuir Testemuña ba Jeová nia hanorin no hahalok, Olokaustu la akontese no la iha tan jenosídiu ne’ebé agora haterus mundu.”

Loos duni, iha rai 235, Testemuña ba Jeová la haklaken de’it kona-ba morál husi Bíblia — sira mós halo tuir ida-ne’e iha sira-nia moris. Ami anima Ita atu husu ba Testemuña ba Jeová atu ajuda Ita aprende kona-ba saida mak Maromak hakarak Ita atu halo hodi Ita bele adora nia iha dalan ne’ebé loos. Agora mak tempu atu halo ida-ne’e. Labele hein tan. Relijiaun falsu nia rohan besik ona! — Sofonias 2:2, 3.

*  Atu hetan esplikasaun liután kona-ba ne’e, haree ba livru Wahyu — Klimaksnya yang Menakjubkan Sudah Dekat! husi Testemuña ba Jeová.