1. Tori ei fansoun en mi fen kaeo chommong mettoch seni ewe Paipel. Ei sile epwe alisuk om kopwe lapalapeni lapalapen chon Kraist. (Efisus 4:22-24) Kopwe fokkun angei ena sokkun sile fan iten om kopwe kuna manau esemuch. (Jon 17:3) Iwe nge, a lamot ngeni ekkewe ekkoch aramas ar repwe rongorong ewe kapas allim pwe repwe pwal tongeni kuna manau. A lamot ngeni ekkewe chon Kraist mi enlet meinisin ar repwe afalafal ngeni ekkewe ekkoch. Ina an Kot we alluk.—Rom 10:10; 1 Korint 9:16; 1 Timoti 4:16.
2. Kopwe tongeni poputa ren om kopwe fos ngeni chienom kewe ussun ekkewe mettoch mi murinno ka fen kaeo. Fos ngeni chon om famili, chienom kewe, chienom kewe chon sukul, me chienom kewe chon angang. Nge kopwe kirokiroch me mosonottam atun kopwe fos ngeniir. (2 Timoti 2:24, 25) Chechchemeni mwo pwe fan chommong aramas repwe nengeni fofforun emon lap seni ar repwe auseling ngeni alon. Iwe, om kewe foffor murinno epwe tongeni lukeato ekkewe ekkoch ar repwe auseling ngeni ewe poraus kopwe erenir.—Mattu 5:16; 1 Piter 3:1, 2, 16.
3. Mwirin och fansoun, eli epwe fich om kopwe fiti chon ewe mwichefelin Chon Pwarata Jiowa lon leeniom we lon ewe angangen afalafal. Ina eu mettoch mi lamot lon om feffeita. (Mattu 24:14) Epwe fokkun apwapwa ika kopwe tongeni alisi emon an epwe wiliiti emon chon angang ngeni Jiowa me kuna manau esemuch!—1 Tesalonika 2:19, 20. |
