Arap ngeni Kot lon Iotek

1. Iotek a wewe ngeni ach sipwe fos ngeni Kot fan tipetekison. Kopwe mochen iotek ngeni Kot iteitan. Epwe ina ussun kopwe tongeni meefi pwe en emon chiechien Kot. Jiowa, I emon mi lapalap me manaman seni meinisin, nge a auseling ngeni ach kewe iotek! En mi kan ikkiotek ngeni Kot iteitan?—Kol Fel 65:2; 1 Tesalonika 5:17.

2. Iotek, ina eu kinikinin ach fel. Ina minne, sipwe iotek ngeni Kot chok, Jiowa. Lupwen Jises a nonnom won fonufan, a kan ikkiotek ngeni Seman we, nge esap ngeni pwal emon. Iwe, sipwe pwal fori ussun chok. (Mattu 4:10; 6:9) Iwe nge, sipwe apasa ach kewe iotek meinsin fan iten Jises. Ei mettoch epwe pwarata pwe sia menniniiti wisen Jises we me sia eani lukuluk lon an we asorun malo.—Jon 14:6; 1 Jon 2:1, 2.

3. Lupwen sipwe iotek, sipwe fos ngeni Kot seni letipach. Sisap amwochulukun ach kewe iotek are alleanir seni eu puken iotek. (Mattu 6:7, 8) Sipwe tongeni iotek, nge ese lifilifil lapalapen inisich ika mei pwarata sufol, lon fansoun me leeni meinisin. Kot epwe tongeni rongorong pwal mwo nge ekkewe iotek sipwe eani lon letipach chok nge sise apasawu. (1 Samuel 1:12, 13) Epwe murinno ach sipwe kutta eu leeni mi kinamwe, ikewe ese wor aramas ie pwe sipwe pwisin iotek.—Mark 1:35.

4. Met sipwe tongeni iotek ussun? Mettoch meinisin mi tongeni weneiti ach chiechi ngeni. (Filipai 4:6, 7) Ewe iotek Jises a aiti ngeni noun kewe chon kaeo a pwarata pwe sipwe iotek ussun iten Jiowa we me an we kokkot. Sipwe pwal tongeni tingor fan iten minne mi lamot ngenikich lon pekin inis, fan iten omusamusen ach kewe tipis, me alillis pwe sisap kkuf fan sossot. (Mattu 6:9-13) Sisap iotek fan asengesin pwisin kich chok. Sipwe chok iotek fan iten minne mi tipeeu ngeni letipen Kot.—1 Jon 5:14.

5. Kopwe tongeni iotek iteiten fansoun meinisin letipom epwe amwokutuk om kopwe kilisou ngeni are mwareiti Kot. (1 Kronika 29:10-13) Kopwe iotek lupwen kopwe kuna osukosuk me sossotun om luku. (Kol Fel 55:22; 120:1) Mi fich om kopwe iotek me mwen om kopwe mongo. (Mattu 14:19) Jiowa a etiwakich ach sipwe iotek “iteiten fansoun meinisin.”—Efisus 6:18.

6. Sipwe akkaewin iotek ika sia fen tipis watte. Lon ekkena fansoun sipwe tingormau fan iten an Jiowa umoumoch me omusamus. Ika sipwe pwarata ach kewe tipis ngeni me achocho ngeni ach sisap liwiniitiir, Kot epwe “mochen omusalo ach tipis.”—Kol Fel 86:5; An Salomon Fos 28:13.

7. Jiowa a chok auseling ngeni iotekin aramas mi pwung. Ika Kot epwe auseling ngeni om kewe iotek, epwe lamot pwe kopwe achocho aukuukun om tufich le atipeeufengenni manauom ngeni an kewe alluk. (An Salomon Fos 15:29; 28:9) Kopwe fokkun tipetekison lupwen kopwe iotek. (Luk 18:9-14) Epwe lamot om kopwe achocho le manaueni ewe manau mi tipeeu ngeni minne ka eani iotek. Epwe ina ussun kopwe annetata pwe a wor om luku me minne kopwe apasa a wesewesen enlet. Ina chok atun Jiowa epwe polueni om kewe iotek.—Ipru 11:6.

Copyright © 2008 Watch Tower Bible and Tract Society of Pennsylvania. All rights reserved.