Dirava Ena Palani Tanobada Totona be Dahaka?

1. Iehova be tanobada ia havaraia, taunimanima ese do idia noholaia hanaihanai mai moale ida totona. Ia ura kara maoromaoro taudia mai edia moale ese tanobada idia noholaia hanaihanai. (Salamo 115:16; Isaia 45:18) Tanobada be do ia hadikaia ore lasi; do ia noho ela bona hanaihanai.—Salamo 104:5; Hadibaia Tauna 1:4.

2. Dirava ese taunimanima ia do karaia lasi neganai, Ia ese tanobada ena kahana maragina ta ia abia hidi bena paradaiso mai hairaina ai ia halaoa. Ena ladana ia hatoa Eden umana. Unuseniai tau bona hahine ginigunadia, Adamu bona Heva, ia atodia. Dirava ena palani be idia ese natudia do idia havaraia bona tanobada do idia hahonua. Metairametaira tanobada ibounai be paradaiso ai do idia halaoa diba.—Genese 1:28; 2:8, 15.

Paradaiso idia haboioa

3. Adamu bona Heva be mai edia ura ida Dirava ena taravatu idia utua dainai idia kara dika. Unai dainai Iehova ese Eden umana murimurinai ia atodia. Paradaiso idia haboioa. (Genese 3:1-6, 23) To Iehova ese ena palani tanobada totona be ia laloaboio lasi. Ia gwauhamata, paradaiso ai do ia halaoa, bena unuseniai taunimanima be do idia noho ela bona hanaihanai. Edena dala ai unai do ia karaia?—Salamo 37:29.

4. Inai tanobada be paradaiso ai do ia lao totona, Dirava ese taunimanima dikadia do ia kokia guna be namo. (Salamo 37:38) Unai be Aramagedono ai do ia vara, Dirava ese kara dikadia do ia haorea tuarina. Unai murinai, Iesu ese Satani do ia hadiburaia ela bona lagani 1,000 idia ore. Unai ena anina be tanobada hadikaia tauna ta do ia noho lasi. Dirava ena taunimanima sibodia do idia roho mauri.—Apokalupo 16:14, 16; 20:1-3.

5. Bena lagani 1,000 lalonai Iesu Keriso be ena King dagina ai inai tanobada do ia lohiaia. (Apokalupo 20:6) Ia ese iseda lalona bona tauanina amo kara dika be metairametaira do ia kokia. Ita be taunimanima goevadaedia ai do ita lao, Adamu bona Heva idia do kara dika lasi neganai hegeregeredia. Bena gorere, buruka, bona mase do idia ore. Gorere taudia do idia namo lou, bona buruka taudia do idia matamata lou.—Iobu 33:25; Isaia 33:24; Apokalupo 21:3, 4.

6. Iesu ena Lagani 1,000 Lohia Negana lalonai, abidadama taudia be do idia gaukara tanobada ibounai be paradaiso ai idia halaoa totona. (Luka 23:43) Danu, mase taudia milioni milioni be tanobada ai do idia toreisi lou. (Kara 24:15) Bema Dirava ena ura karadia idia karaia, tanobada ai do idia noho hanaihanai. Bema lasi, do ia haoredia vaitani.—Ioane 5:28, 29; Apokalupo 20:11-15.

7. Dirava ena palani ginigunana inai tanobada totona be do ia guguru. Oi ura unai vaira hahenamodia oi abia, a? Bema oibe, namona be Iehova oi dibaia noho bona ena taravatu oi badinaia noho. Unai bamona oi karaia totona, Iehova ena Witness taudia edia Kingdom Hall dekenai hebouhebou lao henia karana ese oi do ia durua.—Isaia 11:9; Heberu 10:24, 25.

Aramagedono murinai, tanobada be paradaiso ai do idia halaoa

Copyright © 2008 Watch Tower Bible and Tract Society of Pennsylvania. All rights reserved.