Sivarai Namona ese Oiemu
Gabu Dekenai Ia Havaraia Namo
HARI inai negai tanobadana lalonai nega momo taunimanima idia gwau: “Hari Keristani hakaua herevadia be namo lasi. Hari inai mauri aukana totona idia hegeregere lasi.” To, Hindu gunalaia tauna Mohandas K. Gandhi bona guna India dekenai ia noho Britain ena gavana, Lord Irwin, idia herevahereva neganai, lalohadai idauna ia hedinarai. Idia gwau Lord Irwin ese Gandhi ia nanadaia, iena lalohadai hegeregerena dahaka ese Great Britain bona India huanai idia noho hekwakwanai ia haorea diba. Gandhi ese Baibel ia abia, Mataio karoa 5 dekenai ia kehoa, bona ia gwau: “Emu bese bona lauegu bese ese Keriso ena Haroro Herevana Badana lalonai ia gwauraia herevadia do ita badinaia mai eda lalo-tamona ida neganai, ita ese iseda bese edia hekwakwanai sibona lasi to tanobada ibounai ena do ita haorea.”
Unai haroro herevana ese lauma gaudia tahua karana bona manau, maino, hebogahisi, bona kara maoromaoro ura henia karadia ia gwauraia namo. Ala-ala sibona lasi to ma haida badu henia karana danu, heudahanai sibona lasi to matabodaga lalohadai danu ia gwauraia dika. Maduna laloa lasi dalanai headava hadokoa karana ia gwauraia dika, unai kara ese ruma bese ia hapararaia bona natudia ia hahisia. Ita ia hamaoroa: ‘Ita idia ura henia lasi taudia do ita lalokau henia, ogogami taudia do ita durua, hebogahisi lasi dalanai ma haida do ita hahemaoro henia lasi, ita ura ita idia kara henia hegeregerena ma haida do ita kara henia.’ Unai sisiba iboudiai bema ita badinaia, namo bada idia havaraia. Oiemu gabu dekenai momo ese unai idia badinaia neganai, oiemu gabu be ia namo ia lao!
Iehova ena Witnes taudia ese unai bamona namo idia havaraia. Baibel ese idia ia hadibaia headava do idia matauraia. Edia natudia dekenai hakaua hereva maorodia idia hadibaia. Ruma bese idia laloa bada. Lalo-tamona ruma besedia ese emu gabu ai, bona emu tano ai, namo idia havaraia. Histori ena sivarai ese ia hahedinaraia basileia badadia idia moru, badina ruma bese idia moru bona matabodaga karadia idia bada idia lao. Iehova ena Witnes taudia be taunimanima bona ruma bese momo ese Keristani hakaua herevadia badinaia totona idia hagoadaia neganai, emu gabu ai raskol karadia, matabodaga karadia, bona taravatu utua karadia edia namba ia maragi ia lao.
| Bese idauidau bona kopina idauidau taudia idia gaukara hebou
|
Idau bese taudia inai henia kava karana be gabu bona tano idauidau edia hekwakwanai badana ta. To, aposetolo Petero ia gwau: “Lau diba momokani Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” Bona Paulo ia gwau: “Umui ta be idau lasi. Iuda taudia bona Iuda lasi taudia, idia guia hesiai taudia bona ura kwalimu taudia, tatau bona hahine, umui ibounai be tamona sibona. Keriso Iesu danu umui hakapua dainai umui ibounai be tamona.” (Kara 10:34, 35; Galatia 3:28) Iehova ena Witnes taudia ese unai idia abia dae. Edia hedikwota, brens opesi idauidau, bona kongregesen idauidau dekenai, bese idauidau bona kopina idauidau taudia idia noho bona idia gaukara hebou.
| Keristani mauri dalana ese namo ia havaraia. Ma gau ta ese namo do ia havaraia, a?
|
Africa dekenai iduhu haida taudia idia hebou negadia ibounai do idia heai. To, unuseniai Iehova ena Witnes taudia edia hebouheboudia dekenai, iduhu idauidau momo taudia be mai edia lalo-tamona bona hebogahisi ida idia aniani, mahuta, bona tomadiho hebou. Gavamani ena opesa taudia ese unai idia itaia neganai idia hoa bada. August 2, 1958 ai, New York ena Amsterdam News be Keristani dalana momokanina ese taunimanima ia hatamonaia karana ia herevalaia. Ai gwauraia vadaeni intenesenel hebouhebouna ai, New York City dekenai, idia hebou Witnes taudia 250,000 bamona idia itaia dainai, inai idia torea.
“Gabu ibounai ai, Negro taudia, kopi kurokuro bona Orient taudia, mauri dala ibounai bona tanobada ena kahana ibounai amo, be mai moale ida idia noho hebou. . . . Idia tomadiho Witnes taudia tano 120 amo be maino ai idia noho bona idia tomadiho hebou, unai amo America taudia dekenai idia hahedinaraia unai be auka lasi. . . . Unai hebouhebou ese dala namona ai ia hahedinaraia, taunimanima idia gaukara bona idia noho hebou diba.”
Reana momo idia gwau hari inai negai tanobadana ai Keristani hakaua herevadia be namo idia havaraia lasi. To, ma gau ta ese namo ia havaraia, a? Emu gabu dekenai idia badinaia Keristani hakaua herevadia ese hari namo bada idia havaraia diba, bona idia ese tanobada hegegemadai “bese idauidau, iduhu idauidau, [bona] kopina idauidau” taudia be Dirava ena Basileia henunai do idia hatamonaia.—Apokalupo 7:9, 10.
|
