Ol Witnes Blong Jeova—?Oli Hu? ?Wanem Bilif Blong Olgeta?

?Wanem Bilif Blong Olgeta?

OL WITNES BLONG JEOVA oli bilif long God we i gat Olgeta Paoa, we nem blong hem Jeova mo we hem i wokem heven mo wol. Olgeta samting raonabaot long yumi, long wol mo long skae, i no gat man long wol ya we i naf blong wokem olgeta from we oli spesel mo oli nambawan tumas. Ol samting ya nao oli pruvum se i mas gat wan Bigman i stap we hem i waes we i waes mo i gat bigfala paoa, we hem nao i wokem olgeta samting ya. Taem wan man long wol ya i wokem wan samting, plante taem, samting ya i soemaot fasin, gudhan, no save blong man ya. Ale, long sem fasin, olgeta samting we Jeova God i wokem oli givim save long yumi long saed blong Jeova. Baebol i talem se ‘yumi no save luk ol fasin blong God stret long ae blong yumi, be hem i bin mekem ol fasin ya blong hem oli klia, blong yumi luk, long ol samting blong wol ya we hem i bin mekem.’ Mo tu, nating se skae i no save toktok, be oltaem hem i “stap talemaot bigfala paoa blong God.”—Rom 1:20; Ol Sam 19:1-4, Nyutesteman wetem Ol Sam long Bislama.

WOL YA . . . Jeova i wokem . . . man i lukaot long hem . . . man bambae i stap long hem gogo i no save finis

Taem man i wokem wan sospen no wan televisin mo kompiuta, hem i gat risen blong wokem ol samting ya. Ale tingbaot wol ya wetem ol defdefren tri mo flaoa mo anamol. Ol samting ya oli hadwok moa blong wokem. Tingbaot bodi blong yumi man we i gat plante milian milian sel* long hem we yumi no naf blong kasem save gud long olgeta. Tingbaot bren blong yumi, we fasin blong hem blong wok i nambawan tumas yumi no naf blong kasem save fulwan long hem. Sipos ol man oli wokem samting from wan risen, nating se ol samting ya we oli wokem i smol nomo skelem wetem samting we God i wokem, ale i sua se Jeova God tu i mas gat wan risen blong wokem yumi ol man wetem olgeta nambawan samting raonabaot long yumi. Ol Proveb 16:4 i soemaot se i gat risen biaen long ol samting ya: “Olgeta samting we Hae God i mekem, hem i mekem we olgeta wanwan oli gat plan blong olgeta we bambae oli mas kamtru.”

Taem Jeova i wokem wol ya hem i gat wan risen biaen long hem. Hem i talem samting ya long faswan man mo woman se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. . . . Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” (Jenesis 1:28) Faswan papa mama blong yumi, tufala i no obei long God. Taswe, taem tufala i gat pikinini mo tufala i fulumap wol, oli fulumap wol wetem ol man we oli sinman mo we oli no lukaotgud long graon wetem ol tri, flaoa mo anamol. Be, rong blong tufala i no spolem stamba tingting blong Jeova. Plante taosen yia biaen, ol man blong God oli raetem se: “Hae God . . . i wokem wol ya, . . . hem i no mekem blong i ples nating nomo.” Hem i “mekem blong man i save stap long hem.” Bambae God i no save spolem wol ya samtaem, be “wol ya, hem i blong stap oltaem nomo.” (Aesea 45:18; Prija 1:4, NW ) Stamba tingting we Jeova i gat long saed blong wol ya bambae i mas kamtru, se: “Mi talem finis we ol plan blong mi bambae oli no save foldaon, mo we bambae mi mi save mekem olgeta samting we mi mi wantem.”—Aesea 46:10.

Taswe, ol Witnes blong Jeova oli bilif se wol ya bambae i no save lus samtaem mo oli bilif se olgeta man, olgeta we oli laef wetem olgeta we oli ded, bambae oli save laef long wol ya gogo i no save finis, sipos oli mekem laef blong olgeta i laenap wetem plan blong God long saed blong wan naesfala wol. Olgeta man oli kamaot long Adam mo Iv, we tufala i sin, taswe i no gat wan man nating long wol ya we i stretgud olgeta. (Rom 5:12) Baebol i talem long yumi se: “Ol man we oli stap mekem sin, pei blong olgeta, bambae oli ded from.” “Ol man we oli laef yet oli save se bambae oli ded, be ol man we oli ded finis oli no moa save wan samting.” “Sol we i stap mekem sin—hem bambae i ded.” (Rom 6:23; Prija 9:5; Esikel 18:4, 20, NW ) ?Ale sipos oli ded, olsem wanem oli save laef bakegen blong kasem ol blesing long wol ya? Samting ya i save hapen nomo from ransom sakrefaes blong Jisas Kraes. Jisas i talem se: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.” “Ol dedman bambae oli harem voes blong mi, nao bambae oli aot long beregraon blong olgeta.”—Jon 5:28, 29; 11:25; Matiu 20:28.

?Be ol samting ya bambae oli save kamtru olsem wanem? Save long saed ya i stap long “gud nius blong kingdom,” we Jisas i stat talemaot taem hem i stap long wol. (Matiu 4:17-23, NW ) Be tede, ol Witnes blong Jeova oli talemaot gud nius ya long wan spesel rod.

*  Ol smosmol samting insaed long bodi blong man we ol man blong saens oli save luk wetem glas nomo.

WANEM BILIF BLONG OL WITNES BLONG JEOVA