Epone Kani Ipedoria Ijo Adumun Ediini Lokabeit?

1. Yesu abu kogeu ediini Loekristayone ediopet Lokabeit. Lolo da ibusakinit kojai atukot adiopet nakabeit na lukamaak Edeke Yawe. (Yokaana 4:23, 24; Ipeson 4:4, 5) Ebaibuli isisianakini ebe itunga idis bon ejaasi korot loediding loelosi toma aijar.—Matayo 7:13, 14.

2. Adwarit Ebaibuli ebe akaulo nakatwanare na ikeyakia, elomunete asisianakineta nukaisab keda aswamisio numan erasi nuka Ekristayon atukot motimot. Ingalarete itunga lueyuunak aitup kes itia Kristo. (Matayo 7:15, 21-23; Aswamisio 20:29, 30) Ngun kes iteyo oni idiinin luipu lukogelegela lukowomitos ebe ebe erasi Ikristayon. Epone ani kitiakuna oni Ikristayon lukabeit?

3. Ejenunet loepol kakere loka Ikristayon lukabeit nges lo ebe ejasi kaminanara alopet kiding kec. (Yokana 13:34, 35) Isisianakinitai kes amamus aomoom ebe ejokak kesi adepar itunga luka atekerin ace arai eraagi ece. Isisianakinitai kes bobo amamus angar itunga lukakwapin ace (Aswamisio 10:34, 35) Aso mam kes elomarete ojiesio. Ikristayon lukabeit iswamanara bonik kwape inacan keda anacan.—1 Yokana 4:20, 21.

Ikristayon lukabeit eminanara bonik, einakinotos angosibib Obaibuli, keda elimonokinete nuka Ajakanut k’Edeke

4. Ecejenunet lokediini lokabeit nges lo ebe, atupitok ke ejasi kayongit naepol noi nejai Ebaibuli. Ecamunitos nges kwape Akirot naka Edeke ido iyuunitos nu ebala. (Yokana 17:17; 2 Timoteo 3:16, 17) Eyangaritos kes Akirot Edeke kwape naepol noi adepar aomisio ka inonosio luka itunga. (Matayo 15:1-3, 7-9) Etamitos kes aitolot aijar kec kangin paran kere kotupitos Ebaibuli. Mam kes elimonokinete idio ibore ido komam iswamayete.—Tito 1:15, 16.

5. Ibusakinit ediini lokabeit ayinakit ekiror k’Edeke aibuses. (Matayo 6:9) Abu Yesu kitejena ekiror Edeke, Yawe, neajasi luce. Ikristayon lukabeit ibusakinit aswam kwape kwangin. (Yokana 17:6, 26; Iromayon 10:13, 14) Lukangai itunga lukatutubetkon luelimonokinete luce tunga ekiror k’Edeke?

6. Ikristayon lukabeit ibusakinit alimonokin nuka Ajakanut k’Edeke. Yesu iswamat kwangin. Enerenena nges duc duc nuka Ajakanut. (Luka 8:1) Kicorakinit nges ikesisiak alimonokin akiro ngupengun airiamun akwap kere. (Matayo 24:14; 28:19, 20) Ikristayon lukabeit iyuunitos ebe Ajakanut naka Edeke bon nges eyauni ainapakin ka ayuwara toma akwap na.—Isabulin 146:3-5.

7. Isiasiak ke ka Yesu ibusakinit omam erasi lukakwap kanaronon. (Yokana 17:16) Mam kes elomarete toma akiro nuka apugan arai opegeta luka itunga. Inacitos kes iponesio, aswamisio, keda aomisio nuimusugete luetapit kotoma akwap. (Yakobo 1:27; 4:4) Ipedori ijo atiakun ediini katutubet kon loejasi ka ijenuneta nuka Ekristayone lokabeit?

Copyright © 2008 Watch Tower Bible and Tract Society of Pennsylvania. All rights reserved.