Ayapikin Edeke Kotoma Ailip

1. Ailip nges einer kede Edeke kaiyapapara. Ibusakinit ijo ailipenen nejaai Edeke ducduc. Aso iyapikin do ijo nges kwape opapero lomunot. Yawe epol ido egongong konye epupi nges alipasinei wok! Ilipenenei ijo nejaai Edeke ducduc?—Isabulin 65:2; 1 Isesalonikan 5:17.

2. Ailip nges atutubet kaimaawok. Aso ibusakinit oni ailip nejaai Edeke, Yawe Bon. Neajaar Yesu toma akwap, elipi neajaai Papake mere neajaai ice. Ibusakinit oni aswam kwangin. (Matayo 4:10; 6:9) Konye alipasinei wok kere ibusakinit alimun kokiror Yesu. Itoduni ne ebe iyongit oni adoketai Yesu kede kijaai ka aiyuun nejaai alucet ke.—Yokana 14:6; 1 Yokana 2:1, 2.

3. Ne kilipia ibusakinit oni einer kede Edeke kotawon wok. Mam ibusakinit oni aitunun alipasinei karaida aisiom kotabo loka alipasinei. (Matayo 6:7, 8) Ipedori oni ailip odiopone kere litodunit ayongit, edio sawa kede angin bosit. Edeke epedori apupun alipasinei nukayeya kotawon wok. (1 Samuel 1:12, 13) Ejok adumun abosit naililingi nelwakatar icetunga nekinerar alipasinei wok.—Marako 1:35.

4. Anyoika akiro nu ipedoria ijo ailip? Ngin ibore kere yen emunari epaperone kon ka Edeke. (Ipilipin 4:6, 7) Alipasit nakejakait wok itodunit akiro nu ipedoria oni ailip, kwanat nuikamunitos ekiror Yawe kede aketemokinet. Kipedori bobo oni ailip kanuka iboro lukakuwan, aitimiyo adiakanareta wok, alakunio kacodunio. (Matayo 6:9-13) Alipasinei wok mam ekoto ibitioko, ibusakinit oni ailip iboro lukiriamara kede akote Edeke.—1 Yokana 5:14.

5. Ipedori ijo ailip ne ijukakinitor ijo ekonitau asialamikin araai aitur Edeke. (1 Aisiitonokin 29:10-13) Ibusakinit ijo ailip nekijaar atiokisio kede nekitemere akoniyuun. (Isabulin 55:22; 120:1) Ejok ailip eroko enyama inyamet. (Matayo 14:19) Isukunyunit Yawe oni ailip “apakio kere.”—Ipeson 6:18.

6. Ekoto oni ailip araai iswamat oni adiakar naepol. Kosawa kangol ibusakinit oni aingainga Yawe kanuka akesianut kede aitim. Kilimo oni adiakanaretawok nejaai ngesi kasodete aswam nuipedori kere mam bobo anyogoikin, Edeke “itemokino aisioni.”—Isabulin 86:5; Awaragasia 28:13.

7. Yawe epupi alipasinei kitunga kaluedolitos bon. Kanu Edeke apupun alipasineikon, ibusakinit ijo aiboi kanuka ikekisila. (Awaragasia 15:29; 28:9) Ibusakinit ijo aiyapapara kilipi. (Luka 18:9-14) Ibusakinit ijo aswam kwape kilipitor. Itoduni do ijo ebe ijaasi ka aiyuun kede ilosikinit nu inera. Opone kangol bon nges epupuna Yawe alipasinei kon.—Iburanian 11:6.

Copyright © 2008 Watch Tower Bible and Tract Society of Pennsylvania. All rights reserved.