Zeitindah A Hmaanmi Biaknak Cu Na Hmuh Khawh Lai?

1. Jesuh nih a hmaanmi Khrihfa biaknak pakhat a rak thawk. Cucaah nihin ah Jehovah Pathian a hmaan tein a biami bukhat lawng a um lai. (Johan 4:23, 24; Efesa 4:4, 5) Baibal nih nunnak lei a kalmi lam bi chungah mi tlawmte lawng an um tiah a cawnpiak.—Matthai 7:13, 14.

2. Baibal nih lamkaltu hna thih hnuin, a hmaanlomi cawnpiaknak le Khrihfa he aa tlak lomi tuahsernak hna kha duhsah tein Khrihfabu chungah a ra lut te lai tiah a rak chimchung cang. Mi nih zumtu hna kha Bawi Khrih canah anmah zulh dingin an hruai hna lai. (Matthai 7:15, 21-23; Lamkaltu 20:29, 30) Cu ruang ahcun Khrihfa kan si aa timi biaknak dangdang tampi kan hmuhmi hi a si. Zeitindah a hmaanmi Khrihfa cu kan thleidan khawh hna lai?

3. A hmaanmi Khrihfa hmelchunhnak a lang bikmi cu anmah lakah dawtnak an ngei. (Johan 13:34, 35) Annih cu mi phundang le cuar phundang hna nakin an ṭha deuh tiah ruah awkah cawnpiak an si lo. Ram dang i mi phundang pawl zong huat dingin cawnpiak an si ve lo. (Lamkaltu 10:34, 35) Cucaah raldohnak ah an i tel lo. A hmaanmi Khrihfa hna nihcun pakhat le pakhat kha unau chuak ṭi bantukin an i hmuh.—1 Johan 4:20, 21.

A hmaanmi Khrihfa hna cu pakhat le pakhat an i daw, Baibal kha an upat i, Pathian Pennak kong kha an chim

4. A hmaanmi biaknak hmelchunhnak dang pakhat cu, a chung ummi hna nih Baibal upatnak an ngei taktak. Pathian Bia in an cohlan i a chimmi kha an zumh. (Johan 17:17; 2 Timote 3:16, 17) Minung ruahnak le phunglam hna nak in Pathian Bia kha biapi deuh in an ruah. (Matthai 15:1-3, 7-9) Ni fate an nunnak ah Baibal ning tein nun an i zuam. Cucaah an cawnpiaknak phundang, cun an tuahsernak phundang in an nung lo.—Titas 1:15, 16.

5. A hmaanmi biaknak nihcun Pathian min zong an upat ve lai. (Matthai 6:9) Jesuh nih Pathian min, Jehovah, cu midang kha a rak hngalhter hna. A hmaanmi Khrihfa hna nih cucu an tuah ve awk a si. (Johan 17:6, 26; Rom 10:13, 14) Nan umnak hrawng i Pathian min midang a chimtu hna cu ahote dah an si?

6. A hmaanmi Khrihfa hna nihcun Pathian Pennak kong kha an chim lai. Jesuh zong nih a rak chim ve. Pennak kong lawngte kha a rak chim zungzal. (Luka 8:1) Amah hnu zultu pawl kha hi kong hi vawlei dihlak ah chim awk in nawl a pek hna. (Matthai 24:14; 28:19, 20) A hmaanmi Khrihfa hna nih Pathian Pennak lawng nih hi vawlei ah a hmaanmi daihnak le himnak a chuahter te lai tiah an zumh.—Salm 146:3-5.

7. Jesuh hnu zultu pawl cu hi vawlei hawikawm an si lai lo. (Johan 17:16) Vawlei nainganzi ah le phunkhat le phunkhat ralnak ah an i tel ve lo. Vawlei i mi tampi nih an tuahmi, mi harnak a pemi ziaza, tuahsernak, le lungputning kha an hrial dih hna. (Jeim 1:27; 4:4) Nan umnak hmun chungah hi a hmaanmi Khrihfa phung hmelchunhnak a ngeimi biaknakbu pakhat cu nan thleidang kho hna maw?

Copyright © 2008 Watch Tower Bible and Tract Society of Pennsylvania. All rights reserved.