Pathian Nih A Huatmi Tuahsernak Hna - Jehovah Hngaltu hna: Watchtower Society Tazavun Web Site

Jehovah Hngaltu hna: Watchtower Society Tazavun Web Site

Beliefs

Future

Pathian Nih Zeidah A Kan Hal?

Cawnnak 10

Pathian Nih A Huatmi Tuahsernak Hna
	Pathian nih a ṭha lo a timi thil hna kongah zeitindah na ruah lai? (1)
	Zeibantuk nu le pa sinak he aa pehtlaimi ziaza hna dah a hmaan lo? (2)
	Khrihfa pakhat nih lihchimnak (3), phe kahnak (3), firnak (3) zangennak (4), khuachia thiamnak (5), le zu ritnak (6)
	hna cu zeitindah a hmuh awk an si? Mi pakhat nih aṭhalomi tuahsernak kha zeitindah a hlawt khawh lai? (7)

1. Pathian sal hna nih a ṭhami kha an duh. Sihmanhsehlaw a ṭha lomi huat zong kha an cawn ve awk a si. (Salm 97:10) Cucu Pathian nih a huatmi tuahsernak hna kha an hrial lai tinak a si. Khi tuahsernak cheukhat hna cu zeidah an si?

2. Nu le pa Sualnak: I ṭhitum hlan i nu le pa sinak, zuanzamnak, saram he sualnak, thi aa naihmi he sualnak, le pa le pa-nu le nu sualnak hna cu Pathian ralchan in sualnak nganpi an si. (Levitikas 18:6; Rom 1:26, 27; 1 Korin 6:9, 10) Nu-pa pahnih cu i ṭhit taktak ṭung lo in hmunkhat ah an um ṭi ahcun, an i ṭhen ṭhan awk a si, asiloah upadi ning tein an i ṭhit awk a si.—Hebru 13:4.

Pathian nih zuritnak, firnak, phekahnak, le zangennak hna kha a huat

3. Lihchim, Phekah, Firnak: Jehovah Pathian cu lih a chim kho lo. (Titas 1:2) Amah lungton a duhmi hna nih lihchim cu an hrial hrimhrim lai. (Phungthlukbia 6:16-19; Kolose 3:9, 10) Phekahnak phun paohpaoh cu hakkauhnak nih a thurhnomhter dihmi a si. Cucaah Khrihfa hna nihcun zeibantuk phun phekahnak hmanhah, awngbali, rang tlik zuamnak, bingo tibantuk vialte ah an i tel ve lo. (Efesa 5:3-5) Cun Khrihfa hna cu an fir fawn lo. Firmi thil asiloah a nawl hmuh loin an lakmi thil hna kha hngal na ko in cun an caw lo.—Exodus 20:15; Efesa 4:28.

4. Thinhunnak, Zangennak: Sum khawh loin thinhunnak nih zangennak in rian ṭuannak ah a hruai khawh. (Genesis 4:5-8) Zangen hmangmi pakhat cu Pathian hawikom a si kho lai lo. (Salm 11:5; Phungthlukbia 22:24, 25) Phuhlam le mi nih kan cungah an tuahmi thil ṭhalo caah ṭhatlonak in lehrulh cu a hmaan lo.—Phungthlukbia 24:29; Rom 12:17-21.

5. Camhthiamnak le Khuachia Thiamnak: Mi cheukhat nih zawtnak damter awkah khuachia ṭhawnnak kha an i bochan. Midang nih an ral hna kha zawtter awkah le thah awk tiang hmanh ah an eih hna. Hi tuahsernak vialte hnulei in a ummi ṭhawnnak cu Satan a si. Cucaah Khrihfa hna cu hi hna lak i zeihmanhah an i tel hrimhrim lai lo. (Deuteronomi 18:9-13) Jehovah he naih tein umnak cu midang nih kan cungah an tuahmi camhnak le eihnak vialte in khamhnak ṭha bik a si.—Phungthlukbia 18:10.

6. Zu Ritnak: Zu, beer, zureu phun dangdang tlawmpal din cu a sual lo. (Salm 104:15; 1 Timote 5:23) Sihmansehlaw zu tam tukin din le rit cu Pathian mithmuh ah a sual. (1 Korin 5:11-13; 1 Timote 3:8) Zu tam tuk in dinnak nih na ngandamnak kha a hrawh khawh i na innchungkhar zong hnahnawhnak a pek khawh. Tukforhnak dang vialte zong khulrang tein naa teiter khawh.—Phungthlukbia 23:20, 21, 29-35.

7. Pathian nih a ṭhalo a timi thil hna a tuahmi cu “Pathian pennak an co lai lo.” (Kalati 5:19-21) Pathian kha na dawt taktak i a lung lawmhter na duh ahcun, hi tuahsernak vialte cu na hlawt khawh ko lai. (1 Johan 5:3) Pathian nih a ṭhalo a timi huat kha cawng. (Rom 12:9) Pathian ziaza a ngeimi hna he i kawm. (Phungthlukbia 13:20) Khrihfa nutling patling hawikawm hna cu bawmtu ṭha an si kho. (Jeim 5:14) Zeidang vialte lengah, Thlacamnak thawngin Pathian bawmhnak kha i bochan.—Filipi 4:6, 7, 13.

1996 ah chuah a si
Copyright © 2008 Watch Tower Bible and Tract Society of Pennsylvania. All rights reserved.