Thlacamnak in Pathian sin Naihnak

1. Thlacamnak cu toidawr tein Pathian sinah biachim khi a si. A zungzalin Pathian sinah thla cu na cam lengmang awk a si. Cubantukin dawtmi hawikawm sin bang amah he naih tein ka um tiah na ruah khawh lai. Jehovah cu a lianngan i a ṭhawng tuk hringhran nain kan thlamcamnak kha a kan ngaih piak ko! Pathian sinah a zungzalin thla na cam maw?—Salm 65:2; 1 Thesalon 5:17.

2. Thlacamnak cu kan biaknak a si ve. Cucaah Jehovah Pathian sin lawng ah thla cu kan cam awk a si. Jesuh vawlei cung a rak um lioah khan, midang aho sin hmanh ah si loin, a Pa sin lawngah thla a rak cam zungzal. Kanmah zong mahticun kan tuah ve awk a si. (Matthai 4:10; 6:9) Asinain kan thlacamnak vialte cu Jesuh min lawngin chim ding a si. Mah nihcun Jesuh a dirhmun kha kan upat i tlanhnak man in a thawinak kan zumh ti kha a langhter.—Johan 14:6; 1 Johan 2:1, 2.

3. Thla kan cam tikah kan lungthin taktakin Pathian sinah bia kan chim lai. Kan i chingchiahmi chim in thlacamnak a si lai lo, cauk chung zongin kan rel fawn lai lo. (Matthai 6:7, 8) Zeibantuk upatnak umtuning paoh in, zeitik caan paoh ah le khoika hmun paoh ah thla cu kan cam khawh. Kan lung chungin kan chimmi aw chuah loin thlacamnak hmanh Pathian nihcun a theih khawh ko hna. (1 Samuel 1:12, 13) Kan pumpak thlacamnak tuah awkah midang sinin a hlatnak, a daihnak hmun hmuh khawh ahcun a ṭha.—Marka 1:35.

4. Zeibantuk kong hna caah dah thla na cam khawh? Amah he i hawikawmhnak a thleng kho hngami zei kong paoh caah. (Filipi 4:6, 7) Zohchunh awk a simi thlacamnak nih Jehovah a min le a timhnak kongah thla kan cam awk a si ti a langhter. kan herhmi thil a kan pek nakhnga, kan sualnak a kan ngaihthiam nakhnga, le tukforhnak tei awkah bawmhnak kan hal khawh. (Matthai 6:9-13) Kan thlacamnak cu kanmah ca lawng a si awk a si lo. Pathian duhnak he aa tlakmi thil ca lawngah thla cu kan cam awk a si.—1 Johan 5:14.

5. Na lung nih Pathian lawmh le thangṭhat a duh lio zeitikcan paoh ah thla cu na cam khawh. (1 Chanrelnak 29:10-13) Harnak na ton i na zumhnak hneksak del a si tik zongah thla na cam awk a si. (Salm 55:22; 120:1) Rawl na ei hlan zongah thlacam cu a ṭha. (Matthai 14:19) Jehovah nih “zeitik caan paoh ah” thlacam a kan sawm.—Efesa 6:18.

6. Sualnak nganpi hna kan tuah sual ahcun thlacam kan herh khun. Cubantuk tik ahcun Jehovah kha zangfahnak le ngaihthiamnak kan hal lai. Kan sualnak kha a sinah kan phuan i tuah ṭhan ti lo dingin fakpiin kan i zuam a si ahcun, Pathian cu “ngaihthiam awkah timh cia” a si ko.—Salm 86:5; Phungthlukbia 28:13.

7. Jehovah nih miding mi hna an thlacamnak lawng a theihpiak hna. Na thlacamnak kha Pathian nih an theihpiak nakhnga, a nawlbia ning tein nun khawh fakpiin naa zuam awk a si. (Phungthlukbia 15:29; 28:9) Thla na cam tik ah toidawrnak na ngeih awk a si. (Luka 18:9-14) Na thlacamnak he aa tlakin na nun awk a si. Mah tik ahcun zumhnak na ngei i, na chimmi kha na duh taktak ti na langhter lai. Mah tik lawng ahcun Jehovah nih na thlacamnak cu an leh lai.—Hebru 11:6.

Copyright © 2008 Watch Tower Bible and Tract Society of Pennsylvania. All rights reserved.