Mɛni Ji Nyɔŋmɔ Yiŋtoo Kɛha Shikpɔŋ Lɛ?

1. Yehowa bɔ shikpɔŋ nɛɛ koni adesai anyɛ ana emli shihilɛ mli ŋɔɔmɔ kɛya naanɔ. Eesumɔ ni jalɔi ni yɔɔ miishɛɛ ahi shikpɔŋ nɔ be fɛɛ be. (Lala 115:16; Yesaia 45:18) Akpataŋ shikpɔŋ lɛ hiɛ kɔkɔɔkɔ; ebaahi shi kɛya naanɔ.—Lala 104:5; Jajelɔ 1:4.

2. Dani Nyɔŋmɔ aaabɔ gbɔmɔ lɛ, E-hala shikpɔŋ lɛ fã fioo ko ni efee lɛ paradeiso fɛfɛo. Etsɛ lɛ Eden abɔɔ. Biɛ ji he ni ekɛ klɛŋklɛŋ nuu kɛ yoo, Adam kɛ Hawa wo. Nyɔŋmɔ to yiŋ eha amɛ akɛ amɛfɔ bii ni amɛyi shikpɔŋ nɔ obɔ. Kulɛ amɛbaafee shikpɔŋ nɔ fɛɛ paradeiso fiofio.—1 Mose 1:28; 2:8, 15.

Paradeiso ni elaaje

3. Adam kɛ Hawa fee esha kɛtsɔ gbɛ ni amɛje amɛgbo Nyɔŋmɔ mla nɔ toi lɛ nɔ. No hewɔ lɛ, Yehowa jie amɛ kɛje Eden abɔɔ lɛ mli. Paradeiso laaje. (1 Mose 3:1-6, 23) Shi Yehowa hiɛ kpako eyiŋtoo ni eyɔɔ kɛha shikpɔŋ nɛɛ nɔ. Ewo shi akɛ ebaafee lɛ paradeiso, he ni adesai baahi kɛya naanɔ. Mɛɛ gbɛ ebaatsɔ efee enɛ?—Lala 37:29.

4. Dani shikpɔŋ nɛɛ baanyɛ atsɔ paradeiso lɛ, esa akɛ ajie mɛi fɔji kɛje nɔ. (Lala 37:38) Enɛ baaba yɛ Harmagedon, ni ji Nyɔŋmɔ ta ni ekɛbaafo efɔŋ feemɔ sɛɛ lɛ mli. No sɛɛ lɛ, abaawo Satan tsuŋ afii 1,000. Enɛ tsɔɔ akɛ mɔ fɔŋ ko kwraa eshwɛŋ ni baafite shikpɔŋ lɛ. Nyɔŋmɔ webii pɛ ayi baana wala.—Kpojiemɔ 16:14, 16; 20:1-3.

5. Kɛkɛ lɛ, Yesu Kristo baaye nɔ akɛ Maŋtsɛ yɛ shikpɔŋ nɛɛ fɛɛ nɔ yɛ nakai afii 1,000 lɛ mli. (Kpojiemɔ 20:6) Ebaajie esha kɛjɛ wɔ jwɛŋmɔi kɛ gbɔmɔtsei amli fiofio. Wɔbaatsɔmɔ adesai ni eye emuu tamɔ bɔ ni Adam kɛ Hawa ji dani amɛfee esha lɛ. Kɛkɛ lɛ hela, gbɔlɛ, kɛ gbele ehiŋ shi dɔŋŋ. Abaatsa helatsɛmɛi, ni mɛi ni egbɔlɔ baatsɔmɔ obalahii kɛ obalayei ekoŋŋ.—Hiob 33:25; Yesaia 33:24; Kpojiemɔ 21:3, 4.

6. Yɛ Yesu Afii Akpe Nɔyeli lɛ mli lɛ, adesai anɔkwafoi baatsu nii koni amɛkɛha shikpɔŋ muu lɛ fɛɛ atsɔ paradeiso. (Luka 23:43) Agbɛnɛ, abaatee mɛi akpekpei abɔ ni egboi lɛ ashi kɛba adesai awala shihilɛ mli yɛ shikpɔŋ nɔ. (Bɔfoi lɛ Asaji 24:15) Kɛ amɛfee nɔ ni Nyɔŋmɔ biɔ kɛjɛɔ amɛ dɛŋ lɛ, amɛbaaya nɔ amɛhi shikpɔŋ nɔ kɛya naanɔ. Kɛ jeee nakai lɛ, abaakpata amɛhiɛ kɛya naanɔ.—Yohane 5:28, 29; Kpojiemɔ 20:11-15.

7. No hewɔ lɛ Nyɔŋmɔ klɛŋklɛŋ yiŋtoo kɛha shikpɔŋ lɛ baaye omanye. Ani obaasumɔ ni ona wɔsɛɛ be mli jɔɔmɔi nɛɛ amli gbɛfaŋnɔ? Kɛ nakai lɛ, ehe miihia ni oya nɔ okase Yehowa he nii ni ofee toiboo oha etaomɔ nii. Kpeei ni oooya yɛ Yehowa Odasefoi a-Maŋtsɛyeli Asa nɔ lɛ baaye ebua bo koni ofee nakai.—Yesaia 11:9; Hebribii 10:24, 25.

Yɛ Harmagedon sɛɛ lɛ, abaafee shikpɔŋ lɛ paradeiso

Copyright © 2008 Watch Tower Bible and Tract Society of Pennsylvania. All rights reserved.