Yehowa Odasefoi—Namɛi Ni? Mɛni Amɛheɔ Amɛyeɔ?

Mɛni Amɛheɔ Amɛyeɔ?

YEHOWA ODASEFOI heɔ Nyɔŋmɔ Ofe lɛ, ni ji Yehowa, ŋwɛi kɛ shikpɔŋ Bɔlɔ lɛ amɛyeɔ. Shihilɛ mli diɛŋtsɛ ní jeŋ muu fɛɛ ní ebɔle wɔ lɛ mli nibii ni yɔɔ naakpɛɛ ní ato he gbɛjianɔ yɛ gbɛ ni yɔɔ hwanyaŋŋ nɔ lɛ yɔɔ lɛ tsɔɔ faŋŋ akɛ, Bɔlɔ ko ni nilee nɔ kwɔ fe fɛɛ, ní eyɔɔ hewalɛ hu ji mɔ ni fee fɛɛ. Taakɛ bɔ ni hii kɛ yei anitsumɔi jieɔ amɛsui akpo lɛ, nakai nɔŋŋ Yehowa Nyɔŋmɔ hu ji. Biblia lɛ kɛɔ wɔ akɛ “ehe nii ni anaaa . . . lɛ, kɛjɛ jeŋ bɔɔ mli beebe lɛ atsɔɔ enii ni efee lɛ anɔ ayɔseɔ ni anaa faŋŋ.” Agbɛnɛ hu, “ŋwɛi gbaa Mawu anunyam lɛ,” shi jeee kɛtsɔ gbee loo wiemɔi anɔ.—Romabii 1:20; Lala 19:2-5.

SHIKPƆŊ LƐ . . . mɔ ní bɔ ji Yehowa . . . mɛi ní kwɛɔ nɔ ji adesai . . . abaahi nɔ kɛya naanɔ

Gbɔmɛi eshɔ̃ɔɔ su nii loo amɛfeee tɛlivishiŋ kɛ kɔmpiutai efolo kɛkɛ ní yiŋtoo ko bɛ sɛɛ. Shikpɔŋ lɛ kɛ enɔ nibɔɔ nii ni ji tsei kɛ kooloi ní wala yɔɔ amɛmli yɛ naakpɛɛ kwraa fe enɛɛmɛi. Bɔ ni afee adesa gbɔmɔtso lɛ aha kɛ emli wala yibii akpekpei toi akpekpei abɔ lɛ tekeɔ bɔ ni wɔjwɛŋmɔ baanyɛ ashɛ he—ansɔ ní wɔkɛjwɛŋɔ lɛ po yɛ naakpɛɛ fe bɔ ni wɔbaanyɛ wɔnu shishi! Kɛ́ gbɔmɛi yɛ yiŋtoo yɛ amɛnibii ní he ehiaaa ní amɛfeɔ lɛ asɛɛ lɛ, no lɛ eka shi faŋŋ akɛ Yehowa Nyɔŋmɔ yɛ yiŋtoo yɛ enibɔɔ nibii ni yɔɔ naakpɛɛ lɛ asɛɛ! Abɛi 16:4 lɛ kɛɔ akɛ: “Nɔ fɛɛ nɔ ni Yehowa fee lɛ, yɛ nɔ̃ hewɔ ní efee.”

Yehowa fee shikpɔŋ lɛ yɛ yiŋtoo ko hewɔ, taakɛ ejaje etsɔɔ klɛŋklɛŋ adesai enyɔ lɛ, akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ . . . , ni nyɛyea ŋshɔŋlooi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” (1 Mose 1:28) Akɛni amɛtsɔmɔ toigbolɔi hewɔ lɛ, nɛkɛ mɛi enyɔ nɛɛ nyɛɛɛ awo shikpɔŋ lɛ obɔ kɛ jalɔi awekui ní baajɛ suɔmɔ mli amɛkwɛ shikpɔŋ lɛ kɛ enɔ kwɛ̃ɛ nii kɛ kooloi lɛ anɔ. Shi omanye ní amɛyeee lɛ haaa Yehowa yiŋtoo lɛ afee efolo. Afii akpei abɔ sɛɛ lɛ, aŋma akɛ: “Nyɔŋmɔ, mɔ ni shɔ̃ shikpɔŋ lɛ . . . , ebɔɔɔ lɛ efolo.” “Eshɔ̃ lɛ ní ahi nɔ.” Akpataaa hiɛ, shi moŋ “shikpɔŋ lɛ hiɔ shi kɛyaa naanɔ.” (Yesaia 45:18; Jajelɔ 1:4, The New English Bible) Yehowa yiŋtoo kɛha shikpɔŋ lɛ baaba mli: “Miyiŋtoo lɛ aaaba mli, ni nibii fɛɛ ni sa mihiɛ lɛ mafee!”—Yesaia 46:10.

No hewɔ lɛ, Yehowa Odasefoi heɔ yeɔ akɛ shikpɔŋ lɛ baahi shi kɛya naanɔ, ni ákɛ gbɔmɛi fɛɛ, mɛi ní yɔɔ wala mli kɛ mɛi ní egboi, ní baafee mɛi ni kɛ Yehowa yiŋtoo kɛha shikpɔŋ ni nɔ yɔɔ fɛo, ní ahiɔ nɔ lɛ kpãa gbee lɛ baahi nɔ kɛya naanɔ. Adesai fɛɛ ná emuu ní ayeee lɛ yɛ fɔmɔ mli kɛtsɔ Adam kɛ Hawa nɔ, no hewɔ lɛ, eshafeelɔi ji amɛ. (Romabii 5:12) Biblia lɛ kɛɔ wɔ akɛ: “Esha dɛŋ nyɔmɔwoo lɛ gbele ni.” “Hiɛkalɔi le akɛ amɛbaagboi; shi gbohii lɛ, amɛleee nɔ ko nɔ ko.” “Susuma ni feɔ esha lɛ, lɛ nɔŋŋ eeegbo!” (Romabii 6:23; Jajelɔ 9:5; Ezekiel 18:4, 20) Belɛ te amɛaafee tɛŋŋ amɛhi wala mli ekoŋŋ ní amɛná shikpɔŋ nɔ jɔɔmɔi lɛ amli gbɛfaŋnɔ? Kɛtsɔ Kristo Yesu kpɔmɔ afɔleshaa lɛ pɛ nɔ, ejaakɛ ekɛɛ akɛ: “Mi lɛ miji shitee lɛ kɛ wala lɛ; mɔ ni heɔ minɔ eyeɔ lɛ, kɛji egbo tete lɛ, ehiɛ aaakã.” “Mɛi fɛɛ ni yɔɔ gbohii abui lɛ amli lɛ aaanu egbee, ni amɛaaje kpo.”—Yohane 5:28, 29;11:25; Mateo 20:28.

Mɛɛ gbɛ nɔ enɛ aaatsɔ aba? Átsɔɔ mli yɛ “maŋtsɛyeli lɛ he sanekpakpa lɛ” ní Yesu bɔi shiɛmɔ beni eyɔɔ shikpɔŋ nɔ lɛ mli. (Mateo 4:17-23) Shi Yehowa Odasefoi miishiɛ sanekpakpa lɛ ŋmɛnɛ yɛ gbɛ krɛdɛɛ ko nɔ.

NƆ NI YEHOWA ODASEFOI HEƆ YEƆ