Ko Akonaki Ti Mo Aga’i Fenua e Se Mālie Ki Le Atua

Ko le Atua e se ko se Tasitolu

1. E se veli a akonaki fuli ti mo aga’i fenua fuli. Kae e se tali e le Atua a akonaki ti mo aga’i fenua alā e to’o mei le lotu sala pe fakafesagai ki akonaki o le Tosi-Tapu.–Mateo 15:6.

2. Le Tasitolu: Ko Seova e ko se Tasitolu koia–ko ipotasi e tolu kae ko le Atua fa’i e tasi? Le’ai! Ko Seova, le Tamana, e ko le “Atua mā’oki fu’ai e tasi.” (Soane 17:3, Tausi Fo’ou Faka-Futuna; Maleko 12:29) Ko Sesu e ko Lona ’uluaki Vosa, ti e fakalogo ki le Atua. (1 Kolinito 11:3) Ko le Tamana e lasi ake i le Alo. (Soane 14:28) Ko le laumalie mā’oki’oki e se ko se ipotasi, kae e ko le makeke ga’oi o le Atua.–Senesi 1:2; Tosi Gaoi 2:18.

Ko le Po Tapu ti mo le Pāsikate e ’au mei lotu sala afea

E se tonu ke tou tausi ki le kau mate ti mo ī ki lātou

3. Le Po Tapu Ti Mo Le Pāsikate: Na se tupu Sesu i le aso 25 o Tesepeli. Na lagi tupu i le aso 1 o Okotopeli, i le temi leia na le’ole’o po’uli ai e tagata tausi manu alātou manu i fafo. (Luka 2:8-12) Na le’aise temi na fakatotonu ai e Sesu ke fakamanatu’i lona aso tupu. Kae na pati ake a ia ki ana tisipulo ke lotou fakamanatu lona aso mate. (Luka 22:19, 20) Ko le Po Tapu ti mo ona agaaga fuli, e ’au mei lotu sala afea. E toe mā’oki foki le potu leia o uiga mo aga e fai i le Pāsikate, o fai pe le faka’aoga’i o fā fua’i moa ti mo lapino. Ko le kau ’uluaki Kilisiteano na se lotou fai le Po Tapu pe ko le Pāsikate, o toe fela’aki ai fa’i mo le kau Kilisiteano mā’oki o le temi nei.

4. Le Aso Tupu: E māsau le Tosi-Tapu ki le fakamanatu o aso tupu e lua, ti na fai e fenua na se tausi kia Seova. (Senesi 40:20-22; Maleko 6:21, 22, 24-27) Ko le kau ’uluaki Kilisiteano na le’aise lotou fakamanatu se aso tupu. Ko le agamasani leia ko le fakamanatu o le aso tupu e ’au mei lotu sala afea. E soli e le kau Kilisiteano mā’oki ni ne’a alofa ti mo lotou fakafiafia fakatasi i se tasi ake temi o le fētu’u.

5. Le ī Ki Le Kau Mate: Ko le kau mate e se mafai ke lotou fai se ne’a pe lotou logo’i ni ne’a. E se mafai ke tou tokoi kia lātou, ti e se mafai ke lotou fakamamae’i tātou. (Pesalemo 146:4; Ekelesiasi 9:5, 10) E mate le nefesi; e se toe soko atu lona ma’uli mokā mate. (Esekiele 18:4) Kae i ’iki a temi, ko le kau ’aselo agaveli, leia e igoa ko le kau temonio, e lotou loi’i le kakai ko lātou ko laumalie o le kau mate. E sala a aga’i fenua fuli alā e ma’ua ai le ī ki le kau mate pe ko le tausi ki le kau mate.–Esaia 8:19.

6. Le Koluse: Na le’aise mate Sesu i se koluse, kae na tutuki ki le pou la’akau. Ko le kupu faka Keleka leia na fakaliliu ai le kupu “koluse” i le Tosi-Tapu, e fakauiga fa’i ki le potu’i la’akau e tasi. Ko le fakatātā o le koluse e ’au mei lotu sala afea. Na le’aise faka’aoga’i ti na le’aise tausi a ’uluaki Kilisiteano ki se koluse. Koia, i lakotou manatu-la e tonu koia ke faka’aoga’i se koluse i le tausi leia ki le Atua?–Tetelonome 7:26; 1 Kolinito 10:14.

7. E lagi faigata’a ki ni’iki kakai a le ti’aki o akonaki ti mo aga’i fenua anā. E lagi fefai loa okotou kāiga ti mo okotou kaune’a ke auana koutou ti’aki anā akonaki-la. Kae e mā’uiga ake ke mālie’ia tātou e Seova i sotātou fia mālie ki se tagata.–Taagapati 29:25; Mateo 10:36, 37.

Copyright © 2006 Watch Tower Bible and Tract Society of Pennsylvania. All rights reserved.