Ko Ai Le Tiapolo?

1. E fakauiga a le kupu “Tiapolo” ki se tasi e fatitu’u o uiga mo se tasi kese. E fakauiga a le kupu “Satana” ki se fili pe ko se tasi e fakafesagai. Ko kupu anā na soli ki le fili lasi o le Atua. ’Uluaki, na ko ia ko le ’aselo saosaoa o le Atua i le lagi. Kae ki muli ake, na fia ne’alasi ti na loto ki le tausi leia e tonu ke fai ki le Atua.–Mateo 4:8-10.

2. Na faka’aoga’i e le ’aselo lenā le gata ke māsau ai kia Eva. Na fai ake e ia ni loi ki le fafine, ti na patigata’a ai a ia ki le Atua. Koia na osofi ai e Satana le “pule faitalisa,” pe ko le tu’ulaga Tau’aluga o le Atua. Na pati e Satana e veli a le takitaki a le Atua ti e fufū e ia a ne’a mālilie ki le fenua. Na toe pati e Satana e le’aise tasi e ma nofo agatonu ki le Atua. I lana fai fena’aki, na liliu ai Satana ko le fili o le Atua. Koia loa leia na fakaigoa’i a ia ko Satana le Tiapolo.–Senesi 3:1-5; Sopo 1:8-11; Apokalipisi 12:9.

3. E faiga’i e Satana ke ’aga a ia o fakaneke le fenua ke atolasio ake kiate ia. (2 Kolinito 11:3, 14) Ko le ne’a e faka’aoga’i e ia mo kākā’i o le fenua e ko le lotu sala. Kapau e ako’i e se lotu ni loi o uiga mo le Atua, e tausi mā’oki a ia kia Satana. (Soane 8 :44) Ko fenua alā e kau ki ni lotu sala, e lagi lotou tui fakamalotoloto e lotou tausi ki le Atua mā’oki. Kae e lotou tausi mā’oki kia Satana. Ko ia ‘ko le atua o le malama leinei.’–2 Kolinito 4:4.

E fakasēsē le fenua e le lotu sala, e le faifakalaula’akau, ti mo le tausi fakavale ki le fenua

4. Ko le faifakalaula’akau ko le tasi lenā ne’a e faka’aoga’i e Satana mo kākā’i o le fenua. E mafai ke lotou kalaga’i ni laumalie mo puipui o lātou, mo fakamamae’i ni’iki, mo fakasā o le ne’a ka soko, ti mo fakasoko ni milakulo. Ko Satana a le makeke fakapulipuli a leia e ’aga o fakaneke a ne’a anā. Ke mālie’ia tātou e le Atua, e tonu ke tou fakamama’o mei ne’a faifakalaula’akau.–Tetelonome 18:10-12; Tosi Gaoi 19:18, 19.

5. E toe kākā’i e Satana le fenua aki se fakamā’uiga’i fakavale o se fenua ti mo le tausi ki kautasi faka politike. E pati fa’i a ’iki ko lolātou fenua pe ko lolātou lanu leia e mālie ake i ni’iki. Kae e se mā’oki lenā le potu-la. (Tosi Gaoi 10:34, 35) Ko ’iki fenua e lotou fānaki ki kautasi faka politike mo fakatokatoka o visia o le tagata. I lalātou fai lenā le potu-la, e lotou tītu’a ki le Pule’aga o le Atua. Ko le pule’aki fa’i lenā ki otātou visia.–Taniela 2:44.

Kotou fakafesagai kia Satana o soko atu lakotou ako o uiga mo Seova

6. E toe faka’aoga’i e Satana a oli veli mo fakasēsē ai le fenua. E pati mai e Seova ke tou teke’i a aga alā e veli-la talie e iloa e ia e fakatupu veli loa kia tātou. (Kalate 6:7, 8) E lagi ko ’iki e lotou fia fakatasi mo lātou alā e fai ia a aga veveli anā. Kae ke kotou manatu’i, ko Satana totonu leia e loto ke kotou fai anā ne’a.–1 Kolinito 6:9, 10; 15:33.

7. E mafai ke faka’aoga’i e Satana a le fai fakaveliveli pe ko le fakafesagai ke kotou tītu’a kia Seova. E lagi ko ’iki e kotou alofa ai e mafai ke lotou ’i’ita talie e kotou ako a le Tosi-Tapu. E lagi gologolo ni’iki kia koutou. Kae ko ai leia e kotou fia mālie kiai? E fia faka’ī’ī koutou e Satana ke kotou ti’aki lakotou ako o uiga mo Seova. Auana kotou tuku ke malō Satana! (Mateo 10:34-39; 1 Petelo 5:8, 9) Kapau e kotou fakafesagai ki le Tiapolo, ti e mafai ke kotou fakafiafia a Seova ti mo fakasā e kotou lagolago ki Lana pule faitalisa.–Taagapati 27:11.

Copyright © 2006 Watch Tower Bible and Tract Society of Pennsylvania. All rights reserved.