Ko Ai Sesu Kilisito?

1. Na ma’uli Sesu i le lagi o fai pe se laumalie i mu’a o lana ’au ki le kele. Na ko ia na ’uluaki fakatupu e le Atua, ti ko ia leia na fakaigoa ai ko le Alo o le Atua na “uluaki tupu.” (Kolose 1:15; Apokalipisi 3:14) Ko Sesu fa’i na ko le Vosa e tasi o le Atua na fakatupu e ia totonu. Na faka’aoga e Sehova a Sesu i lana ma’uli i le lagi o fai pe sana ‘tufuga poto’ mo fakatupu a ne’a fulifuli i le lagi ti mo le kele. (Taagapati 8:22-31; Kolose 1:16, 17) Na faka’aoga e le Atua a ia o fai pe Sana tagata ave logo. Koia leia nā fakaigoa ai a Sesu “ko le Folafola.”–Soane 1:1-3; Apokalipisi 19:13.

2. Na kakau mai e le Atua Lona Alo ki le kele, o tuku mai lona ma’uli ki le manava o Malia. Koia na se i ai se tamana fakakelekele ma Sesu. Ti koia leia na se ma’ua ai e ia a le agasala. Na ko tupu’aga e tolu leia na kakau mai ai e le Atua a Sesu ki le kele: (1) Mo ako’i le mā’oki o uiga mo le Atua (Soane 18:37), (2) mo nofo agatonu kātoa, ti mo tuku mai se faifaitaki kia tātou ke tou muli’i (1 Petelo 2:21), ti (3) mo sakilifisio’i lona ma’uli ke tou saō mei le agasala ti mo le mate. Ko le ā na aoga ai lenā le potu-la?–Mateo 20:28.

3. I lana patigata’a ki le fakatotonu a le Atua, ko Atama le ’uluaki tagata na “agasala” o fai pe le pati a le Tosi-Tapu. Koia na tautea’i ai e le Atua a ia ki le mate. (Senesi 3:17-19) Na se koi ma muli’i e ia a lekula a le Atua, koia na se koi saosaoa ai. Ti na matumatu’a māmālie ai ti mo mate. Na tuku sosolo e Atama le agasala ki lana fānau fuli. Koia e tou matutu’a ai, ti tou masasaki, ti mo tou mamate. Na mafai fefe’aki ke saofaki a le malamanei?–Loma 3:23; 5:12.

4. Na saosaoa Sesu o fai pe Atama. Kae e kesekese a ia mo Atama, talie na fakalogo kātoa Sesu ki le Atua o fela’aki fa’i i le ’asi’asi lasi leia na tau mo ia-la. Na mafai ke ’aga ia o sakilifisio’i lona ma’uli fakatagata saosaoa mo totogi a le agasala a Atama. Ko le ne’a lenā e pati e le Tosi-Tapu ko le “totogi.” Koia na mafai ai ki fānau a Atama ke fakamavae mei le tu’ā o le mate. Ko lātou fuli alā e lotou tui kia Sesu, e mafai ke fakamolemole alātou agasala ti mo lotou ma’ua a le ma’uli le’egato.–1 Timoteo 2:5, 6; Soane 3:16; Loma 5:18, 19.

Lolotoga le minisitelio o Sesu, na faiako, mo fai milakulo, ti mo toe soli lona ma’uli ma tātou

5. I lana nofo i le kele, na faito’o e Sesu a le kau masaki, fāgai a le kakai pakupapaku, ti mo fakagato le afā. Na toe fakatu’uake e ia mo le kau mate. Ko le ā na fai ai e ia a milakulo anā? (1) Na alofa ki le kakai na maemae’ia, ti na fia tokoi kia lātou. (2) E fakamā’oki e ana milakulo koia ko le Alo o le Atua. (3) Na fakasā e ia le ne’a ka fai loa e ia ki le kakai fakalogo i lona temi Sau ki le kele.–Mateo 14:14; Maleko 2:10-12; Soane 5:28, 29.

6. Na kua mate Sesu ti na kua toe fakatu’uake e le Atua ko le laumalie, ti kua toe liliu ki le lagi. (1 Petelo 3:18) Talu mai ai, kua fakanofo Sau a ia e le Atua. Kua vave mai le temi leia ka ’aga ai loa Sesu o puli’i i le kele a le kau agaveli fuli ti mo le mamae.–Pesalemo 37:9-11; Taagapati 2:21, 22.

Copyright © 2006 Watch Tower Bible and Tract Society of Pennsylvania. All rights reserved.