Mera Savasava na Tamata ni Kalou

1. O Jiova e Kalou savasava, e Kalou tabu. E namaka vei ira na qaravi koya mera savasava vakayalo, me kilikili nodra itovo, me savasava nodra vakasama, mera savasava vakayago. (1 Pita 1:16) Na sasaga levu eda na cakava meda savasava tiko ga kina ena mata ni Kalou. Eda bula tu ena vuravura dukadukali. Eda na valuta tale tiko ga na noda dau via malele ga ina caka ca. Ia meda kua ni soro.

2. Na Savasava Vakayalo: Ke da via qaravi Jiova, e sega ni rawa nida muria tiko ga e so na ivakavuvuli se ivalavala ni lotu lasu. Meda dro tani sara ga mai na lotu lasu, da qai kua ni tokona tale tiko. (2 Korinica 6:14-18; Vakatakila 18:4) Nida sa vulica na ka dina me baleta na Kalou, meda qarauna mera kua ni vakacalai keda tale o ira na vakavuvulitaka na lasu.—2 Joni 10, 11.

3. iTovo Kilikili: E loma i Jiova vei ira na sokalou vua mera vakaitovotaki ira ena ivalavala ni lotu Vakarisito dina ena gauna kece ga. (1 Pita 2:12) E raica o koya na ka kece eda cakava, na veika mada ga e caka lo. (Iperiu 4:13) Meda kua ni vakayacora na veiyacovi tawakilikili kei na veika dukadukali tale e so ni vuravura oqo.—1 Korinica 6:9-11.

4. Savasava ni Vakasama: Ke da dau vakasamataka na veika e savasava kei na veika e kilikili, ena kilikili tale ga na noda itovo. (Filipai 4:8) Ia kevaka eda dau vakasamataka na veika e dukadukali, ena ca na noda ivalavala. (Maciu 15:18-20) E dodonu meda cata na ka ni veivakalasai e so ena vakadukadukalitaka noda vakasama. Eda na dau vakasamataka na veika e savasava ena noda vulica na Vosa ni Kalou.

5. Savasava Vakayago: Nira matataka na Kalou, mera raica na lotu Vakarisito me dau savasava tu ga na yagodra kei na nodra isulu. Meda dau vuluvulu nida lesu mai valelailai, meda vuluvulu tale ga ni se bera na kana, se kevaka eda vakarau kakana. Ke sega na valelailai vinaka, e dodonu ga me bulu na noda benu. (Vakarua 23:12, 13) Na savasava vakayago e vakavuna na bulabula vinaka vakayago. Na nona vale na lotu Vakarisito e dodonu me maqosa qai savasava, sega wale ga e loma, e tautuba tale ga. E dodonu me kilai tani na nona itikotiko ena vanua e tiko kina.

6. Vosa Rakorako: Mera dau vosa dina ena gauna kece ga na tamata ni Kalou. Na tamata lasulasu ena sega ni curu ina Matanitu ni Kalou. (Efeso 4:25; Vakatakila 21:8) Era sega ni dau vosavosa ca na lotu Vakarisito. Era sega ni dau via rogoca na italanoa vakasisila, se mera veiwalitaka na ka velavela. Era na kilai nira duatani ena nodra vanua ni cakacaka se mai koronivuli se na vanua era vakaitikotiko kina baleta ni rakorako na nodra ivosavosa.—Efeso 4:29, 31; 5:3.

Mera savasava ena basogana kece ga ni nodra bula na tamata ni Kalou

Copyright © 2008 Watch Tower Bible and Tract Society of Pennsylvania. All rights reserved.