Ули меленк содамс
видечинть?

ВИДЕЧИНТЬ мезе ланга? Сень ланга, мезесь талновты ломантнень умонь шкасто. Паряк, тынк превс сакшность истят эрявикс кевкстнемат, кода:

Косо, тынк коряс, эряви вешнемс каршо валт неть кевкстнематнень лангс? Библиотекасо ды книгань микшнема кудосо тынь мутадо пек ламо книгат, конатнень сёрмадыцяст кемевтить, што содасызь каршо валтнэнь весе кевкстнематнень лангс. Ансяк сеетьстэ вейке книгась моли каршо омбоцентень. Кой-кона книгатне марявить сёрмадозь шкастост, ансяк юты аламо шка, ды сынь таштомить. Сынст одов вансызь, одс сёрмадсызь.

Ансяк ули книга, конась зярдояк а манчи. Те книгасонть видечи. Зярдо Иисус Христос ознось Пазонтень, сон кортась: «Тонь валот-видечись» (Иоанн. 17:17). Течи те Валось сёрмадозь Библиясо. Ловнодо седе тов, ды карматадо содамо алкуксонь библиянь каршо валт седе икелев сёрмадозь кевкстнематнень лангс.

Вечксамизь минек Пазось?

МЕКС ЛИСЕ ИСТЯМО КЕВКСТНЕМАСЬ. Минь эрятано масторлангсо, конась пешксе кежейчиде ды авидечиде. Ламо религиятне тонавтыть, што весе минек майсематне Пазонть пельде.

МЕЗЕС ТОНАВТЫ БИБЛИЯСЬ. Пазось зярдояк а теи апаро. «Мезе эно ёвтамс тень коряс? Нать Пазось теи авидестэ? Кодаяк аволь!»— кортави Паволонь сёрмасо Римев 9:14. Пазонть ули пек вадря мелезэ ломантнень коряс. Вана мекс Иисус тонавтсь минек озномо: «Менелень минек Тетянок... Сазо Тонь Инязорксчить. Топавтовост Тонь мелеть-арсемат масторлангсояк, кода менельсэ» (Матв. 6:9, 10). Пазось вечксамизь минек истя пек, мик мелензэ топавтомань кис пандсь пек покш питне (Иоанн. 3:16).

Ванодо истя жо 1 Моис. 1:26; Як. 1:13 ды 1 Петр. 5:6, 7.

Сы зярдояк пе войнатненень ды майсематненень?

МЕКС ЛИСЕ ИСТЯМО КЕВКСТНЕМАСЬ. Войнасо чавовить пек ламо ломанть. Арась ломань, конась пингензэ кувалт эзь майсекшне.

МЕЗЕС ТОНАВТЫ БИБЛИЯСЬ. Пазось корты, што сы шка, зярдо сон весе масторонть лангсо аравты ладямо. Зярдо карми масторлангсо прявтомо Пазось, ломантне а кармить «тонавтнеме тюреме». Сынь «одов чавсызь торост сока лангс» (Ис. 2:4). Пазось путы пе весе авидечинтень ды майсематненень. Библиясь алты: «[Пазось] нардасы сынст сельместэст эрьва сельведненть. Куломась а ули, ды а кармить улеме ризнэмаяк, авардемаяк, пиштемаяк, эдь весе таштось [истя жо авидечись ды майсематне] ёмась-арась пингеде пингес» (Апок. 21:3, 4).

Ванодо истя жо Пс. 37:10, 11; 46:9 ды Мих. 4:1—4.

Мезе тееви ломаненть марто куломсто?

МЕКС ЛИСЕ ИСТЯМО КЕВКСТНЕМАСЬ. Ламонст религиятне тонавтыть, што куломадо мейле ломаненть эйсэ ули пелькс, конась эри седе тов. Кой-кить кемить, што кулозтне теить зыян эрицятненень, ды што Пазось весе пежетевтнень кучи пингеде пингес адсо майсеме.

МЕЗЕС ТОНАВТЫ БИБЛИЯСЬ. Зярдо ломанесь кулы, сон лотке улеме. «Кулозтне мезеяк а содыть»,— кортави Эклесиастонь книгасо 9:5. Истя кода кулозтне мезеяк а содыть, а марить, а варчить, сыненст а тееви зыян, а максови лезэ эрицятненень (Пс. 146:3, 4).

Ванодо истя жо 1 Моис. 3:19 ды Экл. 9:6, 10.

Ули кемемачи кулозтненень?

МЕКС ЛИСЕ ИСТЯМО КЕВКСТНЕМАСЬ. Минь весе бажатано эрямс ды кенярдомс эрямонтень сетнень марто, кинь вечксынек. Алкукскак, минек ули покш меленек одс неемс минек малавикс ломантнень, конатнень марто явимизь куломась.

МЕЗЕС ТОНАВТЫ БИБЛИЯСЬ. Ламотне кулозтнеде кармить вельмевтезь. Иисус алтась, што «весе кулозтне марясызь Пазонь Церанть вайгелензэ. Сынь лисить калмосто» (Иоанн. 5:28, 29). Вельмевтезь ломантненень максови возможность эрямс райсэ мода лангсо, кодамо Пазонть ульнесь арсевксэзэ. Теде башка, Пазонь кунсолыця ломантне кармить эрямо пингеде пингес ды сынь а кармить сэредеме. Библиясо кортави: «Пазось макссы масторлангонть видечинь ды Коень топавтыця ломантненень, сынь кармить эрямо сонзэ лангсо пингеде пингес» (Пс. 37:29).

Ванодо истя жо Иов. 14:14, 15; Лук. 7:11—17 ды Ап. т. 24:15.

Кода эряви озномс, штобу Пазось марявлимизь?

МЕКС ЛИСЕ ИСТЯМО КЕВКСТНЕМАСЬ. Малав весе религиятнень кемицятне озныть. Ансяк ламонень маряви, што сынст озномаст кадовить каршо валтомо.

МЕЗЕС ТОНАВТЫ БИБЛИЯСЬ. Иисус тонавтсь минек а кортамс озномсто ламо чаво валт. Сон кортась: «Озномсто чаво валт илядо лавга» (Матв. 6:7). Те невти сень, штобу минь а ёвтневлинек мекев-васов тонавтозь озноматнень. Бути ули меленек, штобу Пазось марявлимизь, эряви озномс истя, кода сонзэ мельс тукшны. Тень кисэ миненек эряви содамс, кодамо Пазонть мелезэ ды озномс те меленть коряс. Иоаннонь васенце сёрмасо 5:14 сёрмадозь: «Бути минь, сюлмавозь Сонзэ меленть марто, вештяно Пазонть пельде мезе-бути, Сон минек марясамизь».

Ванодо истя жо Пс. 65:2; Иоанн. 14:6, 14 ды 1 Иоанн. 3:22.

Кода муемс уцяска эрямосо?

МЕКС ЛИСЕ ИСТЯМО КЕВКСТНЕМАСЬ. Ламо ломантне ловить: штобу улемс уцяскавкс, эрявить ламо ярмакт, улемс содавиксэкс ды мазыйкс. Сынь путыть весе виест те целенть топавтомань кис. Ансяк уцяскась теке арась.

МЕЗЕС ТОНАВТЫ БИБЛИЯСЬ. Иисус невтизе, мезе эряви теемс, штобу улемс алкуксонь уцяскавкс. Сон мерсь: «Уцяскавт сеть, конатне чарькодить эсь кажовчист Пазонть икеле» (Матв. 5:3). Минь карматано алкуксонь уцяскавкс ансяк сестэ, зярдо карматано топавтомо эсенек весемеде пек эрявикс арасьчинть — содамс видечинть Пазонть ланга ды сонзэ арсевксэнзэ минек коряс. Те видечись сёрмадозь Библиясо. Содазь те видечинть, минь чарькодьсынек, мезе те эрямосонть сехте пек эрявикс, а мезе аволь. Зярдо минь карматано примамо решеният ды тееме библиянь видечинть коряс, сестэ минек эрямонок карми седе смустев (Лук. 11:28).

Ванодо истя жо Сол. валм. 3:5, 6, 13—18 ды 1 Тим. 6:9, 10.