Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ?

Mmọ ẹnyene udọn̄ ke idemfo

Mmanie ke Mmọ Ẹdi?

ỌDỌN̄ Mme Ntiense Jehovah nte afo enen̄ede emehe ye mmimọ. Ekeme ndidi afo ama osobo ye mmọ nte mbọhọidụn̄ ye nsan̄autom m̀mê ke mbubehe uwem eke usen ke usen eken. Ekeme ndidi afo ama okụt mmọ ke efak, ẹnọde mmọ oro ẹsan̄ade ẹbe mme magazine mmọ. Mîdịghe ekeme ndidi afo ama enyene nneme ye mmọ ibio ibio ke enyịnusụn̄ fo.

Ke akpanikọ, Mme Ntiense Jehovah ẹnyene udọn̄ ke idemfo ye ke mfọnọn̄kpọ fo. Mmọ ẹyom ndidi mme ufan fo nnyụn̄ ntịn̄ mme n̄kpọ efen efen nnọ fi mban̄a idemmọ, se mmọ ẹnịmde ke akpanikọ, esop mmọ, ye nte mmọ ẹkerede ẹban̄a mme owo ye ererimbot emi kpukpru nnyịn idụn̄de. Man ẹnam emi, mmọ ẹtịm ediye uduot ekpri n̄wed emi ẹnọ fi.

Ke ediwak usụn̄, Mme Ntiense Jehovah ẹtie nte owo efen ekededi. Mmọ ẹnyene mme ọsọ mfịna—eke ndutịm uforo, eke ikpọkidem, ye eke ntụk. Mmọ ẹsinam ndudue ndusụk ini, sia mmọ mîdịghe mfọnmma, mîbọhọ san̄asan̄a odudu, mînyụn̄ inanake ndudue. Edi mmọ ẹsidomo ndikpep n̄kpọ nto ifiọk eyouwem mmọ ẹnyụn̄ ẹsịn ifịk ẹkpep Bible man ẹnam mme ukpụhọde oro ẹyomde. Mmọ ẹyak idem ẹnọ Abasi ndinam uduak esie, ẹnyụn̄ ẹsịn ifịk man ẹdu uwem ekekem ye uyakidem nnọ emi. Ke kpukpru edinam mmọ, mmọ ẹyom ndausụn̄ ẹto Ikọ Abasi ye edisana spirit esie.

Se mmọ ẹnịmde ke akpanikọ ndikọn̄ọ ke Bible utu ke ikpîkpu ekikere owo m̀mê mme ukpepn̄kpọ ido ukpono edi ata akpan n̄kpọ ọnọ mmọ. Etie mmọ ke idem ukem nte eketiede apostle Paul ke ini enye eketịn̄de aban̄a idemesie ke idak odudu spirit Abasi ete: “Yak ẹwụt ẹte Abasi edi akpanikọ, kpukpru owo ẹkpedi mme osu-nsu.” (Rome 3:4, Edisana Ŋwed Abasi Ibom*) Ke ini edide edisịm mme n̄kpọ oro ẹkpepde nte akpanikọ Bible, Mme Ntiense ẹnen̄ede ẹnyịme usụn̄ oro mbon Beroea ẹketienede ke ini mmọ ẹkekopde ukwọrọikọ apostle Paul: “Mmọ ẹkop ikọ ke edinyịme esịt, ẹnyụn̄ ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.” (Utom 17:11) Mme Ntiense Jehovah ẹnịm ke akpanikọ ẹte ke ẹkpenyene ndidomo kpukpru ukpepn̄kpọ ido ukpono nse m̀mê mmọ ẹdu ke n̄kemuyo ye N̄wed Abasi oro ẹdade odudu spirit ẹwet, edide ukpepn̄kpọ oro oto mmọ m̀mê owo efen. Mmọ ẹnọ fi ikot—ẹsin udọn̄ ẹnọ fi—ndinam emi ke nneme emi afo enemede ye mmọ.

Ọkọn̄ọde ke emi ana in̄wan̄în̄wan̄ nte ke Mme Ntiense Jehovah ẹnịm Bible ke akpanikọ nte Ikọ Abasi. Mmọ ẹbat ke ẹkeda odudu spirit ẹwet n̄wed 66 esie ye nte ke mme mbụk esie ẹnen. Mmọ ẹtịn̄ ẹban̄a se ẹsiwakde ndikot Obufa Testament nte N̄wed Abasi Christian Usem Greek, ndien mmọ ẹkot Akani Testament, N̄wed Abasi Usem Hebrew. Mmọ ẹberi edem ke mbiba emi, N̄wed Abasi Usem Greek ye eke Hebrew, ẹnyụn̄ ẹda ke mmọ ẹtịn̄ ikọ ke ata ata usụn̄ ibọhọke ke ebiet emi mme ikọ m̀mê idaha nte an̄wan̄ade ẹwụtde nte ke mmọ ẹda ẹban̄a n̄kpọ. Mmọ ẹdiọn̄ọ ẹte ke ediwak ntịn̄nnịm ikọ Bible ẹma ẹsosu, mmọ eken ke ẹsu, ndien ndusụk ke ẹbet edisu.

ENYỊN̄ MMỌ

Mme Ntiense Jehovah? Ih, mmọ ẹkot idemmọ ntre. Enye edi enyịn̄ emi etịn̄de n̄kpọ aban̄a mmọ, owụtde ke mmọ ẹtie ntiense ẹban̄a Jehovah, idaha esie nte Abasi, ye mme uduak esie. “Abasi,” “Ọbọn̄,” ye “Andibot”—nte “Adaibuot Ukara,” “Edidem,” ye “Etubom”—ẹdi udorienyịn̄ ẹnyụn̄ ẹkeme ndida nnọ ediwak nsio nsio owo. Edi “Jehovah” edi ọkpọkpọ enyịn̄ onyụn̄ ada ọnọ Ata Ọkpọsọn̄ Abasi ye Andibot ekondo. Ẹwụt emi ke Psalm 83:18, nte ekemde ye edikabade Bible eke King James: “Man mme owo ẹkpefiọk ẹte ke afo, emi enyịn̄ fo ikpọn̄ edide JEHOVAH, edi ata edikon̄ ke ofụri isọn̄.”

Ọkpọkpọ enyịn̄ Abasi ke usem Hebrew eset

Enyịn̄ oro Jehovah (m̀mê Yahweh, nte Jerusalem Bible eke Roman Catholic ye ndusụk nditọ ukpepn̄kpọ ẹmekde ndikot) odu ekpere ndisịm utịm ike 7,000 ke akpasarade N̄wed Abasi Usem Hebrew. Ata ediwak Bible isịnke enye ntre edi ẹda “Abasi” m̀mê “Ọbọn̄” ẹkpụhọ ke itie esie. Nte ededi, idem ke mme Bible emi, nte ido edide owo ekeme nditịn̄ ebiet emi akpasarade uwetn̄kpọ Hebrew adade Jehovah sia ẹdade ikpọ abisi ẹwet mme ukpụhọ ikọ, ntem: ABASI, ỌBỌN̄. Ediwak edikabade eyomfịn ẹda enyịn̄ oro Jehovah m̀mê enyịn̄ oro Yahweh. Ntem, Edisana Ŋwed Abasi Ibom okot ke Isaiah 42:8 ete: “Ami ndi Jehovah; enyịn̄ mi edi oro.”

Itien̄wed Abasi oro Mme Ntiense Jehovah ẹdade enyịn̄ mmọ ẹto odu ke Isaiah ọyọhọ ibuot 43. Do ẹse mme n̄kpọntịbe ererimbot nte se isitịbede ke ufọkesop: Ẹdọhọ mme abasi mme idụt ẹda mme ntiense mmọ ẹdi man ẹdisọn̄ọ mme ikọ edinen ido mmọ m̀mê ẹdikop mme ntiense ẹdade ke n̄kan̄ Jehovah ẹnyụn̄ ẹnyịme akpanikọ. Do Jehovah asian ikọt esie ete: “Jehovah ọdọhọ, ete, Mbufo ẹdi ntiense mi, ye owo emi n̄kemekde: man mbufo ẹfiọk ẹnyụn̄ ẹnịm uyo mi ke akpanikọ, ẹnyụn̄ ẹkụt ẹte ke ami ndi enye: ikebemke mi iso ibot Abasi, baba kiet idinyụn̄ itieneke mi edem. Ami, ami ndi Jehovah; ndien baba andinyan̄a kiet idụhe ke mîbọhọke ami.”—Isaiah 43:10, 11.

Jehovah Abasi ama enyene mme ntiense ke isọn̄ ke ediwak tọsịn isua mbemiso Jesus akamanade. Ke Mme Hebrew ibuot 11 ama akasiak ndusụk iren mbuọtidem oro, Mme Hebrew 12:1 ọdọhọ ete: “Mmọdo, sia otu ntiense eke ẹwakde ntem ẹkande nnyịn ẹkụk, ẹyak nnyịn nde ikpọnọde kpukpru mbiomo inịm n̄kan̄ kiet, ye idiọk-n̄kpọ eke ẹyịrede nnyịn ke kpukpru edem; ẹnyụn̄ ẹyak ifehe mbuba eke anade nnyịn ke iso ye ime.” Jesus ọkọdọhọ ke iso Pontius Pilate ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.” Ẹkot enye “ata ntiense akpanikọ.” (John 18:37; Ediyarade 3:14) Jesus ọkọdọhọ mme mbet esie ete: “Edi mbufo ẹyebọ odudu, ke edisana spirit ama edi edidoro mbufo ke idem: mbufo ẹyenyụn̄ ẹdi mme ntiense mi ke Jerusalem, ye ke ofụri Judea ye Samaria, tutu esịm utịt ererimbot.”—Utom 1:8.

Ntem, n̄kpọ nte owo 6,000,000 mfịn oro ẹtịn̄de ẹban̄a eti mbụk Obio Ubọn̄ Jehovah ebede ke Christ Jesus ke se iwakde ibe idụt 230 ẹkere ẹte ke mmimọ imenen ndikot idem mmimọ Mme Ntiense Jehovah.

N̄kpọ nte Mme Ntiense 6,000,000 ke se iwakde ibe idụt 230

* Mme itie Bible ẹkotde ẹsịn ke ediye uduot ekpri n̄wed emi ẹto edikabade emi, ibọhọke ẹwụt ke usụn̄ efen.

Copyright © 2008 Watch Tower Bible and Tract Society of Pennsylvania. All rights reserved.