Рæстдзинадæ,
æ базонун дæ фæндуй?

Рæстдзинадæ цæй туххæй? Рагидзаманæй адæми хъæбæрдæр ка тухсун кæнуй, еци æхсидзгæ фарстати туххæй. Æвæдзи ду дæр ескæд гъуди кодтай мæнæ ауæхæн фарстатæбæл:

Кæми ес иссерæн дзуапп аци фарстатæн? Цал адæймаги бафæрсай, уал хузи дзуаппи фегъосдзæнæ. Библиотекити æма киунугути тукæнтти дæр аци фарстати фæдбæл хъæбæр берæ киунугутæ ес. Фал уоми дæр еухузон дзуаппитæ нæййес. Еци киунугутæй кæцидæртæ хуарз бæл нимад фæуунцæ, фал берæ нæ рацæуй, ма сæ багъæуй исраст кæнун, кенæ ба сæ феййевун нæугутæй.

Фал ес федарæй æууæндун кæбæл æнгъезуй, гъеуæхæн киунугæ. Е æй æцæг рæстдзинадæ финст кæми ес æма еунæг мæнгæ дзурд дæр кæми нæййе, уæхæн киунугæ. Йесо Киристе Хуцаумæ ковгæй загъта: «Дæ дзурд æй рæстдзинадæ» (Иоанни 17:17). Еци дзурд ба æй Сугъдæг Финстадæ Библи. Идарддæр æркæсгæй ес фæййинæн уæлдæр æвзурст фарстатæн Библи куд дæттуй бæлвурд æма раст дзуаппитæ.

Хуцау нæбæл æцæгæйдæр тухсуй?

АУÆХÆН ФАРСТА ЦÆМÆН ФÆЗЗИННУЙ: Мах цæрæн æнæхатир, мæнгард æма цъаммар дуйнейи. Берæ динтæ ахур кæнунцæ уобæл æма, адæми гъезæмæртти Хуцау ке æй фудгин.

БИБЛИ БА ЦИ ЗÆГЪУЙ УОЙ ТУХХÆЙ: Адæм ци æвзарунцæ, уоми Хуцау неци фудгин æй. «Уомæн нæййес гæнæн æма Хуцауæй хæрамдзинадæ цæуа, кенæ ба Дуйнескæнæг – раст ци нæй, уой исараза!» (Иов 34:10). Хуцаумæ адæми туххæй хуарз фæндон ес. Киристе дæр адæми гъеуомæн ахур кодта, цæмæй кувтайонцæ: «Нæ уæларвон Фидæ... Æрцæуæд дæ паддзахадæ. Дæ фæндон уæлæрвти куд æй, уотæ уæд зæнхæбæл дæр» (Матфейи 6:9,10). Хуцау нæ уотæ хъæбæр уарзуй, æма æ фæндон исæнхæст кæнуни туххæй нивондæн æрхаста, æгасемæй хъазардæр имæ ци адтæй, гъеуой (Иоанни 3:16).

Кæсæ ма Райдайæни 1:26–28; Иакови 1:13 æма 1  Петури 5:6,7.

Тугъд æма гъезæмарæн кæрон ескæд æрцæудзæй?

АУÆХÆН ФАРСТА ЦÆМÆН ФÆЗЗИННУЙ: Абони дæр тугъди зæйти хъæбæр берæ адæм цæгъдуни кæнунцæ. Алке дæр ни æй зонуй гъезæмарæ ци æй, уой.

БИБЛИ БА ЦИ ЗÆГЪУЙ УОЙ ТУХХÆЙ: Хуцау рагæй загъта, æ рæстæги æгас зæнхæбæл дæр сабур цард ке искæндзæй, уой. Йæ уæларвон паддзахадæ бартæ æ къохмæ ку райса, уæд зæнхæбæл адæм «тохунбæл нæбал ахур кæндзæнцæ». Айдагъ е нæ, фал ма сæ «хъæматæй готони кæрдтæ дæр искæндзæнцæ» (Исайи 2:4). Зæнхæбæл цидæр цъаммар гъуддæгтæ æма гъезæмæрттæ ес, уонæн Хуцау кæрон ’скæндзæй. Хуцауи Дзурд нин зæрдæ æвæруй: «[Хуцау] син ниссæрфдзæй сæ цæстисугтæ, æма нæбал уодзæй нæдæр мæлæт, нæдæр маст, нæдæр гъарæнгæ, нæдæр рист. Раздæр ци адтæй [æма абони ци цъаммар гъуддæгтæ æма гъезæмæрттæ ес], е фæййевгъудæй» (Раргомадæ 21:3,4).

Кæсæ ма Псалом 37:10,11 æма Михей 4:1–4.

Адæймагæн æнæмæлгæ уод ес?

АУÆХÆН ФАРСТА ЦÆМÆН ФÆЗЗИННУЙ: Зæнхæбæл ци динтæ ес, уонæн сæ фулдæр уобæл ахур кæнунцæ, æма адæймаг ку рамæлуй, уæд ма йæ уод цæргæ байзайуй. Беретæ æууæндунцæ мардæн йæ бон ке æй уодæгæстæн ести фидбилиз ракæнун, иннетæ ба зæгъунцæ, Хуцау фудгæнгутæн тæрхон рахæссуй, цæмæй зиндони арти æностæмæ гъезæмарæ кæнонцæ.

БИБЛИ БА ЦИ ЗÆГЪУЙ УОЙ ТУХХÆЙ: Адæймаг ку рамæлуй, уæд гъеуобæл йæ цард фæууй. «Мæрдтæ æгириддæр неци зонунцæ»,– финст ес Екклесиасти 9:5. Æма кæд мæрдтæ неци зонунцæ ма неци лæдæрунцæ, уæд сæ бон нæй уодæгæстæн нæдæр хуарзæй ести ракæнун, нæдæн лæгъузæй (Псалом 146:3, 4).

Кæсæ ма Райдайæни 3:19 æма Екклесиасти 9:6, 10.

Ка рамардæй, етæ ма ескæд зæнхæбæл цæрдзæнцæ?

АУÆХÆН ФАРСТА ЦÆМÆН ФÆЗЗИННУЙ: Мах фæндуй цæрун æма ке уарзæн, уони хæццæ цардбæл цийнæ кæнун. Æма уоми дессагæй неци ес, нæуæгæй нæ ке фæндуй фæууинун азæнхæбæл, ка ни рамардæй, еци уарзон адæми.

БИБЛИ БА ЦИ ЗÆГЪУЙ УОЙ ТУХХÆЙ: Ка рамардæй, уонæн сæ фулдæр райгас уодзæнцæ. Йесо зæрдæ байвардта: «Циртти кадæр ес, етæ... райгас уодзæнæнцæ цæрунæн» (Иоанни 5:28, 29). Ка райгас уа, уонæн уодзæй фадат зæнхæбæл цæрун дзенети, Хуцауи фиццаг фæндонмæ гæсгæ (Лукай 23:43). Уомæй уæлдай ма, коммæгæс адæм, еци царди æностæмæ æнæнезæй цæрдзæнцæ. Библий финст ес: «Зæнхæ рæстгæнгути бауодзæй æма ибæл æностæмæ цæрдзæнцæ» (Псалом 37:29).

Кæсæ ма Иови 14:14, 15; Лукай 7:11–17 æма Апостолти гъуддæгти 24:15.

Хуцаумæ куд ковун гъæуй, цæмæй мин мæ кувдтитæ игъоса?

АУÆХÆН ФАРСТА ЦÆМÆН ФÆЗЗИННУЙ: Алли динтæбæл хуæст адæм дæр ковунцæ Хуцаумæ. Фал беретæмæ уотæ кæсуй, æма сæ Хуцау нæ игъосуй.

БИБЛИ БА ЦИ ЗÆГЪУЙ УОЙ ТУХХÆЙ: Йесо Киристе ахур кодта: «Ку ковай, уæд æдзох... еци еухузон дзурдтæ ма дзорæ» (Матфейи 6:7). Фæндуй нæ, цæмæй нин Хуцау нæ кувдтитæ игъоса? Кæд о, уæд нæ гъæуй уой куд фæндуй, гъеуотæ имæ ковун. Уомæн ба нæ гъæуй Хуцауи фæндон ци æй, уой базонун, æма уомæ гæсгæ ковун. «Йæ фæндонмæ гæсгæ си цифæнди дæр ку ракорæн – игъосуй нæ»,– финст ес 1  Иоанни 5:14.

Кæсæ ма Псалом 65:2; Иоанни 14:6, 14 æма 1  Иоанни 3:22.

Мæ цард амондгун цæй фæрци уодзæй?

АУÆХÆН ФАРСТА ЦÆМÆН ФÆЗЗИННУЙ: Беретæмæ уотæ кæсуй æма æцæг амонд кæнгæ æй æхца, кадæ æма рæсугъд бакастæй. Бæлгæ дæр сæмæ гъеуомæн фæккæнунцæ, фал амондгун не’сунцæ.

БИБЛИ БА ЦИ ЗÆГЪУЙ УОЙ ТУХХÆЙ: Амонд цæмæй кæнгæ æй, уой туххæй Киристе загъта: «Амондгун æнцæ, æнæ Хуцауæй цæрæн ке нæййес, уой ка лæдæруй, етæ» (Матфейи 5:3). Æцæг амондгун уæд уодзинан, æма царди æгасемæй æхсидзгæдæр гъуддагмæ, ома Хуцауи туххæй æма æ фæндони туххæй базонунмæ ку бæллæн, гъеуæд. Еци рæстдзинадæ æй финст Библий. Ку æй базонæн, уæд нæ бон уодзæй рартасун царди медæг æхсидзгæдæр гъуддаг ци æй, уой. Библий ци финст ес, уомæ гæсгæ нæ цард ку аразæн, уæд уодзинан берæ мондгундæр (Лукай 11:28).

Кæсæ ма Æмбесæндти 3:5 ,6, 13–18 æма 1  Тимофеймæ 6:9, 10.