Hemi Kɛ Yemi kɛ Kusumii Nɛ A Sɛ Mawu Hɛ Mi

Tsapi Triniti ko ji Mawu

1. Tsapi hemi kɛ yemi kɛ kusumii tsuo nɛ hii. Ke a je lakpa jami mi aloo a te si kɛ wo ɔ Baiblo tsɔɔmi ɔ Mawu kplɛ we nɔ.—Mateo 15:6.

2. Triniti: Ani Yehowa ji Triniti—nimli etɛ nɛ a ngɛ Mawu kake mi lo? Dabida! Yehowa, nɛ e ji Tsɛ ɔ ji “anɔkuale Mawu kake ɔ” nɛ. (Yohane 17:3; Marko 12:29) Yesu ji E kleklee Bi, nɛ e baa e he si kɛ haa Mawu. (1 Korintobi 11:3) Tsɛ ɔ nɔ kuɔ pe Bi ɔ. (Yohane 14:28) Tsapi nɔmlɔ ji mumi krɔukrɔu; e ji Mawu he wami nɛ e kɛ tsuɔ ni.—1 Mose 1:2; Bɔfoi Asane 2:18.

Bloonya kɛ Ista je blema lakpa jami mi kɛ ba

Sisi numi ko kwraa be gbogboehi nɛ a ma ja mɛ loo a ma ye mɛ gbeye ɔ he

3. Bloonya kɛ Ista: A fɔ we Yesu ngɛ December 25 nɔ. A fɔ lɛ ma pee kaa October 1, jeha mi be nɛ too nɔ hyɛli kɛ a too ɔmɛ je kpo gbɔkuɛ nya si. (Luka 2:8-12) Yesu de we Kliistofohi kɛ a ye e fɔ mi ligbi. Se, e de e kaseli ɔmɛ kɛ a kai e gbenɔ. (Luka 22:19, 20) Bloonya kɛ e he kusumi ɔmɛ je blema lakpa jami mi. Jaa kɛ̃ Ista kusumii nɛ a ngɛ kaa hlui kɛ adangko ɔ hu ngɛ. Kleklee Kliistofo ɔmɛ yii Bloonya aloo Ista, nɛ jaa kɛ̃ anɔkuale Kliistofohi hu yii muɛnɔ.

4. Fɔmi Ligbi: Nimli nɛ a ye fɔmi ligbi enyɔ nɛ Baiblo ɔ tu he munyu ji nimli nɛ a ja we Yehowa. (1 Mose 40:20-22; Marko 6:21, 22, 24-27) Kleklee Kliistofoli ɔmɛ yii fɔmi ligbi. Kusumi nɛ ji fɔmi ligbi nɛ a yeɔ je blema lakpa jami mi. Anɔkuale Kliistofohi kee ni nɛ a jeɔ a hɛ ja kutuu ngɛ jeha mi be fɛɛ ko.

5. Gbogboehi a Gbeye Yemi: Gbogboehi bi nyɛe maa pee nɔ ko aloo a nui nɔ ko he. Wa bi nyɛe maa ye kɛ bua mɛ, nɛ a bi nyɛe maa ye wɔ awi ko. (Lala 146:4; Jajelɔ 9:5, 10) Susuma gboɔ; e hii si hu ngɛ gbenɔ se. (Ezekiel 18:4) Se be ngɛ nɛ hiɔwe bɔfoi yayami nɛ a tsɛ mɛ kɛ daimonoi peeɔ a he gbogboehi a mumi. Kusumii nɛ kɔ gbogboehi gbeye yemi aloo a jami he ɔ dɛ.—Yesaia 8:19.

6. Klɔs: Yesu gbo we ngɛ klɔs nɔ. E gbo ngɛ tso nɛ maa si jai nɔ. Hela gbi nɛ a tsɔɔ sisi kɛ “klɔs” ngɛ Baibloi fuu mi ɔ sisi ji plai kake ko kɛkɛ. Klɔs he okadi ɔ je blema wɔ jami mi. Kleklee Kliistofoli ɔmɛ kɛ klɔs tsu we ni aloo a ja we lɛ. Lɔɔ he je ɔ, o susu kaa e da kaa a kɛ klɔs maa tsu ni ngɛ jami mi lo?—5 Mose 7:26; 1 Korintobi 10:14.

7. E he maa wa kaa o maa kua hemi kɛ yemi kɛ kusumi nɔ mɛ. Ekoɔ weku bi kɛ huɛ mɛ maa bɔ mɔdi kaa o ko tsake o hemi kɛ yemi ɔ. Se Mawu hɛ mi nɛ o maa sa he hia pe nimli nɛ o maa sa a hɛ mi.—Abɛi 29:25; Mateo 10:36, 37.

Copyright © 2008 Watch Tower Bible and Tract Society of Pennsylvania. All rights reserved.