Mawu nɛ Wa Maa Hɛ Wɔ kɛ Su E He ngɛ Sɔlemi Mi

1. Sɔlemi ji Mawu nɛ a kɛ lɛ tuɔ munyu ngɛ he si bami mi. E sa nɛ o sɔle kɛ ha Mawu daa. Kɛkɛ o maa nu he kaa o su e he tataata kaa benɛ a su huɛ ko nɛ a suɔ e sane he ɔ. Yehowa kle nɛ e he wa, se e buɔ wa sɔlemi tue! O sɔlee kɛ ha Mawu daa lo?—Lala 65:3; 1 Tesalonikabi 5:17.

2. Sɔlemi ji wa jami ɔ fa. Lɔɔ he je ɔ, e sa nɛ wa sɔle kɛ ha Yehowa Mawu nyaake pɛ. Benɛ Yesu ngɛ zugba nɔ, e sɔle kɛ ha e Tsɛ be fɛɛ be, se pi nɔ kpa ko. E sa nɛ wɔ hu wa pee ja kɛ̃. (Mateo 4:10; 6:9) Se, e sa nɛ wa de wa sɔlemi ɔ tsuo ngɛ Yesu biɛ mi. E nɔ tsɔɔ kaa wa bu he blɔ nɛ Yesu hɛɛ nɛ wa ngɛ hemi kɛ yemi ngɛ e kpɔmi afɔlesa mi.—Yohane 14:6; 1 Yohane 2:1, 2.

3. Ke wa ngɛ sɔle ɔ e sa nɛ wa kɛ Mawu tu munyu kɛ je wa tsui mi. E sɛ nɛ wa kɛ sɔlemi pɔtii komɛ wo wa yimi aloo wa kane kɛ je wo mi ko mi. (Mateo 6:7, 8) Wa ma nyɛ maa sɔle ngɛ si himi fɛɛ si himi nɛ bu ngɛ mi ɔ mi be tsuaa be. Mawu ma nyɛ maa nu sɔlemi nɛ a nui nɛ wa deɔ ngɛ wa tsui mi ɔ po. (1 Samuel 1:12, 13) E hi kaa wa maa hla he ko nɛ ngɛ dii nɛ nimli be le jɔ nɛ wa de wa sɔlemi ɔmɛ ngɛ lejɔ.—Marko 1:35.

4. Mini ji nihi nɛ a ma nyɛ maa sɔle kɛ bi? Nɔ́ tsuaa nɔ́ nɛ kɔ o kɛ lɛ huɛ bɔ mi ɔ he. (Filipibi 4:6, 7) Sɔlemi he nɔ hyɛmi nɔ tsɔɔ kaa e sa kaa wa sɔle nɛ e kɔ Yehowa biɛ kɛ e yi mi tomi he. Wa ma nyɛ maa bi nɛ a kɛ wa heloo nya hiami nihi ha wɔ, nɛ a kɛ wa he yayami ke wɔ, kɛ yemi kɛ buami nɛ wa kɛ ma te si kɛ si ka. (Mateo 6:9-13) E sɛ nɛ wa sɔlemi pee i-nyaake-ma-na ni bimi. E sa nɛ wa sɔle kɛ bi nihi nɛ a kɛ Mawu suɔmi nya ni peeɔ gbi pɛ.—1 Yohane 5:14.

5. O ma nyɛ maa sɔle be tsuaa be nɛ o tsui maa tsitsɛɛ mo kaa o na Mawu si aloo o je e yi. (1 Kronika 29:10-13) E sa nɛ o sɔle ke o kɛ nyagbai kpe nɛ o hemi kɛ yemi he ka te si. (Lala 55:23; 120:1) E hi saminya kaa o maa sɔle loko o maa ye ni. (Mateo 14:19) Yehowa kɛ wa ba e ngɔ nɛ wa sɔle kɛ ha lɛ “daa.”—Efesobi 6:18.

6. E he hia nɛ wa sɔle waa, titli ke wa pee yayami nɛ hɛdɔ ngɛ he. Ngɛ be nɛ ngɛ kaa e nɔ mi ɔ, e sa kaa wa kpa Yehowa pɛɛ nɛ e na wɔ mɔbɔ konɛ e kɛ pa wɔ. Ke wa jaje wa he yayami kɛ tsɔɔ lɛ nɛ wa bɔ mɔdi konɛ wa ko kpale kɛ ya he e ko hu ɔ, Mawu ‘kɛ maa pa wɔ.’—Lala 86:5; Abɛi 28:13.

7. Yehowa buɔ dali anɔkuafohi pɛ a sɔlemi tue. Ke Mawu maa bu o sɔlemi tue ɔ, e sa kaa o bɔ mɔdi waa nɛ o hi si ngɛ e mlai a nya. (Abɛi 15:29; 28:9) E sa nɛ o ba o he si ke o ngɛ sɔle. (Luka 18:9-14) E sa nɛ o tsu nɔ nɛ o sɔle ɔ kɛ bi ɔ he ni. O kɛ lɔɔ maa tsɔɔ kaa o ngɛ hemi kɛ yemi nɛ nɔ nɛ o ngɛ de ɔ pɛpɛɛpɛ o ngɛ hlae ɔ nɛ. Be nɔ mi pɛ Yehowa maa ha o sɔlemi ɔ heto ɔ nɛ.—Hebribi 11:6.

Copyright © 2008 Watch Tower Bible and Tract Society of Pennsylvania. All rights reserved.