Haftaimanu Nai Siña Unsodda’ i Magahet na Relihion?

1. Si Jesus hatutuhon un magahet na relihion Christiano. Pues pa’go debi di unoha’ na tataotao, pat grupu, pot i magahet manman adodora guatu as Jehovah na Yuus. (John 4:23, 24; Ephesians 4:4, 5) I Biblia hafa’nana’gue na didide’ha’ na taotao man gaige gi dalalai na chalan para lina’la’.—Matthew 7:13, 14.

2. I Biblia hasañgan na despues de i finatai i man apostoles, timandinanche na fina’na’gue yan timanpraktikao che’cho’ christiano siha para uhinatme adumidide’ i inetnon Christiano. Taotao siha siñaha’ na uhakonne’ i manman hongge para ufandinalalak siha enlugat de i Kristo. (Matthew 7:15, 21-23; Acts 20:29, 30) Enao mina’ tali’e’ sen meggai diferentes relihion siha nui maganye komu Christiano. Haftaimanu nai siña taaidentifika i magahet na man Christiano?

3. I itmas yahululu’ na matkan i magahet na man Christiano i siha manguinahayi nui magahet na guinaiya gi entalo’ñiha. (John 13:34, 35) Timan mafa’na’gue para uhahasso na manmaolekña siha kinu i otru rasan taotao pat kulot lassas. Ni timan mafa’na’gue para uhachatli’e’ taotao siha ginen otru tano’. (Acts 10:34, 35) Entonses timan saonao siha gi gera. I man magahet siha na Christiano matrata uno yan otru komu che’lunñiha lahi yan palao’an.—1 John 4:20, 21.

Magahet na Christiano siha managuaiya uno yan otru, marespeta i Biblia, yan mapagat pot i Rainon Yuus

4. Otru ta’lo na matka pot i magahet na relihion i i miembro siha manguinahayi nui taddong respetu pot i Biblia. Maaksepta este komu i Palabran Yuus yan mahongge hafa i ilekña. (John 17:17; 2 Timothy 3:16, 17) Matrata i Fino’ Yuus komu mas impottantenña kinu i idean taotao pat kostumbre siha. (Matthew 15:1-3, 7-9) Machachage para uhafanla’la’ ginen i Biblia kada dia gi lina’la’ñiha. Entonses timapagat una kosa ya despues mapraktika otru.—Titus 1:15, 16.

5. I magahet na relihion nisisario lokkue’ na uonra i na’an Yuus. (Matthew 6:9) Si Jesus hana’matuñgo’ i na’an Yuus, as Jehovah, gi otru siha. I man magahet na Christiano nisisario na umacho’gue parehu. (John 17:6, 26; Romans 10:13, 14) Hayi siha na taotao gi komunidatmu nui hasañgane i otru siha pot i na’an Yuus?

6. I man Christiano siha nisisario na umapagat pot i Rainon Yuus. Si Jesus hacho’gue. Sessoha’ di kumuentos pot i Raino. (Luke 8:1) Hakomanda i man disipuluña para umapagat este i parehuha’ na mensahi gi hilo’ todu i tano’. (Matthew 24:14; 28:19, 20) I man magahet na Christiano mahongge na i Rainon Yuusha’ para una’fatto i magahet na pas yan seguridat para este i tano’.—Psalm 146:3-5.

7. I disipulun Jesus siha debi di tiufan patte pot este i tailayen sistema. (John 17:16) Timañasaonao siha gi sisteman politikat na funsion yan inakontran sociat siha. Masuhayi i manailaye na kondukta, bida siha, yan heniu siha nui man gaige gi halom i sistema. (James 1:27; 4:4) Kao siña unaidentifika i relihiosu na grupu gi komunidatmu nui guinahayi nueste na matka siha pot i magahet na Christianidat?

Copyright © 2006 Watch Tower Bible and Tract Society of Pennsylvania. All rights reserved.