Bajche’ mi mejlel a taj jini isujm bʌ ñopbalʌl

1. Jesús tsi’ yʌq’ue i tejchibal jini isujm bʌ ñopbalʌl. Ti ili q’uin wʌle cojach an junmujch’ xch’ujutesayajob i sujmlelo’ bʌ i cha’an Jehová Dios (Juan 4:23, 24; Efesios 4:4, 5). Jini Biblia mi’ yʌl cha’an ts’ita’ob jach woli bʌ i xʌñob majlel ti ch’o’ch’oc bʌ bij majlem bʌ ti laj cuxtʌlel (Mateo 7:13, 14).

2. Jini Biblia tsi’ wʌn alʌ, che’ tsa’ laj chʌmiyob jini apóstolob tsa’ caji ti c’unte’ ochel ya’ ti congregación cʌntesʌntel mach bʌ isujmic, yic’ot leco tac bʌ melbalʌl. Winicob tsa’ bʌ caji i pʌyob loq’uel xñopt’añob cha’an mi’ cʌy i tsajcañob Cristo (Mateo 7:15, 21-23; Hechos 20:29, 30). Jin cha’an mi laj q’uel yonlel ñopbalʌl tac mu’ bʌ i lon alo’ xñopt’añobʌch. ¿Bajche’ mi’ mejlel laj cʌn jini isujm bʌ xñopt’añob?

3. Jini wen cʌmbil bʌ ti’ tojlel jini isujm bʌ xñopt’añob, jiñʌch che’ mi’ wen c’uxbiñob i bʌ ti’ isujm (Juan 13:34, 35). Ma’anic cʌntesʌbilob, cha’an ñumen ñuc mi’ q’uelob i bʌ ti’ tojlel yambʌ winicob x’ixicob, año’ bʌ ti yambʌ tejclum o cha’an q’uexel i colorlel i pʌchʌlelob. Yic’ot ma’anic cʌntesʌbilob cha’an mi’ ts’a’leñob winicob x’ixicob año’ bʌ ti yambʌ tejclum (Hechos 10:34, 35). Che’ ja’el ma’anic mi yotsañob i bʌ ti guerra. Jini isujm bʌ xñopt’añob mi’ q’uelob i bʌ che’ bajche’ i yerañob i bʌ (1 Juan 4:20, 21).

Jini isujm bʌ xñopt’añob mi’ c’uxbiñob i bʌ, mi’ wen ch’ʌmob ti ñuc jini Biblia yic’ot mi’ subob i Yumʌntel Dios

4. Yambʌ marca bajche’ mi mejlel a cʌn jini isujm bʌ ñopbalʌl, jiñʌch che’ ma’ q’uel jini winicob x’ixicob mu’ bʌ i majlelob ya’i, mi’ wen ch’ʌmob ti ñuc jini Biblia. Mi’ q’uelob bajche’ i t’añʌch Dios yic’ot mi’ ñopob chuqui mi’ yʌl (Juan 17:17; 2 Timoteo 3:16, 17). Ti’ tojlelob jini i T’an Dios ñumen an i c’ʌjñibalob i cha’an, che’ bajche’ jach ña’tʌbalʌl o costumbre tac i cha’año’ bʌ winicob x’ixicob ila ti pañimil (Mateo 15:1-3, 7-9). Ti pejtelel q’uin mi’ cha’leñob wersa cha’an mi’ yajñelob bajche’ mi yʌl jini Biblia. Ma’anic chuqui mi subob mach bʌ muq’uic i melob (Tito 1:15, 16).

5. Jini mu’ bʌ i majlelob ya’ ti isujm bʌ ñopbalʌl yomʌch mi’ ñuq’uesʌbeñob i c’aba’ Dios ja’el (Mateo 6:9). Jesús tsi yʌc’ʌ ti cʌjñel i c’aba’ Dios, Jehová, che’ yom mi’ melob ja’el jini isujm bʌ xñopt’añob. ¿Majquiyob jini mu’ bʌ i subob i c’aba’ Dios ya’ baqui chumulet?

6. Jini isujm bʌ xñopt’añob yomʌch mi’ subob i Yumʌntel Dios. Jesús che’ʌch tsi’ mele. Jesús tsi’ chʌn subu jini i Yumʌntel Dios (Lucas 8:1). Yic’ot ja’el, tsi’ choco majlel jini xcʌnt’añob i cha’an, cha’an mi’ majlel i subob jini jach bʌ wen t’an ti’ petol Pañimil (Mateo 24:14; 28:19, 20). Jini isujm bʌ xñopt’añob mi’ ñopob cha’an mu’ bʌ caj i ch’ʌm tilel i ñʌch’tilel pañimil cojach jini i Yumʌntel Dios (Salmo 146:3-5).

7. Jini xcʌnt’añob i cha’an Jesús mach i cha’añobic ili jontol bʌ pañimil (Juan 17:16). Ma’anic mi yotsañob i bʌ yic’ot chuqui mi’ melob yumʌlob i ma’anic mi’ ch’icob i bʌ ti leto ila ti pañimil. Ma’anic leco bʌ i melbalob, melbalʌl tac mach bʌ uts’atic mi’ mel ili pañimil (Santiago 1:27; 4:4). ¿A cʌñʌ ba jatet jump’ejl ñopbalʌl ya’ baqui chumulet, an tac bʌ i cha’añob ili marca isujm bʌ xñopt’añob?

Copyright © 2009 Watch Tower Bible and Tract Society of Pennsylvania. All rights reserved.