¿Chuqui mi caj i mel Dios ila ti Pañimil?

1. Jehová tsi’ mele ili Pañimil cha’an tijicña mi’ chumtʌlob winicob x’ixicob ti pejtelel ora tsi’ lon alʌ. Jin yom tsi’ lon alʌ che’ chʌn chumul winicob x’ixicob tojo’ bʌ yic’ot tijicñayob (Salmo 115:16; Isaías 45:18). Jini Pañimil ma’anic ba’ ora mi caj i jisʌntel; mi caj i yajñel ti pejtelel ora (Salmo 104:5; Eclesiastés 1:4).

2. Che’ bʌ maxto i mele jini winic, Dios tsi’ yajca che’ joytʌl jini Pañimil, tsi’ sujtesa ti wen i t’ojol jax bʌ paraíso i tsi’ yotsabe i c’aba’ «pʌc’ʌbʌl jini Edén». Ya’ tsi’ yʌc’ʌ jini ñaxan bʌ winic yic’ot ñaxan bʌ x’ixic: Adán yic’ot Eva. Dios tsi’ yʌlʌ mi mejlel i yʌc’o i yalobil cha’an mi’ but’ob jini Pañimil. Che’iqui c’unte’ c’unte’ tsi’ sujtesayob ti’ petol ili Pañimil ti jump’ejl paraíso (Génesis 1:28; 2:8, 15).

Jini paraíso sajtem bʌ

3. Adán yic’ot Eva tsi’ cha’leyob mulil come tsi’ ñusʌbeyob i mandar Dios, anquese yujilob cha’an mach wenic. Cha’an ti’ caj i mulob, Jehová tsi’ choco loq’uel ya’ ti pʌc’ʌbʌl, jini cha’an paraíso tsa’ sajti (Génesis 3:1-6, 23). Pero Jehová, ma’anic ñajʌyem i cha’an chuqui mi caj i mel ila ti Pañimil. Mi’ wʌn al cha’an mi caj i cha’ sujtesan, ti jump’ejl paraíso baqui mi’ chumtʌl winicob x’ixicob ti pejtelel ora. ¿Bajche’ mi caj i mel? (Salmo 37:29.)

4. Che’ maxto paraísojic ili Pañimil, yom mi’ ñaxan jilel jini xjontolilob (Salmo 37:38). Iliyi mi’ cajel ti ujtel ti Armagedón, jiñʌch i guerra jini Dios cha’an mi’ jisan jini jontolil. Che’ jini, Satanás mi’ cajel ti ñujp’el mil jab, mu’ bʌ i yʌq’ueñonla lac ch’ʌmben isujm, cha’an ma’anic mi’ cajel ti cʌlel mi juntiquilic xjontolil cha’an mi’ yʌsin jini Pañimil. Cojach mi’ cajel ti cʌlel jini i tejclum Dios (Apocalipsis 16:14, 16; 20:1-3).

5. Che’ jini Jesucristo mi’ cajel ti yumʌntel mil jabil ti’ tojlel año’ bʌ ila ti Pañimil (Apocalipsis 20:6) i c’unte’ c’unte’ mi caj i jisan jini mulil ti lac ña’tʌbal yic’ot ti lac bʌc’tal. Mach chʌn anix lac mul, mi caj la cajñel che’ bajche’ Adán yic’ot Eva ti ñaxan, che’ maxto i cha’leyob mulil. Che’ jini ma’anix mi’ chʌn cajel c’amʌjel, ñox’ajel mi jinic to chʌmel. Jini xc’amʌjelob mi caj i lajmelob yic’ot jini ñoxobix bʌ mi’ cajelob ti’ cha’ sujtel ti’ ch’itonlel (Job 33:25; Isaías 33:24; Apocalipsis 21:3, 4).

6. Che’ woli ti Yumʌntel Jesús Mil jabil, jini winicob x’ixicob xuc’ulo’ bʌ mi’ cajelob ti e’tel, cha’an mi’ sutq’uiñob ti’ petol ili Pañimil ti jump’ejl paraíso (Mateo 5:5). Yic’ot ja’el, wen yonlel chʌmeño’ bʌ mi’ cajel i cha’ tejchelob ch’ojyel yic’ot mi’ cajelob ti cha’ chumtʌl ila ti Pañimil (Hechos 24:15). Mi muc’ʌch i melob chuqui mi’ c’ajtin Dios ti’ tojlelob, mi’ cajelob ti chumtʌl ti pejtelel ora ila ti Pañimil. Pero mi mach che’iqui, mi caj i jisʌntelob ti pejtelel ora (Juan 5:28, 29; Apocalipsis 20:11-15).

7. Che’ʌch mi’ cajel ti ts’ʌctiyel chuqui tsi’ ña’ta i mel Dios ila ti Pañimil ti’ tejchibal. ¿Mu’ ba a mulan a taj bendición tac ti ili tal to bʌ q’uin? Mi che’ʌchi, yom ma’ chʌn cha’len wersa cha’an ma’ chʌn cʌn majlel jini Jehová yic’ot cha’an ma’ chʌn jac’ben i mandar. Mu’ bʌ caj mejlel i coltañet ti’ melol jini, jiñʌch che’ ma’ majlel ya’ ti tempa bʌ mu’ bʌ i yujtel ya’ ti Yotlel Tempa bʌ i cha’an i Testigojob Jehová ya’ ti a lumal (Isaías 11:9; Hebreos 10:24, 25).

Che’ mi’ ñumel jini Armagedón, jini Pañimil mi’ caj i sujtel ti jump’ejl paraíso

Copyright © 2009 Watch Tower Bible and Tract Society of Pennsylvania. All rights reserved.