¿Majqui jini Dios?

1. Jini winicob x’ixicob cabʌl chuqui mi’ ch’ujutesañob. Pero, jini Biblia mi’ subeñonla cha’an an jach juntiquil ISUJM BΛ Dios. I melbal ti’ pejtelel chuqui an ti panchan, yic’ot ila ti Pañimil, yic’ot tsi’ yʌq’ueyonla laj cuxtʌlel, cojach ti’ bajñelil yom mi lac ch’ujutesan (1 Corintios 8:5, 6; Apocalipsis 4:11).

2. Anquese Dios an cabʌl bajche’ mi’ pejcʌntel, cojach an jump’ejl i c’aba’: JEHOVÁ. Ti cabʌl Biblia tsa’ix i yʌpbeyob i c’aba’ jini Dios i tsi’ q’uextʌbeyob ti lac Yum o Dios. Pero, che’ bʌ tsa’ ts’ijbunti jini Biblia, ¿jaysujtel tsa’ tajle jini c’aba’ Jehová? Ñumen ti siete mil (Éxodo 3:15; Salmo 83:18).

3. Jehová an i bʌc’tal, anquese mach lajalic bajche’ lac cha’an. «Dios Espíritujʌch», che’ mi yʌl jini Biblia (Juan 4:24). I cuxtʌlel juntiquil espíritu ñumen ñuc bajche’ lac cha’an. Mi juntiquilic wʌ’ bʌ an ti pañimil q’uelel i cha’an Dios. Anquese Jehová chumul ti panchan, pero mi’ mejlel i lu’ q’uel ti’ pejtelel (Salmo 11:4, 5; Juan 1:18). ¿I chuqui jini ch’ujul bʌ espíritu? Mach juntiquilic lac pi’ʌl, bajche’ Dios, jiñʌch i p’ʌtʌlel Dios (Salmo 104:30).

4. Jini Biblia mi’ subeñonla bajche’ yilal jini Jehová. Mi’ yʌl cha’an jini wen uts’at bʌ an i cha’an jiñʌch c’uxbiya, i tojel, i ña’tʌbal yic’ot i p’ʌtʌlel (Deuteronomio 32:4; Job 12:13; Isaías 40:26; 1 Juan 4:8). Yic’ot ja’el mi’ yʌl cha’an xp’untaya, uts i pusic’al, xñusa mulil, p’ejw i yujil pijtaya. Che’ bajche’ xjac’ t’an bʌ i yalobilonla, yom mi lac ñop lac lajin (Efesios 5:1, 2).

Ya’ ti Biblia yic’ot che’ mi laj q’uelben i melbal mi’ mejlel lac wen cʌn Dios

5. ¿Yom ba mi lac c’uchchocon lac bʌ ti’ tojlel imágen tac yic’ot yan tac bʌ? Mach wenic (Éxodo 20:4, 5). Jehová mi yʌl cha’an cojach yom mi lac ch’ujutesan. Ma’anic mi’ t’ox i ñuclel yic’ot yaño’ bʌ mi jinic yic’ot mach bʌ cuxulic. Yic’ot ja’el, jini imágen tac ma’anic i p’ʌtʌlel cha’an mi’ coltañonla (Salmo 115:4-8; Isaías 42:8).

6. ¿Bajche’ mi’ mejlel lac ñumen cʌn Dios? Junchajp jiñʌch che’ mi laj q’uel chuqui tac tsi’ mele, yic’ot mi lac wen ña’tan chuqui mi yʌq’ueñonla lac ch’ʌmben isujm jini. I melbal tac Dios mi’ pʌsbeñonla cha’an wen an i p’ʌtʌlel yic’ot i ña’tʌbal. Ti pejtelel chuqui tac tsa’ bʌ i mele mi laj q’uelben i c’uxbiya (Salmo 19:1-6; Romanos 1:20). Yambʌ bajche’ mi mejlel laj cʌn Dios, jiñʌch che’ mi lac chajpan jini Biblia. Ya’i mi’ ñumen subeñonla bajche’ yilal bʌ Dios. Yic’ot ja’el mi’ subeñonla chuqui mi caj i mel yic’ot chuqui yom mi lac mel (Amós 3:7; 2 Timoteo 3:16, 17).

Copyright © 2009 Watch Tower Bible and Tract Society of Pennsylvania. All rights reserved.