 |
Beliefs | Future | Medical | Topics | Contact Us | Publications | Languages |
Alimwi amubale
IBWIINGUZI bwakasimpe kujatikizya nzi? Kujatikizya mibuzyo imwi iiyandika kapati njobabuzya bantu mubuumi bwabo. Ambweni kuli nomwakalibuzyide mibuzyo iili mbuli bwayeeyi:
Ino nkuukuli nkomukonzya kujana bwiinguzi bwamibuzyo eeyi? Ikuti naa mwaya kumaanda nkobayobweda mabbuku naa kumantoolo nkobasambalila mabbuku, mulakonzya kujana zyuulu-zyuulu zyamabbuku aambwa kuti ajisi bwiinguzi bwamibuzyo eeyi. Pele ibunji bwaziindi mabbuku aaya alakazyanya. Aamwi inga kaabeleka aciindi eeco pele muciindi buyo cisyoonto alaleka kubeleka aboobo alalembululwa naa kunjililwa busena.
Nokuba boobo, kuli bbuku lyomwe lijisi bwiinguzi busyomeka. Eelyo ndibbuku lyakasimpe. Jesu Kristo naakali kupaila kuli Leza, wakati: “Ijwi lyako mbobwini.” (Johane 17:17) Mazubaano, Ijwi eelyo tulizyi kuti ndi Bbaibbele Lisalala. Amapeeji aatobela, mulajana bwiinguzi bwamu Bbaibbele ibulimvwisya alimwi busyomeka kujatikizya mibuzyo iili atala aawa.
ICIPA KUBUZYA BOOBU: Tupona munyika iizwide lunya alimwi akutalulama. Zikombelo zinji ziyiisya kuti mapenzi aatusikila nkuyanda kwa Leza.
NCOLIYIISYA BBAIBBELE: Leza kunyina pe natalisya bubi. Lugwalo lwa Jobu 34:10 lwaamba kuti: “Kacili kule a-Leza kuti acite bubi, akuli-Singuzuzyoonse kuti alubizye.” Leza ujisi makanze mabotu kapati kubantu. Nkakaambo kaako Jesu ncaakatuyiisya kupaila kuti: “Taateesu ooli kujulu, . . . abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:9, 10) Leza ulatubikkila maanu kapati cakunga wakasweekelwa kunji kutegwa makanze aakwe azuzikizyigwe ncobeni.—Johane 3:16.
Alimwi amubale Matalikilo 1:26-28; Jakobo 1:13; a 1 Petro 5:6, 7.
ICIPA KUBUZYA BOOBU: Bantu banji bacifwa ankondo. Toonse tulakopana akaambo kakupenga kwabantu.
NCOLIYIISYA BBAIBBELE: Leza usinsima kuti ciindi ciyoosika nayooleta luumuno munyika yoonse. Mu Bwami bwakwe, imfwulumende yakujulu, bantu “tabakooyooiya inkondo limbi pe.” Muciindi caboobo, “bayoofula mapanga aabo [kuti] abe maamba aakulimya.” (Isaya 2:4) Leza uyoomanizya kutalulama akupenga koonse. Ibbaibbele lisyomezya kuti: “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale [kubikkilizya akutalulama alimwi akupenga kwamazubaano] zyamaninina.”—Ciyubunuzyo 21:3, 4.
Alimwi amubale Intembauzyo 37:10, 11; 46:9; a Mika 4:1-4.
ICIPA KUBUZYA BOOBU: Zikombelo zinji munyika ziyiisya kuti muuya uuli mumuntu ulazumanana kupona wafwa mubili. Ibamwi basyoma kuti myuuya yabasyaanene besu ibakafwa ilakonzya kubagwasya naa kubapenzya baumi. Mpoonya bamwi basyoma kuti Leza ulabasubula basizibi kwiinda mukubaumpa mumulilo uungwilima mane kukabe kutamani.
NCOLIYIISYA BBAIBBELE: Nobafwa bantu, balaleka kupona. Tabakonzyi kumvwa, kubona, kwaambaula naa kuyeeya cintu cilicoonse. Lugwalo lwa Mukambausi 9:5 lwaamba kuti: “Bafwide tabezi cintu niciba comwe.” Mbwaanga bafwide tabakonzyi kuzyiba, kulimvwa munzila imwi naa kumvwa cintu cili coonse, kunyina nobakonzya kupenzya—naa kugwasya—baumi.—Intembauzyo 146:3, 4.
Alimwi amubale Matalikilo 3:19 a Mukambausi 9:6, 10.
ICIPA KUBUZYA BOOBU: Buumi tulabuyanda, alimwi tuyanda kuti katukkomana mubuumi antoomwe abayandwa besu. Ncilengwa buya kulombozya kuti kubota buzuba bumwi tukabonane alimwi abayandwa besu bafwide.
NCOLIYIISYA BBAIBBELE: Ibunji bwabantu bafwide baya kubusyigwa. Jesu wakasyomezya kuti: “Boonse abali muzyuumbwe, bayoozwa.” (Johane 5:28, 29) Kweelana amakanze ngaakajisi Leza kumatalikilo, aabo baya kubusyigwa bayooba acoolwe cakupona muparadaiso anyika. (Isaya 65:21-25) Cisyomezyo eeci cibikkilizya ikuba abuumi bulondokede alimwi butamani kubantu baswiilila. Ibbaibbele lyaamba kuti: “Balulami bayookona nyika, bayookala alinjiyo lyoonse.”—Intembauzyo 37:29.
Alimwi amubale Jobu 14:14, 15; Luka 7:11-17; a Incito 24:15.
ICIPA KUBUZYA BOOBU: Ibunji bwabantu muzikombelo zyoonse balapaila. Nokuba boobo, ibanji bayeeya kuti mipailo yabo tayiingulwi.
NCOLIYIISYA BBAIBBELE: Jesu wakatuyiisya kuti notupaila tatweelede kubelesya majwi ngeena cakwiinduluka-induluka. Wakati: “Mukukomba kwanu mutaindululi.” (Matayo 6:7) Ikuti katuyanda kuti Leza aswiilile mipailo yesu, tweelede kupaila munzila njayanda walo. Kutegwa tucite oobo, tweelede kwiiya makanze aa Leza mpoonya akupaila kweelana amakanze aayo. Lugwalo lwa 1 Johane 5:14 lupandulula kuti: “Na twakumbila kufumbwa cintu cili buti cili mbuli makanze [aa Leza], ulatumvwa.”
Alimwi amubale Intembauzyo 65:2; Johane 14:6, 14; a 1 Johane 3:22.
ICIPA KUBUZYA BOOBU: Bantu banji bayeeya kuti mali, mpuwo naa kubota ciwa kulakonzya kubapa kukkomana. Aboobo, balalitakata kuyandaula zintu eezyi—pele tabakkomani pe.
NCOLIYIISYA BBAIBBELE: Jesu wakaamba nzila iisololela kulukkomano naakati: “Balikkomene aabo bazyi kuti bayandika zintu zyakumuuya.” (Matayo 5:3, NW) Lukkomano lwini-lwini lulakonzya kujanwa lilikke ikuti naa twabweza ntaamu yakuzuzikizya cintu ncotuyandika kapati—kulombozya nkotujisi kwakuyanda kuzyiba kasimpe kajatikizya Leza amakanze ngajisi kulindiswe. Kasimpe aako kajanika mu Bbaibbele. Ikuzyiba kasimpe aako kulakonzya kutugwasya kubona cintu ciyandika ncobeni aceeco citayandiki. Kusololelwa akasimpe kamu Bbaibbele notusala akucita zintu kulakonzya kutupa kukkomana kapati mubuumi.—Luka 11:28.
Alimwi amubale Tusimpi 3:5, 6, 13-18 a 1 Timoteo 6:9, 10.
Oobu mbwiinguzi bwamu Bbaibbele bufwaafwi buyo kumibuzyo iili cisambomwe. Sena mulayanda kuzyiba twaambo atumbi? Ikuti naa muli umwi wabaabo “bazyi kuti bayandika zintu zyakumuuya,” nkokuti mulayanda. Ambweni muyanda kuzyiba bwiinguzi bwamibuzyo aimbi mbuli yakuti: ‘Ikuti naa Leza ulatulanganya, nkaambo nzi ncaalekela bubi akupenga kapati mubuumi bwabantu? Mbuti mbondikonzya kupa kuti buumi bwamukwasyi wangu bubote?’ Ibbaibbele lilapa bwiinguzi buzwide alimwi bukkazika moyo kumibuzyo eeyi alimwi amibuzyo iimbi minji.
Nokuba boobo, mazuba aano ibanji balawaya-waya kulanga-langa ncolyaamba Bbaibbele. Bayeeya kuti bbuku eeli ndipati kapati alimwi zimwi ziindi lilakatazya kumvwa. Sena mulayanda lugwasyo lwambomukonzya kujana bwiinguzi mu Bbaibbele? Bakamboni ba Jehova bajisi nzila zyobilo nzyobabelesya izikonzya kumugwasya.
Nzila yakusaanguna, ndibbuku lya Ino Ncinzi Cini Bbaibbele Ncoliyiisya? ilyakalembelwa kugwasya bantu babbaatidwe kutegwa bakonzye kulanga-langa bwiinguzi bwamu Bbaibbele bulimvwisya kujatikizya mibuzyo iiyandika kapati. Nzila yabili, mbubambe bwaciiyo ca Bbaibbele caaŋanda citabbadelelwi. Kakunyina kumubbadelesya, umwi wa Bakamboni ba Jehova iweelela kuyiisya Bbaibbele ooko nkomukkala ulakonzya kumuswaya aŋanda yanu naa kubusena bumwi buli kabotu akubandika makani aamu Bbaibbele andinywe kwaciindi buyo cisyoonto amvwiki. Bantu babalilwa kutuulunzuma munyika yoonse bagwasyigwa kale abubambe oobu. Mukukosola makani, ibunji bwabo balaamba calukkomano ategwa: “Ndakajana kasimpe!”
Akati kazintu ziyandisi nzyomukonzya kujana, kasimpe nkakayandika kapati. Kasimpe kamu Bbaibbele kalatwaangulula kukusyoma mizimo, kunyongana mumizeezo alimwi abukandu. Katupa kuba abulangizi, makanze alimwi alukkomano. Jesu wakati: “Muyooziba bwini, abwalo bwini buyoomunununa.”—Johane 8:32.
Kakamwaigwa mu 2008 |
 |