Tsy Mentsy Madio ny Mpanompon-Jagnahary

1. Zagnahary madio sady manan-kasigna i Jehovah. Ny fahadiôvagna ny raha angahoiny amin’ampivavaka aminanjy. Tafiditra amin-jegny madio ara-pagnahy, ara-pitondran-tegna, ara-tsegna, avakeo ara-batagna. (1 Petera 1:16) Ilentsika ny mifegna mafy mbôra hadio foagna akeo agnatrehan-Jagnahary. Mipetraka aketo amy tontolo reka maloto antsika. Môra magnano raha tsy manjary koà antsika, ka tsy mentsy miady amin-jegny. Tsy tôkony hagneky ho resy anefa antsika.

2. Fahadiôvagna ara-pagnahy: Tsy azontsika arahigna koaza reo fampianaragna na fômba fanoina fivavahagna tsy marigna, izikoà tiantsika ny hanompo an’i Jehovah. Tsy mentsy hialantsika ny fivavahagna tsy marigna sady tsy hanôhagna an’izy regny antsika na amin’ino na amin’ino. (2 Korintianina 6:14-18; Apokalypsy 18:4) Tsy mentsy mitandrigna antsika mbôra tsy ho voafitaky ny ôlogna mampianatra lenga, izikoà vô fantatsika ny marigna mikasika an-Jagnahary.—2 Jaona 10, 11.

3. Fahadiôvagna ara-pitondran-tegna: Tian’i Jehovah hadio fitondran-tegna foagna ny ampivavaka aminanjy. (1 Petera 2:12) Hitany aby zegny raha anointsika sambà avòny aza. (Hebreo 4:13) Tôkony halavirintsika aby ny fitondran-tegna maloto avakeo reo raha maloto hafa fanoigna aketo amy itô tontolo itô.—1 Korintianina 6:9-11.

4. Fahadiôvagna ara-tsegna: Hadio fitondran-tegna antsika, izikoà ampidirantsika raha madio agnaty segnantsika. (Filipianina 4:8) F’izikoà tsy miala amin-draha maloto ndreka segnantsika, de hahefa raha tsy manjary antsika. (Matio 15:18-20) Tôkony halavirintsika ny fialam-boly mety handoto segnantsika. Ho feno raha madio segnantsika izikoà mianatra ny Tenin-Jagnahary antsika.

5. Fahadiôvagna ara-batagna: Tôkony hadio foagna ny vatagna amboàny raha tafiany Kristianina, satrià solontegnan-Jagnahary zareo. Tôkony hanasa tagnana antsika izikoà avy agny an-kabone, avakeo izikoà fa handeha hihinagna na koà hikarakara hanigna. Izy koà anô tsisy kabone, de tôkony havarigna agnaty lavaka ny maloto de avakeo totôfagna. (Deoteronomia 23:13, 14) Mahasalama ny fahadiôvagna ara-batagna. Tôkony hilamigna sady hadio ny tragnona Kristianina, na akô agnatiny na agny avelagny. Tôkony ho falentahaka akeo an-tanàgna ny tragnontsika.

6. Koragna madio: Tsy mentsy mizaka ny marigna foagna ny mpanompon-Jagnahary. Tsy hiditra akô amy Fanjakan-Jagnahary ny ampandenga. (Efesianina 4:25; Apokalypsy 21:8) Tsy magnano koragna tsy manjary ny Kristianina, na kosiàka mahamegnatra, na koà tantara maloto. Samby tsy tandrignesiny sady tsy avoakany vavany raha jiaby reo. Miavaka zareo agny am-piasagana, agny am-pianaragna avakeo amy magnodidigna noho ny koragnan-jareo madio.—Efesianina 4:29, 31; 5:3.

Tsy mentsy madio amy lafiny jiaby ny mpanompon-Jagnahary

Copyright © 2009 Watch Tower Bible and Tract Society of Pennsylvania. All rights reserved.