 |
Beliefs | Future | Medical | Topics | Contact Us | Publications | Languages |
Béñge yag
MALIGA inoñnaga ni ki? Inoñnaga ni ngim mambadga i nlôôha nseñ le bôt ba binam ba mbadba. Bebeg le u ma badba inya mambadga ini le:
He homa u nla léba ndimbhe i mambadga mana? Ikété bisabe bi nuñul bikaat u nla kop dikôô di bikaat bi ntôô le bi gwé mandimbhe. Ndi mangéda mape kaat yada i neebe bé yom ini ipe i nkal. Bipe bi nla bana ndimbhe hanano ndi i sôk nene le bi ntagbe ngéda, bi nlama bôñglana tole héñhana.
Ndi ngim kaat i yé le i gwé mintiig mi mandimbhe. I yé kaat maliga. Yésu Kristô a kal Djob ikété masoohe le: “Bañga yoñ i yé maliga” (Yôhanes 17:17) I len ini, i Bañga i i ñyiba kikii Kaat Nyambe. I mapep ma noñ ha, u nlôg tehe mintiig mi mamdimbhe Bibel i nti inoñnaga ni mambadga di ntip sima.
INYUKI MBADGA I MBÉDA: Di niñil ikété nkoñ isi u yé ñyonog ni béba ni ngi telepsép. Ngandak bibase i niiga le mandutu di gwé ma yé sômbôl i Djob.
I YOM BIBEL I NIIGA: Djob a mboñ bé béba kel ki kel. Hiôb 34:10 a nkal le: “Hala a yé noonog ni Djob i boñ béba, to ni Nu Ngui yosôna i boñ jam li té bé sép!” Djob a gwé ngôôba lam inyu bôt ba binam. Inyu hala nyen Yésu a niiga bés i soohe le: “A Tata wés nu a yé i ngii . . . ane yoñ i loo. Sômbôl yoñ i bôña hana isi kikii i mbôña i ngii.” (Matéô 6:9, 10) Djob a ntôñ toi ni bés i nya yé le a bi sal inyu boñ le ngôôba yé i yon ni toi.—Yôhanes 3:16.
Béñge yag Bibôdle 1:26-28; Yakôbô 1:13; ni 1 Pétrô 5:6, 7.
INYUKI MBADGA I MBÉDA: Gwét bi ngi nolog bôt i nya i mbuma nsoñgi. Ndutu i ma tihba hiki wada wés.
I YOM BIBEL I NIIGA: Djob a mbôn le kel y’a kola i ngéda a’ lona nsañ lôñ ni nkoñ isi wonsôna. I si Ane yé i i yéne i ngii bôt ba binam ba ga “nigil ha bé gwét.” Ndi ba ga “ôô pa minsoñ yap disoo.” (Yésaya 2:4) Djob a ga mélés mintén mi ngi telepsép ni mi mandutu ñwomisôna. Bibel i mbôn le: “[Djob] a’ tos gwiiha gwobisôna mis map, nyemb y’a ba ha bé, to malep to nlondok, to njiiha ki b’a ba ha bé. Inyule mam ma bisu [yag ngi telepsép ni mandutu ma len ini] ma mal tagbe.”—Masoola 21:3, 4.
Béñge yag Hiémbi 37:10, 11; 46:9; ni Mika 4:1-4.
INYUKI MBADGA I MBÉDA: Ngandak i bibase i nkoñ isi i niiga le ngim yom ikété mut i ñyégle i niñ i mbus nyemb. Bipe bi ntôô le bawoga ba nla boñ bayômi béba, tole Djob a mponos bibéba bibôt ni njel i njiiha ikété bee i hié boga ni boga.
I YOM BIBEL I NIIGA: Ngéda mut a ñwo, wee niñ yé i mal. Ñañal 9:5 a nkal le: “Bawoga . . . ba ñyi bé jo ki jo.” Kikii bawoga ba ñyi bé jam, ba nôgda bé to yom ndina ni boñ jo ki jo, wee ba nla bé boñ bayômi béba—to hôla—bo.—Hiémbi 146:3, 4.
Béñge yag Bibôdle 3:19 ni Ñañal 9:6, 10.
INYUKI MBADGA I MBÉDA: Di ngwés niñ, di banga ki ngôñ i niñ ikété masé lôñ ni bet di ngwés. Ngôñ yés i pala tehe bawoga bés di bé gwés i kôli.
I YOM BIBEL I NIIGA: Ngandak bôt i i bi wo y’a tuge. Yésu a bôn le: “bet ba yé ikété soñ i mbigda ba ga . . . pam.” (Yôhanes 5:28, 29) Inoñnaga ni ngôôba i Djob i bibôdle, i bôt ba ga tuge b’a niñil ikété paradis hana isi. (Lukas 23:43) Mimbônga mini mi ga lona yag mbôô ni niñ boga inyu bôt ba manôgla. Bibel i nkal le: “Bôt ba té sép b’a kôdôl hisi, ba yén ki mu i boga”—Hiémbi 37:29.
Béñge yag Hiôb 14:14, 15; Lukas 7:11-17; ni Minson mi Baôma 24:15.
INYUKI MBADGA I MBÉDA: Bôt ikété bebee le bibase gwobisôna ba nsoohe. Ndi inyu ngandak i neene bo le masoohe map ma nkôhna bé ndimbhe.
I YOM BIBEL I NIIGA: Yésu a bi niiga bés le di nlama bé tiimba minlélém mi bibuk ikété masoohe més. A bi kal le: “Ngéda ni nsoohe, ni tiimba bañ minlélém mi gwom hiki ngéda.” (Matéô 6:7) Ibale di nsômbôl le Djob a emble masoohe més, di nlama soohe kikii a ngwés. Inyu boñ hala, di nlama nigil kii yé sômbôl i Djob, le ndi di soohege inoñnaga ni yo. Kaat i Yôhanes i bisu 5:14 i ntoñol le: “Ibale di ñyagal jam kingéda sômbôl i [Djob] a nôgôl bés.”
Béñge yag Hiémbi 65:2; Yôhanes 14:6, 14; ni 1 Yôhanes 3:22.
INYUKI MBADGA I MBÉDA: Ngandak bôt i nhoñol le moni, bañga libag tole bilama bi nti bo masé. Kikii ba noñ mam mana la nyen ba ntehe le masé ma nke bo ngwé.
I YOM BIBEL I NIIGA: Yésu a bi éba kii di nla boñ inyu kôhna masé ngéda a kal le: “Bayébél i mbu ba yé minsaibag.” (Matéô 5:3) Di nla ndig kôhna bañga masé ibale di neebe i yônôs ngôñ yés i yi, hala wee ngoñ yés i yi Djob ni i yi sômbôl yé inyu yés. Maliga ma ma yéne ikété Bibel. Liyi maliga ma li nla hôla bés i yi yom i gwé nseñ ni i i gwé bé nseñ. Ibale di ume maliga ma Bibel le mon ma éga makidik més ni magweleg més, hala a ga boñ le niñ yés i ba nseñ.—Lukas 11:28.
Béñge yag Biñgéñgén 3:5, 6, 13-18 ni 1 Timôtéô 6:9, 10.
Mam mana ma yé ndig ndék mandimbhe Bibel i nti inyu ma mambadga masamal. Ba u gwé ngôñ i yi iloo ha? Ñ ibale u yé i nsoñgi u “bayébél i mbu”. Mambadga mape ma nla lo we ikété ñem kikii bo: ‘Ibale Djob a ntôñ toi ni bés inyuki a bi ume béba ni mandutu nwii ndi nwii? Lelaa me nla tibil lémés niñ i lihaa jem?’ Mana mambadga ni mape ki, Bibel i ntimbhe mo i nya i kôli ni i nkôhna masé.
Ndi to hala ngandak i mpala bé béñge Bibel. Ba ntehe yo kikii soso kaat nu a nlet i nog mangéda mahogi. Ba u gwé ngôñ ni mahôla inyu léba ndimbhe ikété Bibel? Mbôgi i Yéhôva i gwé manjel ima ma nla hôla we.
Njel i bisu i yé kaat ba nsébél le, Kii Djob a mbat le di boñ? I yé ha inyu hôla bôt ba pégi i béñge mintiig mi mandimbhe Bibel i nti inyu mambadga ma niñ. Njel i ñyônôs iba i yé yigil i Bibel i mbai yoñ. Mbôgi Yéhôva bebee ni mbai yoñ i kôli niiga i nla lo weni, tole homa numpe nu a nlémél we, le ni yoñ ndég ngéda we ni nye hiki sonde inyu wan Bibel i ba bé nsaa. Didun di bôt ni homa nyensôna i nkoñ isi di bi kôs nseñ ni njel i yigil ini. Ngandak i bi sôg i kal ni masé le: “Me nléba maliga!”
Bañga lisôô li nkus lipe li nloo ha li ta bé. Maliga ma Bibel ma ñyilha bés ngwélés i kolba bihémle bibe, biyubda ni woñi mbe. Ma nti bés botñem, masé, ma tinag ki niñ yés nseñ. Yésu a kal le: “N’a yi maliga, ndi maliga m’a yilha bé ngwélés.”—Yôhanes 8:32.
Ntilbaga i 2008 |
 |