Kalipönök ti Ŋun Ködyö Gwon a Loke

1. Yekowa Ŋun a loke parik. Lepeŋ yiyinikin kakwakwasak kanyit i gwon a loke—i mulökötyo, i gwiliŋit, i yeyeesi, ko i mugun. (1 Petero 1:16) Gwoloŋ a loke ko Ŋun i konyen ’de’dekan kita parik ’diri gwak. Yi kulo gwon i kak nagon alut. Yi köti gwon i mörju ko riŋit i kö’yu na belesi kayaŋ i kondya na toron. Ama ti yi tine kölökin asut.

2. Loke i Mulökötyo: Ko yi ’de’dekan kitakindya Yekowa, yi ti bulö ’depakindya i mogga na kune todinesi kode lötiöt ti keriat logon a ti ’burönö. Ti yi lupundi ta kaŋo i keri lo ’burönö ko an yi ŋarakindya nye i lele kiko. (2 Korinto 6:14-18; Kweyatti 18:4) Ko yi aje jujumbu to’diri na kulya ti Ŋun, ti yi medi ta ’bura an yi togiraji ko ŋutu lo todindyö ’burönö.—2 Yoane 10, 11.

3. Loke i Gwiliŋet: Yekowa ’de’dekan kakwakwasak kanyit i kondya gwoso Kristianijin ti tugwakan i diŋitan liŋ. (1 Petero 2:12) Lepeŋ memet ŋo liŋ nagon yi kokon, ma’di i lwönö. (Ebere 4:13) Ti yi gwe pajo i kulya ti lubö ko i konesi narok ti na kak.—1 Korinto 6:9-11.

4. Loke i Yeyeesi: Ko yi tojore’yu kusik kayaŋ ko yeyeesi nake, gwiliŋit likaŋ köti gwogwon a loke. (Pilipoi 4:8) Ama ko yi yeŋon i ŋo nagon a lut, ruket nanyit mo gwon a konesi narok. (Matayo 15:18-20) Ti yi gwe pajo i gweyarijin ti tulyöŋesi lo toluddya kwinyit kayaŋ. Yi bubulö tojore’yu kwinyit kayaŋ ko yeyeesi nake i kiko lo jujumbu na Kulyaet lo Ŋun.

5. Loke i Mugun: Kogwon se gwo’dan i pirit na Ŋun, Kristianijin ködyö ’dep mugunya ko boŋgwat kase a nake. Yi agu ködyö lala könisi kayaŋ i mukök na kitari yi kadi kaŋoet, ko ti yi lalane se i ŋerot na nyesu kode mogga na kinyo. Ko do ’bak pirit na jujukin ’delani lut na po i mugun, lut kaŋoesi ködyö nunuka. (Nyökit 23:12, 13) Tiju na mugun a nake ŋaŋarakindya i ’busan na mugun. ’Baŋ na Kristianityo ködyö gwon a nake ko kwekwelen i lukata ko kaŋo köti. Ti nye agu ködyö puruu kaŋo gwoso miret na’but i midijik nagwon nyona.

6. Loke i Jame: Kalipönök ti Ŋun ködyö jambu to’diri i diŋitan liŋ. ’Burönök mo ti lupö i Tumatyan na Ŋun. (Epeso 4:25; Kweyatti 21:8) Kristianijin ti tokitaju jamesi narok. Lepeŋat ti pokin i yiŋga kode i kekendya na biryeesi kode likikirilön logon a lut. Kogwon kulya ti jambu nase nake, a tuka’de nase puruun kaŋo i pirit na kita kode i sukulu ko i midijik nagwon kase nyona.—Epeso 4:29, 31; 5:3.

Kalipönök ti Ŋun ködyö gwon a loke i ŋo liŋ

Copyright © 2006 Watch Tower Bible and Tract Society of Pennsylvania. All rights reserved.