Ŋa Logwon a Kaŋöönit?

1. Kulyaet logon a “kaŋöönit” nyönyögu ŋuto lo tuggö ’burönö naŋon i kulya ti lele ŋuto. “Satani” nyönyögu miriku kode ka’dö’döyönit. Kilo a kulyaesi logon a tiki miriku lo Ŋun duma. I suluet, lepeŋ köju a malaikatat loke logwon ko Ŋun yu ki. Ama, i mukök lepeŋ a yeyeju ŋo dumalak parik i kulya ti mugun nanyit a ’deke wuju kwaset logon i to’diri a lo Ŋun.—Matayo 4:8-10.

2. Ŋilo malaikatat, Satani, a jambu ko Awa tokitaju munu. Na jamakindi nye nu ŋuto ’burönö nu, a nye tindi nu ŋuto i laundya na Ŋun. I ŋilo kiko a Satani labaki i loki na ŋo na luŋu a “riŋit saret” na Ŋun, kode i gwon nanyit a Katoŋanit lo ŋo liŋ. Satani a pija ko ŋona ’diri Ŋun sarju i kiko lo’but i ’dekesi ti ŋutu Kanyit lo sasara. Satani köti a pi ko ŋona ’diri lele ŋuto kata logon yiyiniki a lo Ŋun. I kondya nanyit sona, Satani a kon mugun a miriku lo Ŋun. Ŋina a kwe na tindu nye i luŋu a Satani logon a Kaŋöönit.—Suluet 3:1-5; Eyobo 1:8-11; Kweyatti 12:9.

3. Satani mörju dudumuja na ŋutu anyen kwakwadu nye. (2 Korinto 11:3, 14) Kiko lele logon nye togiradi ŋutu lo gwon a keri lo ’burönö. Ko din lele todindyö ŋo ti ’burönö i kulya ti Ŋun, lepeŋ ’diri kitakindya ’deket na Satani. (Yoane 8:44) Ŋutu logon a ti keriat ti ’burönö bubulö yubö gwak adi se kwakwadu Ŋun lo to’diri. Kölum ’diri se kitakindya Satani. Lepeŋ lo gwon a “Ŋun lo na kak.”—2 Korinto 4:4.

Keri lo’buröt, to’bunun, ko purpurja na jur totogiradu ŋutu

4. To’bunun a lele kiko logon Satani joundi ŋutu i lukak na riŋit nanyit. I kune diŋitan lepeŋat luluŋgu mulökö i gaju nase, i peŋga na kulye, i tuggö na ŋo ti ŋerot, kode i kondya na ŋo söresi. Satani lo gwon a riŋit naron nagwon i ki’diŋ na kine konesi liŋ. Anyen tulyöŋgu Ŋun, yi agu ködyö gwon ’bak nene ŋo na ŋara ko to’bunun.—Nyökit 18:10-12; Konesi 19:18, 19.

5. Satani köti togiradu ŋutu i kiko lo ’du’duŋgu duma na gweyari ko köti kwakwadu na tetenesi ti miri. Kulye yeyeju kase i töiliet adi jur kode gweyari lose a lo’but lwöŋgu kulye. Ama ŋina ’bayin a gwak. (Konesi 10:34, 35) Kulye ŋutu yinikindyö tetenesi ti miri i tu’baka’yu na yöyöŋesi ti ŋuto. I kondya nase sona, se renya Tumatyan na Ŋun. Nye na gwon a kiko geleŋ tuŋ lo tu’baka’yu yöyöŋesi kayaŋ.—Daniele 2:44.

Renyani Satani i kiko lo tu ŋerot i jujumbu na kulyati Yekowa

6. Kiko lele logon Satani togiradi ŋutu gwon a temba nase ko ’dekesi narok. Yekowa a takin yi adi ti yi gwe pajo i konesi ti toron kogwon lepeŋ aden adi se pepeŋ yi. (Galatia 6:7, 8) Kulye ŋutu i kune diŋitan ’de’dekan do i morakindya kose i konesi gwoso kine. Yeyene yeye, adi, ’diri gwak Satani lo ’dekuri do i kondya na kine ŋo.—1 Korinto 6:9, 10; 15:33.

7. I kune diŋitan Satani tokitaju yöŋet kode ’dö’döyet anyen tikindya do i kö’yu na Yekowa. I kune diŋitan kulye ti ŋutu kulök lo nyanyara woworan parik ko do kogwon kulya ti jujumbu inot na Bibilia. Kulye bubulö kondya do a ŋo lo kwekweniarikin. Ama ru inot po ko ŋa? Satani mindi tökujöndu do anyen do kökö jujumbu na kulya ti Yekowa. An do rukökin Satani i te’ya! (Matayo 10:34-39; 1 Petero 5:8, 9) I renya na ŋilo Kaŋöönit, do bubulö tulyöŋgu Yekowa ko i kwekindya adi do bu’ya kido Nanyit saret.—Tolupesi 27:11.

Copyright © 2006 Watch Tower Bible and Tract Society of Pennsylvania. All rights reserved.