Denbaya ka ɲɛnamaya kɛcogo min ka di Ala ye

1. Bibulu b’a fɔ ko cɛ de y’a ka denbaya kuntigi ye. (1 Kɔrɛntekaw 11:3) Furucɛ ka kan ka muso kelenpe de ta. U ka kan ka furu cogo bɛnnen na ka kɛɲɛ ni sariya ye.—1 Timote 3:2; Tite 3:1.

2. Furucɛ ka kan k’a muso kanu i n’a fɔ a b’a yɛrɛ kanu cogo min na. A ka kan k’a minɛ iko Yesu y’a ka kalanden minɛ cogo min na. (Efesekaw 5:25, 28, 29) A man kan abada k’a muso bugɔ, walima k’a tɔɔrɔ cogo si la. Nka, a ka kan ka bonya ni karama da a kan.—Kolosekaw 3:19; 1 Piɛre 3:7.

Fa kanubaganci b’a ka denbaya magow ɲɛ farikolo ni alako ta fan fɛ

3. Fa ka kan k’i jija k’a mago don a ka denbaya la. A ka kan ka dumuni, fini, ni so di a muso n’a denw ma. A ka kan fana k’a mago don a ka denbaya la alako ta fan fɛ. (1 Timote 5:8) A bɛ ɲɛmɔgɔya ta a ka denbaya kalanni na Ala n’a kuntilennaw ko la.—Dutɛrɔnɔmɛ 6:4-9; Efesekaw 6:4.

4. Furumuso ka kan ka kɛ dɛmɛbaga ɲuman ye a cɛ bolo. (Jenɛse 2:18) A ka kan ka kɛ a furucɛ kɔrɔsigibaga ye walasa k’u denw kalan, k’u lamɔ. (Ntalew 1:8) Jehowa b’a wajibiya furumuso ma a k’a mago don a ka denbaya la ni kanuya ye. (Ntalew 31:10, 15, 26, 27; Tite 2:4, 5) A ka kan ka bonyaba da a furucɛ kan.—Efesekaw 5:22, 23, 33.

5. Ala b’a wajibiya denw ma k’u bangebagaw kanminɛ. (Efesekaw 6:1-3) A sigilen bɛ n’a ye bangebagaw k’u denw kalan, k’u kolon. Bangebagaw ka kan ka waati tɛmɛ n’u denw ye, ka Bibulu kalan kɛ u kun. (Dutɛrɔnɔmɛ 11:18, 19; Ntalew 22:6, 15) Bangebagaw man kan abada k’u denw kolon ni nigɛlɛya ye, walima ni farinya ye.—Kolosekaw 3:21.

Ala sigilen bɛ n’a ye bangebagaw k’u denw kalan, k’u kolon

6. N’a man nɔgɔn furuɲɔgɔnw bolo u ka bɛn, u ka kan k’u jija ka Bibulu laadilikanw sirataama. Bibulu b’an laadi ka kanuya jira, ka yafa. (Kolosekaw 3:12-14) Nka, Ala ka kuma tɛ farali dusu don an kɔnɔ k’o kɛ sababu ye walasa ka kunko misɛnw ɲɛnabɔ. O n’a ta o ta, furumuso bɛ se k’a sugandi ka bɔ a cɛ kun (1) n’a tɛ denbaya ladon k'a sababu kɛ banbaganciya ye, (2) n’a ka farin fɔ muso ka kɛnɛya n’a ka ɲɛnamaya b’o da fɛ, walima (3) n’a cɛ bɛ kɛlɛ kɛ a fɛ a ka bato ko la fɔ ka se hakɛ dɔ ma min b’a bali ka Jehowa bato.—1 Kɔrɛntekaw 7:12, 13.

7. Furuɲɔgɔnw ka kan ka kantigiya to u ni ɲɔgɔn cɛ. Jɛnɛya ye jurumu ye min bɛ ala kota, wa, o bɛ furuɲɔgɔn tɔ kelen hakɛ fana ta. (Heburuw 13:4) Bibulu ka fɔ la, ka cɛnimusoya kɛ furu kɔkan, o dɔrɔn de bɛ se ka kɛ kun ye walasa furu ka sa, ka furu kura yamaruya. (Matiyu 19:6-9; Romɛkaw 7:2, 3) Ni furu sara k’a sɔrɔ Bibulu m’a daga, ka tila ka furu wɛrɛ siri, Jehowa b’o koniya.—Malaki 2:14-16.

Copyright © 2008 Watch Tower Bible and Tract Society of Pennsylvania. All rights reserved.