Ala ka Masaya ye mun ye?

1. Tuma min na a tun bɛ dugukolo kan, Yesu ye a ka kalandenw kalan u ka Ala deli Ala ka Masaya ko la. Masaya ye gɔfɛrɛnaman dɔ ye min kuntigiya bɛ masakɛ bolo. Ala ka Masaya ye gɔfɛrɛnaman kɛrɛnkɛrɛnnen dɔ de ye. A sigilen bɛ sankolo la, nka a bɛna dugukolo mara. A bɛna Ala tɔgɔ saniya walima k’a kɛ fɛn senuman ye. A bɛna kɛ sababu ye walasa Ala sago ka kɛ dugukolo kan i n’a fɔ a bɛ kɛ sankolo la cogo min na.—Matiyu 6:9, 10.

2. Ala ye layidu ta ko Yesu bɛna kɛ a ka Masaya Masakɛ ye. (Luka 1:30-33) Tuma min na Yesu tun bɛ dugukolo kan, a y’a jira k’a bɛna kɛ Kuntigi ɲuman, tilennen, ni dafalen ye. A seginna tuma min na sankolo la, a ma kɛ Ala ka Masaya masakɛ ye o yɔrɔnin bɛɛ la. (Heburuw 10:12, 13) San 1914 na, Jehowa ye fanga di Yesu ma iko a tun y’a layidu t’a ye cogo min na. Kabini o tuma na sa, Yesu bɛ ka mara kɛ sankolo la i n’a fɔ Jehowa ka Masakɛ latɔmɔnen.—Daniɛl 7:13, 14.

3. Jehowa ye cɛ ni muso kantigi dɔw fana sugandi ka bɔ dugukolo kan ka taa sankolo la. U ni Yesu bɛna mara kɛ ɲɔgɔn fɛ iko masakɛw, kiritigɛlaw, ni sarakalasebagaw hadamadenw kunna. (Luka 22:28-30; Jirali 5:9, 10) Yesu y’a marakɛɲɔgɔnw wele “saga kulunin.” U hakɛ ye 144 000 ye.—Luka 12:32; Jirali 14:1-3.

4. Yesu kɛra Masakɛ ye yɔrɔnin min na, a ye Sitanɛ n’a ka mɛlɛkɛ juguw kerun ka bɔ sankolo la ka bin dugukolo kan. O de kosɔn, kabini san 1914 na, kow juguyara kosɛbɛ ten dugukolo kan. (Jirali 12:9, 12) Kɛlɛw, kɔngɔw, fiɲɛbanaw, sariyatiɲɛni cayali, olu bɛɛ ye “taamasiyɛn” kɔnɔfɛnw ye minnu b’a jira ko Yesu bɛ fanga la ani ko nin kowsigicogoya bɛ a laban donw na.—Matiyu 24:3, 7, 8, 12; Luka 21:10, 11; 2 Timote 3:1-5.

5. Yan ni dɔɔnin cɛ, Yesu bɛna mɔgɔw kiritigɛ, ka u fara ka bɔ ɲɔgɔn na i n’a fɔ sagagɛnna bɛ sagaw ni baw fara ka bɔ ɲɔgɔn na cogo min na. “Sagaw” ye mɔgɔw ye minnu bɛn’a jira ko u ye a ka marakɔnɔmɔgɔ kantigiw ye. U bɛna ɲɛnamaya banbali sɔrɔ duguko kan. “Baw” ye mɔgɔw ye minnu b’u kɔdon Ala ka Masaya ma. (Matiyu 25:31-34, 46) Sɔɔni, Yesu bɛna mɔgɔw halaki minnu bɔlen bɛ baw fɛ. (2 Tesalonikekaw 1:6-9) N’i b’a fɛ ka kɛ Yesu ka “saga” dɔ ye, i ka kan k’i tulomajɔ Ala ka Masaya cikan na, wa, i ye min kalan, i k’o waleya.—Matiyu 24:14.

Yesu ka mara kɔnɔna na, kɔniya walima sigaɲɔgɔnya tɛna kɛ tun

6. Sisan, dugukolo tilalen don jamana caman ni ɲɔgɔn cɛ. U kelen-kelen bɛɛ n’u tɔgɔla gɔfɛrɛnaman don. O jamanaw bɛ ɲɔgɔn kɛlɛ tuma caman na. Nka, Ala ka Masaya bɛna hadamadenw ka gɔfɛrɛnamanw bɛɛ kɔfalen. O gɔfɛrɛnaman kelenpe de bɛna mara kɛ dugukolo bɛɛ kunna. (Daniɛl 2:44) O kɔ, kɛlɛw, kojugu, ni farinya kow tɛna kɛ tun. Hadamadenw bɛɛ bɛna sigi ɲɔgɔn fɛ, hɛrɛ ani kelenya na.—Mise 4:3, 4.

7. Yesu ka San Ba Kelen Mara kɔnɔna na, hadamaden kantigiw bɛna kɛ mɔgɔ dafalenw ye, ani dugukolo kuuru bɛɛ bɛna kɛ alijinɛ ye. O san ba kelen ban tuma na, Ala ye fɛn minnu bɛɛ ɲini Yesu fɛ, o bɛn’a sɔrɔ Yesu y’o bɛɛ kɛ kaban. O tuma na, a bɛna Masaya lasegin a Fa ma. (1 Kɔrɛntekaw 15:24) Ala ka Masaya bɛna min kɛ, mun na i t’o fɔ i teriw n’i diyanyemɔgɔw ye?

Copyright © 2008 Watch Tower Bible and Tract Society of Pennsylvania. All rights reserved.