Ala sagonata ye mun ye ka ɲɛsin dugukolo ma?

1. Jehowa ye nin dugukolo da walasa hadamadenw ka se ka ɲɛnamaya diyabɔ a kan fɔ abada. A tun b’a fɛ dugukolo ka kɛ yɔrɔ ye mɔgɔ tilennenw bɛna sigi min na hɛrɛ la kudayi. (Zaburu 115:16; Esayi 45:18) Dugukolo tɛna halaki abada; a bɛna to kudayi.—Zaburu 104:5; Eklesiaste (Waajulikɛla) 1:4.

2. Sanni Ala ka mɔgɔ da, a ye yɔrɔnin dɔ sugandi dugukolo kan k’o kɛ alijinɛ cɛɲumanba ye. A y’o wele Edɛn nakɔ. A ye cɛ fɔlɔ Hadama n’a muso Hawa bila yen. Ala sagonata tun ye u ka denw sɔrɔ, ka dugukolo bɛɛ fa. U tun bɛna dugukolo bɛɛ kɛ alijinɛ ye dɔɔnin dɔɔnin.—Jenɛse 1:28; 2:8, 15.

U bɔnɛna Alijinɛ na

3. Tuma min na Hadama ni Hawa y’u tugu ka Ala ka sariya sɔsɔ, u ye jurumu kɛ. O la sa, Jehowa y’u labɔ Edɛn nakɔ la. U bɔnɛna Alijinɛ na. (Jenɛse 3:1-6, 23) Nka, Ala ma ɲinɛ a sagonata kɔ dugukolo in ta fan fɛ. A ye layidu ta k’a bɛn’a kɛ alijinɛ ye, hadamadenw bɛna sigi yɔrɔ min na fɔ abada. A bɛna o kɛ cogo jumɛn na?—Zaburu 37:29.

4. Sanni dugukolo in ka se ka kɛ alijinɛ ye, mɔgɔ juguw ka kan ka bɔ yen. (Zaburu 37:38) O bɛna kɛ Harmagedɔn tuma na, n’o ye Ala ka kɛlɛ ye min bɛna kojugu ban. O kɔ, Sitanɛ bɛna bila kaso la san 1 000 kɔnɔ. O kɔrɔ ye ko kojugukɛla si tɛna kɛ yen tun walasa ka dugukolo jaasi. Ala ka mɔgɔw dɔrɔn de bɛna kisi.—Jirali 16:14, 16; 20:1-3.

5. O kɔ, Masakɛ Yesu Krista bɛna nin dugukolo mara san 1 000 kɔnɔ. (Jirali 20:6) A bɛna jurumu bɔ an hakiliw n’an fariw la dɔɔnin dɔɔnin. An bɛna kɛ mɔgɔ dafalenw ye cogo bɛɛ la, i n’a fɔ Hadama ni Hawa, sanni u tun ka jurumu kɛ. O tuma na, bana, kɔrɔya ani saya tɛna kɛ tun. Banabagatɔw bɛna kɛnɛya, mɔgɔkɔrɔbaw farisogo bɛna segin k’a kɛ i n’a fɔ u denmisɛnma fari tun bɛ cogo min na.—Job 33:25; Esayi 33:24; Jirali 21:3, 4.

6. Yesu ka San Ba Kelen Mara kɔnɔna na, mɔgɔ kantigiw bɛna baara kɛ ka dugukolo yɔrɔ bɛɛ yɛlɛma k’a kɛ alijinɛ ye. (Luka 23:43) O la, su miliyɔn caman bɛna lakunun walasa ka ɲɛnamaya kɛ dugukolo kan. (Kɛwalew 24:15) Ala bɛ min wajibiya u ma, n’u b’o kɛ, u bɛna to ɲɛnamaya la dugukolo kan, fɔ abada. N’u t’o kɛ, u bɛna halaki fɔ abada.—Yuhana 5:28, 29; Jirali 20:11-15.

7. O cogo la, Ala sagonata fɔlɔ bɛna timɛ ka ɲɛsin dugukolo ma. Yali i b’a fɛ k’i niyɔrɔ sɔrɔ nin duga nataw la wa? O la sa, i ka kan ka t’a fɛ ka Ala ka dɔnniya sɔrɔ, k’a ka ko wajibiyalenw mara. Jehowa Seerew ka lajɛw matarafali bɛna i dɛmɛ k’o kɛ. O lajɛw bɛ kɛ u ka Masaya So kɔnɔ min bɛ i sigida la.—Esayi 11:9; Heburuw 10:24, 25.

Harmagedɔn kɔfɛ, dugukolo bɛna kɛ alijinɛ ye

Copyright © 2008 Watch Tower Bible and Tract Society of Pennsylvania. All rights reserved.