Kunjamsa chiqa yupaychäwi jikxatasma

1. Jesusaxa mä chiqa cristiano tamakwa utt’ayatayna. Ukhamasti, jichhürunakanxa Jehová Diosar yupaychiri mä sapa tamakiw utjañapa (Juan 4:23, 24; Efesios 4:4, 5). Mä qhawqhanikiwa wiñay jakañaru irpir k’ullk’u thakin sarnaqapxi siw Bibliaxa (Mateo 7:13, 14).

2. Apostolanakan jiwatapatxa juk’at juk’atwa cristiano tama taypinxa k’ari yatichäwinakampi jan wali luräwinakampix uñstani sataynaw Bibliaxa. Criston arkirinakaparu jupanak tuqir apaqir jaqinakaw utjani sarakitaynawa (Mateo 7:15, 21-23; Hechos 20:29, 30). Ukatwa cristianüpxtwa siri kunaymani yupaychäwinakax utjixa. ¿Kunjamatsa chiqa cristianonakar uñt’sna?

3. Chiqa cristianonakax chiqpachapuniw jupanakkama munasipxi, uka tuqitwa jupanakar uñt’snaxa (Juan 13:34, 35). Janiwa yaqha kast jaqinakat jila jil tukupkaspati, ukham yatichatäpxiwa. Janirakiw yaqha markankiri jaqinakaru uñisipxam satäpkisa (Hechos 10:34, 35). Ukatwa janipuni ch’axwañanakaru mitisipkiti. Chiqa cristianonakaxa jilat kullakanakjamawa sarnaqasipxi (1 Juan 4:20, 21).

Chiqa cristianonakaxa jupanakkamax wal munasipxi, Bibliaruxa respetapxiwa ukatxa Diosan Apnaqäwipat yatiyapxaraki

4. Chiqa cristianonakaxa Bibliar wal respetapxi, uka tuqitwa jupanakaru uñt’araksnaxa. Bibliaxa Diosan Arupaw sapxiwa, ukat yatichäwinakaparuxa chiqaw sapxiwa (Juan 17:17; 2 Timoteo 3:16, 17). Diosan Arupawa jupanakatakix wali wakiskirixa jaqinakan amtanakapat sarnaqäwinakapat sipansa (Mateo 15:1-3, 7-9). Sapürusa Diosan Aruparjama sarnaqañatakiwa ch’amachasipxi. Ukhamaxa kuntï jaqinakaru yatichapki ukarjamaw sarnaqapxi (Tito 1:15, 16).

5. Chiqa yupaychirinakaxa Diosan sutip jach’añchapxañaparakiwa (Mateo 6:9). Jesusaxa Diosan Jehová sutipwa yatiyäna, chiqa cristianonakaxa ukham lurapxañaparakiwa (Juan 17:6, 26; Romanos 10:13, 14). ¿Khitinakasa Diosan sutip markaman yatiyapxixa?

6. Chiqa cristianonakax Diosan Apnaqäwipat yatiyapxañapawa. Jesusax ukham luräna. Diosan Apnaqäwipatpunwa parläna (Lucas 8:1). Ukatxa, uka pachpa yatiyäwi taqi chiqan yatiyapxäta sasaw arkirinakaparux satayna (Mateo 24:14; 28:19, 20). Diosan Apnaqäwipakiwa suma jakasiñxa aka Uraqiru apanini sapxiwa chiqa cristianonakaxa (Salmo 146:3-5).

7. Jesusan arkirinakapaxa janiw aka ñanqha pachankirïpkiti (Juan 17:16). Janiwa politicaru mitisipkiti, janirakiw kunapachatï markachirinakax sayt’asipki ukhax mitisipkiti. Aka ñanqha pachax jan wali amuyunakampi jan wali lurañanakampi jan wali sarnaqäwinakampi phuqantatawa, uka jan walinakatxa jithiqtapxiwa (Santiago 1:27; 4:4). ¿Markaman ukham yupaychäwix utjiti?

Copyright © 2008 Watch Tower Bible and Tract Society of Pennsylvania. All rights reserved.