Diosaru kusisiyiri familia

1. Chachaw familian p’iqipax siw Biblianxa (1 Corintios 11:3). Chachax mä sapa warminikïñapawa, ukat warmipampix kamachinakarjam casaratäñapawa (1 Timoteo 3:2; Tito 3:1).

2. Kunjamtï jupapacha munaskixa ukhamwa chachax warmiparu munasiñapaxa. Kunjamtï Jesusax arkirinakaparu uñjkänxa ukham uñjañaparakiwa (Efesios 5:25, 28, 29). Janipuniw nuwañapäkiti ni jan walinaksa sañapäkiti. Jan ukasti, sum uñjañapawa ukat respetañapawa (Colosenses 3:19; 1 Pedro 3:7).

Awk taykax wawanakar yatichaspa chiqañchaspa ukwa Diosax muni

3. Awkiwa familiapatakix wal irnaqañapa. Warmiparusa wawanakaparusa manq’aña, uta, isi churañapawa. Ukatxa Dios tuqitsa yatichañaparakiwa (1 Timoteo 5:8). Diosata ukhamaraki Diosan amtanakapampita yatiqañatakixa awkiw p’iqt’añapaxa (Deuteronomio 6:4-9; Efesios 6:4).

4. Warmisti chachapatakix suma yanapirïñapawa (Génesis 2:18). Chachaparuxa wawanak yatichañwa yanapt’añapa (Proverbios 1:8). Warmix munasiñampi familiapar uñjaspa ukwa Jehová Diosax muni (Proverbios 31:10, 15, 26, 27; Tito 2:4, 5). Warmisti chachaparuxa ist’añapapuniwa (Efesios 5:22, 23, 33).

5. Wawanakaxa awk taykaparu ist’apxapuniñapawa, ukwa Diosax muni (Efesios 6:1-3). Awkis taykasa wawanakaparu yatichapxañapawa ukat chiqañchapxañapawa, ukwa Diosax munaraki. Awkis taykasa wawanakapataki tiempo apst’asipxañapawa jupanakampi Bibliat yatiqañataki ukhamaraki kunjamsa jikxatasisipki uka tuqita yanapt’añataki (Deuteronomio 11:18, 19; Proverbios 22:6, 15). Janiw wawanakaparux wali qhuruchasisa chiqañchapxañapäkiti (Colosenses 3:21).

Munasir awkixa familiapataki wal irnaqi ukat Diosatsa yaticharakiwa

6. Kunapachatï chacha warmixa jan walt’ayasipki ukhaxa Biblian iwxanakaparjama askichapxañapawa. Bibliax munasipxam ukat juchanak pampachasipxam sistuwa (Colosenses 3:12-14). Diosan Arupaxa janiw jaljtapxam siskiti jan walt’añanak askichañatakixa. Ukampisa warmixa saraqxaspawa kunapachatï 1) chachaxa jani familiataki irnaqañ munkchi, 2) wali nuwasirïchi, jiwayirjamächi, ukat 3) janipuni Jehová Diosaru yupaychayañ munkchiti ukhaxa (1 Corintios 7:12, 13).

7. Chachas warmisa janiw yaqhanakampi sarnaqañapäkiti. Yaqhanakampi ikintasiñax Diosatakisa warmitakisa jan ukax chachatakisa wali jach’a juchawa (Hebreos 13:4). Chachasa jan ukax warmisa jaqichatäkasina yaqhampi ikintaschi ukhakiw divorcioru puripxaspa siw Bibliaxa, ukat ukhakirakiw yaqhampis jaqichasispa (Mateo 19:6-9; Romanos 7:2, 3). Yaqhampi casarasiñ layku Bibliar jan ist’asa divorciasiñarux Jehová Diosax uñisiwa (Malaquías 2:14-16).

Copyright © 2008 Watch Tower Bible and Tract Society of Pennsylvania. All rights reserved.