Kunjamsa Diosaru mayisiña

1. Diosat mayisiñaxa juparu alt’at chuymampi jak’achasiñawa. Diosarux mayisiñasapuniwa. Ukham lurasaxa, juk’ampiw juparux munasiñäni mä munat masisarjama. Jehová Diosax wali jach’äkchisa wali ch’amanïkchisa mayitanakasxa ist’iwa. ¿Diosat mayisipunirïtati? (Salmo 65:2; 1 Tesalonicenses 5:17.)

2. Diosat mayisisarakiwa Jupar yupaychtanxa. Ukatwa Jehová Diosaruki mayisiñasaxa. Jesusaxa aka Uraqinkkäna ukhaxa, Awkiparukipuniw mayisirïna. Jiwasax ukham lurañasarakiwa (Mateo 4:10; 6:9). Ukatxa Jesusan sutipxarupuniw mayisiñasaxa. Ukhamatwa Jesusar respetatassa luqtasïwiparu iyawsatassa uñacht’aytanxa (Juan 14:6; 1  Juan 2:1, 2).

3. Diosarux chuymatpacha mayisiñasawa, janiw yatsut arunakaki kutin kutin sañasäkiti, janirakiw rezañ librotsa liyiñasäkiti (Mateo 6:7, 8). Kawkhansa, kunjamsa, kuna horasasa respetompix Diosat mayisiskaksnawa. Chuymasan mayisktan uksa Diosax ist’istuwa (1 Samuel 1:12, 13). Sapaki Diosaru jak’achastan ukhaxa walïspawa sumäwjana, ch’usäwjana Diosaru mayisiña (Marcos 1:35).

4. ¿Kunanakxatsa Diosar mayisisma? Jupampi suma sarnaqañ tuqitwa mayisisma (Filipenses 4:6, 7). Diosan munañapa lurasiñapataki ukat Diosan sutipa jach’añchañatakiw mayisipxäta sasaw Jesusax yatichäna. Manq’añ tuqitsa, juchanaka pampachayasiñatakisa ukat yant’anakaru atipañatakisa mayisiraksnawa (Mateo 6:9-13). Janirakiw jiwasanakatakiki mayisiñasäkiti. Kunatï Diosataki walïki ukanakakwa mayisiñasaxa (1 Juan 5:14).

5. Diosar yuspärañ munasasa jan ukax yupaychañ munasasa Jupar jak’achasiskakismawa (1 Crónicas 29:10-13). Jan walin uñjasïta ukhasa, iyawsäwimasa yant’ata uñjasini ukhasa Diosat mayisiñamapuniwa (Salmo 55:22; 120:1). Janïra manq’kasaxa wakisiwa Diosar yuspäraña (Mateo 14:19). Jehová Diosax mayisipxapunita sistuwa (Efesios 6:18).

6. Kuna jach’a juchar purt’asasa jank’akiwa, khuyapt’ayita ukat pampachita sasa Diosaru mayisiñasa. Juchasa jan imxatasa arsusiñäni ukat jan uk mayampsa lurxañäni ukhaxa Diosax ‘juch pampachistaniwa’ (Salmo 86:5; Proverbios 28:13).

7. Jehová Diosax aski jaqinakan mayisitanakapakwa ist’i. Diosampi ist’ayasiñatakixa kamachinakaparjam sarnaqañamawa (Proverbios 15:29; 28:9). Alt’at chuymampiw jak’achasiñama (Lucas 18:9-14). Kuntï mayktaxa ukarjamawa sarnaqañamaraki. Ukhamatwa taqi chuyma mayisitamsa iyawsäwinïtamsa uñacht’ayätaxa. Ukham mayisïta ukhakiw Jehová Diosax ist’ätamxa (Hebreos 11:6).

Copyright © 2008 Watch Tower Bible and Tract Society of Pennsylvania. All rights reserved.