¿Aka Uraqitakix kunas Diosan amtapaxa?

1. Jaqinakan wali kusisita wiñay jakasipxañapatakiwa Jehová Diosax aka Uraqxa luratayna. Aka Uraqina kusisita suma jaqinakax wiñay utjasipxañapwa Diosax munäna (Salmo 115:16; Isaías 45:18). Aka Uraqix janipuniw t’unjatäkaniti, wiñayatakïniwa (Salmo 104:5; Eclesiastés 1:4).

2. Janïr jaqir lurkasawa Diosaxa Uraqit mä chiqa wali sumaptayatayna, ‘Edén huerta’ satänwa. Ukaruw nayrïri Adán sata chachampiru Eva sat warmimpiruxa uchatayna. Wawanakanïpxañapa ukat aka Uraqiru phuqantapxañapwa Diosax munäna. Juk’at juk’atwa aka Uraqxa huertar tukuyapxasapäna (Génesis 1:28; 2:8, 15).

Apt’askäna uka huerta

3. Adanampi Evampixa yatkasawa Diosar jan ist’apkataynati, ukhamatwa jucharu purt’asipxäna. Ukatwa, Jehová Diosax Edén huertat alisnukxäna, ukhamatwa huerta apt’apxatayna (Génesis 3:1-6, 23). Ukampisa, Jehová Diosaxa janiw aka Uraqitaki amtapxa armkiti. Jaqinakan mä suma huertaruw tukuyäxa siwa. ¿Kunjamsa uk lurpachäni? (Salmo 37:29.)

4. Aka Uraqixa mä huertar tukuñapatakix janiw ñanqha jaqinakax utjañapäkiti (Salmo 37:38). Armagedonanwa tukusipxani, ukax jan walinaka chhaqtayañataki Diosan jach’a urupawa. Ukxarusti, Supayaw waranqa mara jist’antatäni, ukhamasti janiw khiti ñanqhasa aka Uraqi jan walt’ayañatakix utjxaniti. Diosan markapakiw jakxani (Apocalipsis 16:14, 16; 20:1-3).

5. Ukxarusti Jesusaw aka Uraqxar waranqa mara apnaqanini (Apocalipsis 20:6), ukat juk’at juk’atwa amuyusatsa jañchisatsa juchax chhaqtxani. Adanampi Evampix janïra juchachasipkäna ukhama jan juchani suma jaqïxañäniwa. Ukapachax janiw usuntañasa, chuymankiptañasa, jiwañasa utjxaniti. Usutanakaxa k’umaräxapxaniwa ukat chuymaninakasa wayn tawaquruw kuttxapxani (Job 33:25; Isaías 33:24; Apocalipsis 21:3, 4).

6. Jesusax waranq mara apnaqkani ukhaxa, chiqa chuyman jaqinakax aka Uraqi huertaptayañatakiw irnaqapxani (Lucas 23:43). Ukatxa, millón millón jiwatanakaw jaktanipxani aka Uraqin jakasiñataki (Hechos 24:15). Kuntï Diosax maykani uk lurapxani ukhaxa wiñayatakiw aka Uraqin jakasipxani. Jan ukasti jan mayampitaki jiwayatäpxaniwa (Juan 5:28, 29; Apocalipsis 20:11-15).

7. Ukhamatwa Diosan nayra amtapax aka Uraqitak phuqasini. ¿Uka bendicionanaka jutïrin katuqañ munasmati? Ukatakixa, Jehová Diosat yatiqaskakiñamawa ukat kamachinakapsa ist’askakiñamawa. Markamankiri Jehová Diosan Qhanañchirinakapan tantachasiñ utaparu sarasaw juk’ampi yatiqarakisma (Isaías 11:9; Hebreos 10:24, 25).

Armagedón pasatatsti, aka Uraqix mä suma huertäxaniwa

Copyright © 2008 Watch Tower Bible and Tract Society of Pennsylvania. All rights reserved.