 |
Beliefs | Future | Medical | Topics | Contact Us | Publications | Languages |
Aka jisk’a t’aqanak uñxatarakisma
Wali wakiskir aka jiskt’anakatwa taqinis wal yatiñ muntanxa. Inas jumax akham jiskt’asirïsta:
¿Aka jiskt’anakar qhanañchañatakix kun lurañas wakisispa? Libronak mayt’apki uka utanakansa jan ukax libro aljañ utanakansa walipuniw uka tuqit parlir libronakax utji, ukampis may maya parlapxi. Yaqhipax aka urunakatakix waljamäkchisa, mä qhawqha tiempotxa pasatakïxiwa, ukatwa mayampi kutikipapxi jan ukax yaqha uñstayxapxi.
Ukampisa, uka jiskt’anakar sum qhanañchañatakix mä librow utji. Uka libroxa janipuniw k’ariskaspati. Jesucristox Diosar mayisisaxa akham sasaw uka librot säna: “Arunakamasti chiqawa” sasa (Juan 17:17). Jichhürunakanxa, uka Arunakapax Qullan Qillqatanakjam uñt’atawa, mä arunxa Biblia satawa. Uka jiskt’anakarux kunjamsa Bibliax sum qhanañchi, ukwa jichhax uñjañäni.
KUNATSA UKHAM JISKT’ASTANXA: Jan wali tiemponakan jakastanxa, jan sintt’asisaw jaqix yaqhanakar ina ch’usat t’aqhisiyapxi. Diosaruw yupaychirïpxta sirinakasa, Diosan munañapat ukham t’aqhistanxa sasaw yatichapxi.
UKA TUQIT KUNSA BIBLIAX YATICHI: Diosax janipuniw jan walinak lurkaspati. “¡Taqi ch’amani Diosax janiw kuna jan walsa lurkaspati, janirakiw kunatix jan chiqapäki uksa lurkaspati!” sasaw Job 34:10 qillqatax qhanañchi. Diosax jiwasatakix mä suma amtaniwa. Ukatwa Jesucristox Diosat mayisiñxa akham sas yatichäna: “Alaxpachankir nanakan Awkixa [...] Apnaqäwimax jutpan. Munañamax luraspan, alaxpachansa ukhamaraki aka Uraqinsa” sasa (Mateo 6:9, 10, Traducción del Nuevo Mundo). Diosax wal jiwasatxa llakisi, ukatwa amtanakapa phuqañatakixa wal irnaqaski (Juan 3:16).
Aka jisk’a t’aqanak uñxatarakisma: Génesis 1:26-28; Santiago 1:13 ukat 1 Pedro 5:6, 7.
KUNATSA UKHAM JISKT’ASTANXA: Uka ch’axwäwinakanxa walpun jaqinakax jiwarasipki. Ukhamarakiw taqinirus t’aqhisiyistu.
UKA TUQIT KUNSA BIBLIAX YATICHI: Sumankañaw jaqinakatakix utjxani sasaw Jehová Diosax qhanañchi. Aka Uraqi apnaqxani ukhaxa “janirakiw guerran nuwasiñatakis [yatichäwinakax utjxaniti]”. Jan ukasti “espadanakapxa qhulliñ aradoruw tukuyapxani” (Isaías 2:4). Janiw khitis ina ch’usat t’aqhisiyata uñjasxaniti, Diosax taqi jan walinakwa tukjani. Bibliax akham siwa: “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän [jichhürun t’aqhisiñanaka ukat ina chusat t’aqhisiñanakampi] ukanakax tukusxiwa” sasa (Apocalipsis 21:3, 4).
Aka jisk’a t’aqanak uñxatarakisma: Salmo 37:10, 11; 46:9; ukat Miqueas 4:1-4.
KUNATSA UKHAM JISKT’ASTANXA: Jiwatat jakañax utjaskakiw sasaw yupaychäwinakanxa yatichapxi. Jiwatanakax usuchjkistaspasa, jan walinaksa lurapkaspa ukham amuyapxi, ukat Diosas jupanakarux wiñayataki aqkir infiernon t’aqhisiykaspa ukham yatichapxi.
UKA TUQIT KUNSA BIBLIAX YATICHI: Jiwxtan ukhaxa q’al tukustanxa, janiw kunas juk’amp utjxiti. “Jiwatanakax janiw kunsa yatipkiti” sasaw Eclesiastés 9:5 qillqatax qhanañchi. Jiwatanakax janiw kunsa yatipkiti, ni kuns amuyapkarakiti, janirakiw munasiñapas utjxiti, ukhamaxa janiw jakirinakarux usuchjapkaspati ni yanapt’apkaspasa (Salmo 146:3, 4).
Aka jisk’a t’aqanak uñxatarakisma: Génesis 3:19 ukat Eclesiastés 9:6, 10.
KUNATSA UKHAM JISKT’ASTANXA: Janiw khitis jiwañ munktanti, jan ukasti familiasampi, munat masinakasampi wali kusisita jakasiñwa muntanxa.
UKA TUQIT KUNSA BIBLIAX YATICHI: Taqi jiwirinakatxa niya taqpachaw jaktanipxani. Jesusax akham arsüna: “Taqi jiwatanakasti [...] jaktanipxaniwa” sasa (Juan 5:28, 29). Diosan amtaparjamaxa, jiwatat jaktanirinakax mä suma Uraqin jakasiñatakiw jaktanipxani (Isaías 26:19). Taqi ist’asir jaqinakaw k’umara ukat wiñayataki jakasipxani, uka tuqitwa parlaskäna. Bibliax sarakiwa: “Aski jaqinakax uraq katuqapxani, wiñayatakiw ukan jakapxarakini” sasa (Salmo 37:29).
Aka jisk’a t’aqanak uñxatarakisma: Job 14:14, 15; Lucas 7:11-17 ukat Hechos 24:15
KUNATSA UKHAM JISKT’ASTANXA: Yupaychäwinakar saririnakax niya taqiniw Diosat mayisipxi. Ukampisa, Diosax janis jupanakar jaysankaspa ukham umuyasipxi.
UKA TUQIT KUNSA BIBLIAX YATICHI: Diosar mayisiñ tuqitxa Jesusax akham sasaw yatichäna: “Oración lurasinxa” jan kutin kutinix “inamaya arunakxa arsumti” sasa (Mateo 6:7). Diosampi ist’ayasiñatakix munañaparjamaw mayisiñasa. Ukatakixa, kunas Diosan munañapaxa uk yatiñaw wakisi, ukhamatakwa munañaparjamax mayisiñäni. 1 Juan 5:14 qillqatax akham sasaw qhanañchi: “Kuntix Diosarux mayiñäni munañaparjama ukxa jupax ist’istuwa” sasa.
Aka jisk’a t’aqanak uñxatarakisma: Salmo 65:2; Juan 14:6 ukat 1 Juan 3:22.
KUNATSA UKHAM JISKT’ASTANXA: Qullqinïña, wali mintatäña ukat suma uñtanïña, ukanakampis kusisita jakassna ukham umuyapxi. Ukatwa ukanak wal thaqhapxi, ukampis janiw kusisiñ jikxatapkiti.
UKA TUQIT KUNSA BIBLIAX YATICHI: Kusisita jakasiñatakix kunas munasi uka tuqitxa, Jesusax akham sänwa: “Kusisiñanïpxiw khitinakatix ajay tuqin aynacht’atäpxatap amuyasipxi ukanakaxa” sasa (Mateo 5:3). Kusisita jakasiñatakixa, kunatix jiwasataki wali askïki uk jikxatañasawa, ukasti Diosata, ukat amtanakapampita kunatï chiqäki uk yatiñ munañanwa jikxataraksnaxa. Uka yatichäwinakax Bibliankiwa. Ukanak yatiñax kunatï askïki, jan askïki uk sum amuyt’añatakiw yanapistu, ukatsti kusisiyarakistuwa. Amtanakasansa, luräwinakasansa Biblian yatichäwinakaparjampun lurañänixa juk’ampi sum jakasiñatakiw yanapt’istani (Lucas 11:28).
Aka jisk’a t’aqanak uñxatarakisma: Proverbios 3:5, 6, 13-18 ukat 1 Timoteo 6:9, 10.
Uka jiskt’anakatxa kunsa Bibliax yatichi uka tuqitxa mä juk’akwa yatxatawaytanxa. ¿Juk’ampi yatxatañ munasmati? “Ajay tuqin aynacht’atäpxatap amuyasipxi” ukanak taypinkatam amuyassta ukhaxa, juk’ampwa yatxatätaxa. Inas akham jiskt’asirakirïsta: “Niyakixay Diosax sapa maynit amtaschixa, ¿kunatsa jan walinaksa t’aqhisiñanaksa jichhakam utjayaskakpacha? ¿Kunjamatsa familiajampix sum jakasiristxa?” sasa. Uka jiskt’anakarusa yaqhanakarusa Bibliaw chuymar purt’kiri wali sum qhanañchistu.
Ukampisa, Biblia liyiñatakix janiw ch’amachasipkiti. Janis tukuyañjamäkaspa ukat wali ch’amäkaspas ukham amuyapxi. ¿Jumax Bibliat juk’ampi yatxatañataki yatichayasiñ munasmati? Jehová Diosan Qhanañchirinakapaw pä tuqit yanapt’apxiristamxa.
Mayaxa, ¿Kunsa Bibliax chiqpachapuni yatichi? satawa, ukampiw yanapt’apxi, ukasti jan tiemponi jaqinakar yatichañataki wakicht’atawa, suma qhana, chuymar purt’kiri jiskt’anakampi qhanañchañataki wakiyatarakiwa. Payïr yanapt’äwisti akarakiwa, Bibliat inakiw utaman yatichayasisma. Uta jak’amankiri mä wakicht’ata wali munasiri Diosan Qhanañchiripaw utamansa jan ukax yaqha chiqansa inaki yatiqañ yanapt’iristamxa, ukhamat Bibliat sum yatxatañamataki. Uraqpachänxa waranq waranqa jaqinakaw Bibliat wali sum yatxatasipki. Ukatxa, waljanirakiw akham sapxi: “¡Akapï chiqaxa!” sasa.
Janiw kawkinsa ukham suma yatichäwinakax utjkaspati. Biblian chiqa yatichäwinakapaxa watinakatsa, payachasiñanakatsa ukat axsarañanakatsa qhispiyarakistuwa. Ukatxa mä suyt’äwi churistu, ukanak yatisax mä aski amtaniw sum jakastanxa. Jesusax akham sänwa: “Uñt’apxarakïtawa kunatix chiqäki ukxa, uka chiqa kankañasti qhispiyat sarnaqasiñ churapxarakïtam” sasa (Juan 8:32).
2008 maran lurata |
 |