¡K’ARI YUPAYCHÄWIN
TUKUSIÑAPAX
JAK’ANKXIWA!

¿Kunas k’ari yupaychäwixa? Diosan sutipxaruw jan walinak lurapxi, ¿ukax llakisiytamti? Diosar yupaychirinakäpxtwa sirinakaw ch’axwäwinakar sarapxi, jaqinak jiwthapiyapxi, jan walinak lurapxi, ¿ukax janit chuymam ust’ayktamxa? ¿Kunatsa yupaychäwinakas jan walt’äwinak utjaykaspa ukhamaxa?

Janiw taqi yupaychäwinakax ukham lurapkiti jan ukasti k’ari yupaychäwikiw ukanak luri. Yupaychäwinakan wali respetata Jesucristosti, k’ari yupaychäwinakax jan wali achunakaniwa sataynawa, ‘jan suma quqjama jan wali achunakarakwa achuraki’ sasa (Mateo 7:15-17). ¿K’ari yupaychäwix kuna kasta achunisa?

K’ari yupaychäwixa...

CH’AXWÄWINAKARU UKAT POLITICARUW MITISI. Asiaweek qillqatax siwa: “Asia tuqi markanakansa yaqha chiqanakansa, taqi kun apnaqañ munir irpirinakaw yupaychäwi tuqitxa jan sintt’asisa munañanakapar jaqinakxa apnaqapxi” sasa. Ukatwa “akapachax luqhiptaski” sarakiwa. Estados Unidos markankiri mä yupaychäwin uñt’at irpiripax akham sataynawa: “Jiwayasiñanak jan utjañapatakixa, jaqi jiwthapiyirinakar tukjañäspawa” sasa. Uka jan walinak askichañatakixa, “Tatitun sutipxar jiwarayañaw” sarakitaynawa. Janiw Bibliax ukham yatichkiti jan ukasti akham siwa: “Ukampis kawkïritix sixa: ‘Nayax Diosarux muntwa’ sasa, ukatsti jilapar uñisiskarakixa, ukasti k’ariwa” (1 Juan 4:20). Ukat Jesusax akham mä kamachi churarakïna: “Uñisirinakamarux munapxam” sasa (Mateo 5:44). ¿Qhawqha yupaychäwinakas arkirinakap ch’axwäwinakaru khitapxi? ¿Kamsasmasa?

K’ARINAK YATICHI. Jiwatatxa almas ajayus jakaskaspasa ukhamwa jila part k’ari yupaychäwinakax yatichapxi. Walja k’ari yupaychäwinakaw qullq apsuñatakixa jiwatan almapatakiw risaña sas sapxi, ukhamatwa arkirinakaparux k’arinak yatichapxi. Ukampis janiw Bibliax ukham yatichkiti, jan ukasti “khitinakatix jakasipki ukanakaxa yatisipxiwa jiwxañanakapa, ukampis jiwatanakax janiw kunsa yatipkiti” siwa (Eclesiastés 9:5). Jesusax jiwatanakax jaktaniniw sänwa, jaqix jan jiwir almanïspaxa janiw ukham siskaspänti (Juan 11:11-25). Yupaychir sarkta ukanxa, ¿almax jan jiwiriw sasat yatichapxi?

WACHUQA Q’AÑU LURÄWINAKXA UKHAMAKIW UÑCH’UKI. Yaqhip markanakanxa chachapura jan ukax warmipura sarnaqirinakaruw yupaychäwi irpirinakjama utt’ayasipxi, ukat chachapura jan ukax warmipura jaqichasiñ utjañapatakixa gobiernoruw mä kamachi mayipxi. Ukatxa, janiw uka q’añunakax lurañäkiti siri yupaychäwinakasa, yupaychäwi irpirinakaparux ukhamakiw unch’ukipxi wawanakaru abusapxi ukhaxa, janiw kuns kamachapkiti. Ukampisa, ¿kunsa Bibliax yatichi? Wali qhanwa akham sas parli: “Jan sallqjayasipxamti, wachuqa juchan sarnaqir jaqix janiw Diosan markapar mantkaniti, [...] wachuqa juchan sarnaqirisa, chacha pura jan wali sarnaqirinakasa” sasa (1 Corintios 6:9, 10). ¿Ukham q’añunak lurañax walikïskiw siri yupaychäwinakat ist’irïtati?

¿Ukham jan wali ñusantat achunakani yupaychäwinakax kunarus purt’asipxani? Jesusax akham sataynawa: “Taqi jan wali achuri quqaxa phat’anukutäñapawa, ukatsti ninar phichhantatäñaparakiwa” sasa (Mateo 7:19). Ukhamawa, k’ari yupaychäwixa phichhantatäniwa, mä arunxa chhaqtayatäniwa. Ukampisa, ¿kunapachas ukat kunjam tukjatänisa? Apocalipsis 17, 18 jaljanakaw uka tuqit qhanañchistu.

¿K’ari yupaychäwix kunjam chhaqtayatänisa?

Ak amuyt’ma. Mä q’añu warmixa, paqallqu p’iqini tunka waxrani axsarkañ mä jach’a animalxaru lat’xatatawa (Apocalipsis 17:1-4). ¿Uka warmix khitïpachasa? ‘Aka uraqina taqi reyinakaru apnaqkis ukawa’. Ukatxa uka warmisti wila isimpi isthapitawa, incienso apt’ata, ukat wali qamirirakiw siw Bibliaxa. Ukatsti, ‘taqi markanakarusti layqasitanakapampirakiw sallqji’ (Apocalipsis 17:18; 18:12, 13, 23). Ukhamasti, uka q’añu warmixa, uraqpachan apnaqiri k’ari yupaychäwiwa, ukwa Bibliax amuyt’ayistu. Janiw mä sapa yupaychäwikïkiti, jan ukasti taqi jan wali ñusantat achunakani yupaychäwinakawa.

Uka axsarkañ jach’a animalaxa, akapachankir taqi jach’a apnaqäwinak sañ munaraki (Apocalipsis 17:10-13).* Uka patar k’ari yupaychäwix qunxatatawa; apnaqaña, amtanakap mayjt’ayañwa tiraski.

Niyaw aka muspharkañ arunakax phuqasini: “Uka tunka waxranaka uñjktas ukanakasti uka q’añu warmirux uñisipxaniwa, q’alalpacharaki irpanukupxani, janchipsti manq’apxarakiniwa, ninampirakiw nakhantayapxani” (Apocalipsis 17:16). Mä akatjamatwa, akapachankir taqi jach’a apnaqäwinakaxa k’ari yupaychäwirux kutxatapxani, ukatxa jan mayampitakiw tukjapxani. ¿Kunatsa? Apocalipsis librox akham siwa: “Diosarakiw jupanakan chuymaparux usku mayakïpxañapataki, ukatsti kuntï Diosax munki uk lurapxañapataki” sasa (Apocalipsis 17:17). Ukhamaxa, Diosan sutipxar ñanqha luräwinakapatxa, k’ari yupaychäwinakax Diosaruw cuenta churapxani. Ukatsti, uka q’añu warmimpi sarnaqir pachpa reyinakampiw uka warmiruxa Diosax tukjayani, ukxa chiqapar uñjasaw lurani.

¿Kun lurañamasa k’ari yupaychäwimp chik jan t’unjatäñamatakixa? “Nayankir jaqinaka, mistxapxam uka markata”, siw Diosan yatiyiripaxa (Apocalipsis 18:4). Jichhpachaw k’ari yupaychäwit mistxañamaxa. ¿Ukat kawkirus saräta? ¿Diosax janiw utjkit sirinak tuqirut saräta? Janiwa, kunattix jupanakax tukjatäpxarakiniwa (2 Tesalonicenses 1:6-9). Chiqa yupaychäwirukipuniw imantasiñasaxa. ¿Kunjamatsa chiqa yupaychäwi uñt’asma?

Kawkïris chiqa yupaychäwix uk kunjamats yatsna

¿Chiqa yupaychäwix kuna suma achunakanïñapasa? (Mateo 7:17.)

Chiqa yupaychäwixa...

... MUNASIÑ UÑACHT’AYI. Diosan chiqa yupaychirinapaxa ‘janiw akapachankirïpkiti’, yaqha kast jaqinakarusa yaqha markankirinakarusa janiw uñisipkiti, jan ukasti ‘maynit maynikamaw munasipxi’ (Juan 13:35; 17:16; Hechos 10:34, 35). Janiw jupanakpura jiwayasipkiti, jan ukasti jilat kullakanakap laykux jakañap apt’asipxaspawa (1 Juan 3:16).

... DIOSAN ARUPARUW ATINISI. Chiqa yupaychäwix janiw jaqin ‘amtäwipsa’ ni sarnaqäwipsa yatichkiti, janirakiw ‘jaqinakan yatichäwinakapsa’ yatichkiti; jan ukasti Bibliat yatichi (Mateo 15:6-9). ¿Kunatsa? Kunattix “taqi Qillqatasti Diosan amuyt’ayatawa, askirakiw yatichañataki, chiqachañataki, ukhamarak q’uma jakañan sarnaqañ yatichañatakisa” (2 Timoteo 3:16).

... FAMILIANAKARUX MAYACHIWA, SUM SARNAQAÑWA YATICHI. ‘Chachasti warmiparux janchiparjamaw munasiñapa’ sasaw chiqa yupaychäwix yatichi, ‘warmirusti chachapar ist’añapatakiw’ yanapt’araki, wawanakarux “awkimaru taykamaru ist’apxam” sarakiwa (Efesios 5:28, 33; 6:1). Ukatsti, irpirinakax uñtkañ q’uma sarnaqäwinïpxañapawa siwa (1 Timoteo 3:1-10).

¿Kawkir yupaychäwis ukanak phuqaskpacha? Holocaust Politics, 2001 maran lurat librox siwa: “Jaqinakatï Jehová Diosan Qhanañchirinakapjama ukat yatichäwinakaparjama sarnaqapxaspaxa, janiw ch’axwäwinakan jiwarayasiñax utjkaspati, janirakiw ukham jaqi pura jiwthapiyasiñas uraqpachan utjkarakispati” sasa.

Jisa, 235 markanakana, Jehová Diosan Qhanañchirinakapax janiw ukhamaki Biblian kamachinakap yatichapkiti; jan ukasti ukarjamaw sarnaqapxi. Kunjamtï Diosax munki ukarjam yupaychañatakixa kunsa Jupax mayistu uk yatxatañataki yanapt’ayasisma, ukax walipunïspawa. Jichhpachaw uk lurañamax wakisispa. Jan qhiparamti. ¡K’ari yupaychäwin tukusiñapax jak’ankxiwa! (Sofonías 2:2, 3.)

*  Uka tuqit juk’amp yatxatañatakixa, uñxatarakismawa akïr libro, Apocalipsis... ¡se acerca su magnífica culminación!, ukasti Jehová Diosan Qhanañchirinakapan español aruta qillqatawa.