An wun mantan Ɲanmiɛn i srɛlɛ’n nun

1. Ɲanmiɛn srɛlɛ’n i bo’n yɛle kɛ be nin i be koko aenvuɛ su yalɛ. Ɔ fata kɛ amun srɛ Ɲanmiɛn tititi. I liɛ’n ɔ́ yó kɛ amun janvuɛ kpa kun sa. Zoova cɛnnin kpɔkun ɔ le tinmin dan; sanngɛ kusu, kɛ e nin i é kókó yalɛ’n, ɔ sie i su. ?Amun srɛ Ɲanmiɛn tititi?—Jue Mun 65:3; 1 Tɛsalonikfuɛ Mun 5: 17.

2. Ɲanmiɛn srɛlɛ’n o i sulɛ’n nun wie. I ti yɛ maan Ɲanmiɛn Kpli Zoova kunngba cɛ yɛ e srɛ i ɔ. I nun mɔ Zezi o asiɛ’n su wa’n, i Si’n kunngba cɛ yɛ ɔ nin i be kokoli yalɛ tititi ɔ, nán ɔ nin sran uflɛ ɔ. Maan e fɛ i ajalɛ’n su (Matie 4:10; 6: 9). Sanngɛ maan e nin Ɲanmiɛn e yalɛ kokolɛ kwlaa’n yo Zezi dunman nun. I liɛ’n é klé kɛ e bu i tranwlɛ’n i like dan, naan e fa e wla’n e guɛ i wun kpɔlɛ tɛ m’ɔ yili’n su.—Zan 14:6; 1 Zan 2: 1, 2.

3. Kɛ e nin Ɲanmiɛn é kókó yalɛ’n, maan e kan e klun ndɛ’n e kle i. E nin i e yalɛ kokolɛ’n timan ndɛ mɔ be suɛn i be ti nun annzɛ be kɛnngɛn i yalɛ kokolɛ fluwa wie nun ɔn (Matie 6: 7, 8). Lika kwlaa nga e wo’n, e nin Ɲanmiɛn e kwla koko yalɛ. Sɛ kotolɛ ɔ, annzɛ ase tranlɛ ɔ, annzɛ nglo jranlɛ ɔ, sɛ aɲinyiɛ o i kwlaa ngalɛ nun’n, ɔ ti kpa. Sɛ bɔɔ e nin Ɲanmiɛn e koko yalɛ e klun lɔ’n, ɔ kwla ti (1 Samiɛl 1: 12, 13). Sɛ e ɲan lika diin kun’n, naan e ngunmin, e nin i e kwla koko yalɛ’n, ɔ ti kpa wie.—Mark 1: 35.

4. ?Ninnge mennin ti yɛ amun kwla srɛ Ɲanmiɛn ɔn? Like kwlaa nga ɔ ti amun nin Ɲanmiɛn amun afiɛn ndɛ’n, amun kwla kan (Filipfuɛ Mun 4: 6, 7). Yalɛ kokolɛ i ajalɛ nga Zezi kleli’n, ɔ kle e kɛ maan e srɛ Zoova, i dunman’n nin i klun sa yolɛ’n ti. E kwla srɛ i wie naan y’a ɲan e sa nun like, naan w’a yaci e tɛ’n w’a cɛ e, kpɔkun naan y’a ɲan fanngan y’a jran kekle lakalɛ’n i ɲrun (Matie 6: 9-13). Kɛ e nin Ɲanmiɛn é kókó yalɛ’n, nán e yo awɛn. Ɲanmiɛn i klun su like’n i ngunmin cɛ, i ti yɛ ɔ fata kɛ e srɛ i ɔ.—1 Zan 5: 14.

5. Kan kwlaa nga ɔ ba amun klun kɛ amun nin Ɲanmiɛn be koko yalɛ be lɛ i ase annzɛ be yi i ayɛ be mɛnmɛn i’n, amun kwla yo (1 Be Nyoliɛ 29: 10-13). Sɛ amun sa ti mianwa’n naan amun su wun amun ɲrun’n, amun kwla srɛ Ɲanmiɛn (Jue Mun 55:22; 120: 1). Sɛ amun lɛ i ase naan amun a di aliɛ’n ɔ ti kpa (Matie 14:19). Zoova klo kɛ “sa’n kwlaa nun’n, amun nin i koko yalɛ.”—Efɛzfuɛ Mun 6: 18.

6. Sɛ e fɔn Ɲanmiɛn mmla dan kpa’n, maan e srɛ i kpa. Maan e se Zoova kɛ ɔ si e aunnvuɛ naan ɔ yaci e tɛ’n cɛ e. Sɛ e koko e tɛ’n e kle Ɲanmiɛn naan e mian e ɲin e yaci sa tɛ sɔ’n i yolɛ’n, Ɲanmiɛn ‘kwla yaci e wun sa’n cɛ e.’—Jue Mun 86:5; Nyanndra Mun 28: 13.

7. Sran kpafuɛ’m be ngunmin be yalɛ kokolɛ liɛ’n cɛ, yɛ Zoova fɛ i su sie i bo ɔ. Sɛ amun kunndɛ kɛ ɔ fɛ i su’n sie amun yalɛ kokolɛ liɛ i bo wie’n, maan amun jran kekle be nanti i mmla’n su (Nyanndra Mun 15:29; 28: 9). Kɛ é srɛ́ i’n, maan e yo e wun aenvuɛfuɛ (Lik 18: 9-14). Maan yalɛ nga amun koko i lɛ’n, amun nanti su. I liɛ’n bé wún kɛ amun lafi Ɲanmiɛn su naan ndɛ nga ɔ fite amun nuan’n i su yɛ amun nanti ɔ. Sɛ e yo sɔ’n, i liɛ sɛ e srɛ Zoova’n, ɔ kwla sie i su.—Ebre Mun 11: 6.

Copyright © 2008 Watch Tower Bible and Tract Society of Pennsylvania. All rights reserved.