?Ngue yɛle Ɲanmiɛn i Sielɛ Blɛ’n?

1. I nun m’ɔ o asiɛ’n su wa’n, Zezi kleli i sɔnnzɔnfuɛ’m be wafa nga be ko srɛ Ɲanmiɛn naan i Sielɛ Blɛ’n w’a ba’n. Sielɛ Blɛ’n ti kɛ awa mɔ famiɛn kun o i ti’n sa. Ɲanmiɛn Kpli i Sielɛ Blɛ’n ti awa mɔ be ɲɛnmɛn i wunsu ɔ. Ɔ o ɲanmiɛn su lɔ, kpɔkun ɔ́ wá síe asiɛ’n. Ɔ́ wá bó Ɲanmiɛn Kpli i dunman fɛ, yɛle kɛ ɔ́ wúnnzin i yɛiin. Ɔ́ wá yó naan Ɲanmiɛn i klun sa’n yó asiɛ’n su wa kɛ be yo i ɲanmiɛn su lɔ’n sa.—Matie 6:9, 10.

2. Ɲanmiɛn Kpli seli kɛ Zezi yɛ ɔ́ wá dí i Sielɛ Blɛ’n i nun Famiɛn’n niɔn (Lik 1:30-33). I nun mɔ Zezi o asiɛ’n su wa’n, ɔ kleli kɛ ɔ́ wá yó Famiɛn kpa m’ɔ yo sran ye’n, m’ɔ ti ndɛnmanfuɛ ɔ. Kɛ ɔ sɛli i sin’n ɲanmiɛn su lɔ’n, b’a fɛmɛn i b’a tranman Famiɛn bia’n su be ja nun lɛ (Ebre mun 10:12, 13). Afuɛ 1914 nun’n, Zoova fali Sielɛ Blɛ’n fa wlɛli i Zezi sa nun, kɛ nga m’ɔ fa kannin’n sa. Kɛ ɔ fin lɛ’n, Zezi yɛ ɔ di Famiɛn’n niɔn.—Daniɛl 7:13, 14.

3. Zoova fali bla nin yasua nga be nanti ndɛnman su asiɛ’n su wa’n, naan be wɔ ɲanmiɛn su lɔ wie. Be nin Zezi bé yó famiɛn, ɔ nin jɔlɛ difuɛ nin Ɲanmiɛn ɲrun jranfuɛ, be yɛ bé síe klɔ sran mun ɔn (Lik 22:28-30; Sa Nglo Yilɛ 5:9, 10). Be nga be nin Zezi bé dí famiɛn’n, Zezi flɛ be “bua akpasua kaan.” Be nuan’n ti 144.000.—Lik 12:32; Sa Nglo Yilɛ 14:1-3.

4. Kɛ Zezi yoli Famiɛn cɛ’n, ɔ kannin Satan nin i anzi klunwifuɛ’m be bo ɲanmiɛn su lɔ, yɛ be bo guali asiɛ’n i nvɛnwunnvɛnwun wa ɔ. I sɔ’n ti’n, kɛ ɔ fin afuɛ 1914 nun lɛ’n, lika’n timan kpa asiɛ’n su wa kun (Sa Nglo Yilɛ 12:9, 12). Alɛ, awe, tukpaciɛ, ɔ nin be nga be ɲin yiman mmla’n yɛ be o asiɛ’n su wa ɔ. I kwlaa ngalɛ’n ti Zezi i Sielɛ Blɛ nin mɛn’n m’ɔ o i bue nuan’n be “nzɔliɛ.”—Matie 24:3, 7, 8, 12; Lik 21:10, 11; 2 Timote 3:1-5.

5. Ɔ ka kaan, Zezi wá dí klɔ sran’m be jɔlɛ, ɔ́ bú be nun kɛ nnɛn tafuɛ’n fa bu i bua nin i boli’m be nun gua be ngunminngunmin sa’n. Be nga be nantili ndɛnman su mɔ be suli Zezi su’n, be yɛ be ti “bua mun” ɔn. Bé ɲán anannganman nguan asiɛ’n su wa. Sanngɛ be nga be kpaloli Ɲanmiɛn i Sielɛ Blɛ’n, be yɛle “boli mun” (Matie 25:31-34, 46). Ɔ cɛ kaan Zezi wá núnnún be nga be ti kɛ boli mun sa’n (2 Tɛsalonikfuɛ Mun 1:6-9). Sɛ amun kunndɛ kɛ amún yó kɛ Zezi i “bua” kun sa’n, ɔ fata kɛ amun fa amun su sie i Ɲanmiɛn Sielɛ Blɛ jasin fɛ’n i bo, naan amun a nanti like nga amun suan’n i su.—Matie 24:14.

Zezi i Sielɛ Blɛ nun’n, sran kpɔlɛ nin i jɔlɛ ndɛndɛ dilɛ’n bé wíe lɛ.

6. Andɛ, asiɛ wunmuan’n w’a kaci nvlenvle. Ɔ le nvle kun nin i awa’n. Nvle sɔ’m be nin be wiengu’m be di utre. Sanngɛ Ɲanmiɛn Kpli i Sielɛ Blɛ’n wá fá awa wunmuan’m be tranwlɛ’n. I kunngba cɛ yɛ ɔ́ wá síe asiɛ wunmuan’n niɔn (Daniɛl 2:44). I liɛ’n alɛ, sran kunlɛ ɔ nin sran like yaya yolɛ be su tranman lɛ kun. Klɔ sran kwlaa bé trán likawlɛ alaje nin anuannzɛ nun.—Mise 4:3, 4.

7. Afuɛ 1.000 nga Zezi i Sielɛ Blɛ’n wá dí nun’n, fɔ su tranman klɔ sran ndɛnmanfuɛ’m be nun kun, kpɔkun asiɛ wunmuan’n káci mɛn klanman. Kɛ ɔ́ wá jú afuɛ akpi sɔ’n i awieliɛ’n, nn Zezi w’a yo like kwlaa nga Ɲanmiɛn Kpli seli kɛ ɔ yo’n. Kɛ ɔ ko ju sɔ’n, ɔ́ fá Sielɛ Blɛ’n fá wlɛ́ i i Si’n sa nun (1 Korɛntfuɛ Mun 15: 24). ?Ngue ti yɛ amun kanman like nga Ɲanmiɛn i Sielɛ Blɛ’n wá yó’n kleman amun osufuɛ nin amun janvuɛ mun ɔn?

Copyright © 2008 Watch Tower Bible and Tract Society of Pennsylvania. All rights reserved.